Skessuhorn - 14.04.2010, Blaðsíða 19

19ÞRIÐJUDAGUR 14. APRÍL
Þó allt orki
tvímælis sem gert er þá er
hugmynd Jóhönnu Sigurðardóttur
forsætisráðherra um sameiningu
ríkisstofnana athyglisverð. Að
sjálfsögðu þarf hugmynd sem
þessi vandaðan undirbúning
svo tilgangnum um sparnað í
ríkisrekstri verði náð og að ekki sé
verið að framlengja vandamálið í
auknu atvinnuleysi.
Þegar slíkar hugmyndir eru
ræddar verða neikvæðu viðbrögðin
oftast fyrirferðarmest. Þeir sem
hins vegar líta á tækifærin sem
þessar fyrirhuguðu breytingar
gætu haft í för með sér, geta nýtt
sér það fyrir sveitarfélag eins og
Akranes. Það á ekki síst við um
þá sveitarstjórnarmenn sem eru á
verðinum og vinna markvisst að
undirbúningi mála.
Þann 17. mars síðastliðinn skrifaði
ég grein í Skessuhorn, þar sem ég
sagði meðal annars: „Bæjarfulltrúar
þurfa einnig að standa vaktina er
kemur að störfum og stofnunum
á vegum ríkisins. Verja það sem
fyrir er og skoða möguleika á
frekari verkefnum. Við Skagamenn
eigum nægar byggingalóðir og
atvinnuhúsnæði til að taka að okkur
aukin verkefni í þá veru.“
Fyrir rúmum 11 árum var
starfsemi Landmælinga Íslands
flutt frá Reykjavík til Akraness.
Rekstur stofnunarinnar hefur
gengið vel á Akranesi og er einn
af mörgum burðarásum byggðar
hér. Vera hennar hér sannar að
það er ekki náttúrulögmál að
allar opinberar stofnanir þurfi að
staðsetja í Reykjavík, heldur þvert
á móti. Samkvæmt fréttum síðustu
daga gæti komið til álita að þessi
ágæta stofnun verði sameinuð
rekstri annarrar ríkisstofnunar og
þar liggja tækifæri.
Bæjarstjórn Akraness verður strax
í samstarfi við stjórnendur stofnana
á Akranesi að sækjast eftir því að
rekstur opinberra stofnana færist til
Akraness við þá endurskipulagningu
sem framundan er og kynna þá
möguleika sem til staðar eru hér.
Á Akranesi er nægt húsnæði sem
auðveldlega getur hýst starfsemi
sem þessa. Sem dæmi má nefna eitt
hús sem áður hýsti Landsbankann
og stendur við Akratorg.
Skjót og skipulögð viðbrögð
geta veitt Skagamönnum forskot.
Nýtum tækifærin og sækjum
fram í þessu máli sem öðrum. Ég
hvet því bæjarstjórn Akraness að
skora á ríkisstjórn Íslands að verja
og fjölga opinberum störfum á
landsbyggðinni og að bæjarstjórn
Akraness hafi nú frumkvæði að
viðræðum þess efnis sem allra
fyrst.
Ingibjörg Valdimarsdóttir
viðskiptafræðingur
Höfundur er frambjóðandi
Samfylkingarinnar fyrir
sveitarstjórnakosningarnar 29. maí
næstkomandi
Dagana 17. ­ 19. apríl mun kór
Menntaskólans við Hamrahlíð
verða á tónleikaferðalagi í
Borgarfirði. Kórinn heldur tónleika
í Reykholtskirkju laugardaginn
17. apríl kl. 16. Sunnudaginn 18.
apríl syngur kórinn við messu
í Borgarneskirkju kl. 14 og um
kvöldið klukkan 20 verða almennir
tónleikar í Hriflu, sal Háskólans
á Bifröst. Mánudaginn 19. apríl
heldur kórinn ferna skólatónleika;
í Varmalandi (fyrir nemendur
Varmalandsskóla og nemendur
Grunnskóla Borgarfjarðar)
klukkan 9:00, tvenna tónleika í
Mennta­ og menningarhúsinu
í Borgarnesi (fyrir nemendur
Grunnskólans í Borgarnesi klukkan
11:10 og fyrir nemendur MB
kl. 13:00) og í Fjölbrautaskóla
Vesturlands á Akranesi klukkan 15.
Mánudagskvöldið 19. apríl heldur
kórinn tónleika í Hallgrímskirkju
í Saurbæ kl. 20.30. Aðgangur er
ókeypis á alla tónleikana.
Á efnisskrá kórsins í
tónleikaferðinni um Borgarfjörð eru
íslensk og erlend tónverk m. a. eftir
J. S. Bach, W.A. Mozart, Carl Orff,
Emil Thoroddsen, Gunnar Reyni
Sveinsson, Atla Heimi Sveinsson og
Þorkel Sigurbjörnsson auk þjóðlaga
frá ýmsum löndum. Efnisskráin er
svo fjölbreytt að kórinn flytur ólík
verk eftir því hvort um er að ræða t.
d. kirkjutónleika eða skólatónleika.
Margir hljóðfæraleikarar eru meðal
kórfélaga.
Á þessari vorönn er Kór
Menntaskólans við Hamrahlíð
skipaður 104 nemendum á aldrinum
16 ­ 20 ára. Stjórnandi kórsins er
Þorgerður Ingólfsdóttir. Kórinn
hélt tónleika í Reykholtskirkju
2005 en hann heimsótti Reykholt í
fyrsta sinn árið 1970. Kórinn hefur
áður heimsótt Borgarnes (1977,
1984 og 1991). Fararstjóri í ferð
kórsins um Borgarfjörð er rektor
Menntaskólans við Hamrahlíð,
Lárus H. Bjarnason.
mm
Tveir af ástsælustu
tónlistarmönnum þjóðarinnar,
KK og Maggi Eiríks, skemmta
á tveimur stöðum vestanlands í
næstu viku. Þeir verða í Logalandi
föstudagskvöldið 23. apríl og í
Grundarfirði kvöldið eftir.
Tónleikar KK og Magga hafa
löngum þótt sérstök upplifun.
Skotið er litlum sögum inn á milli
laga sem oft vekja kátínu og gleði
og skapa afslappað andrúmsloft
milli áheyrenda og listamannanna.
Tónleikarnir hefjast klukkan 22 og
er miðasalan við innganginn. Miða
í Logaland er einnig hægt að panta
í forsölu hjá brennistadir@emax.
is og í síma 696 1544. Forsala í
Grundarfirði er hjá k59@simnet.is
og í síma 846­4828.
(fréttatilkynning)
Borgarnesi 12. apríl 2010.
Hæ unga fólk!
Mig langar að senda ykkur
nokkrar línur. Tilefnið er að 30.
júlí ­ 1. ágúst næstkomandi verður
haldið 13. Unglingalandsmót UMFÍ
hér í Borgarnesi. Þetta er einstakt
tækifæri fyrir okkur og mikill
heiður að við skulum fá tækifæri
til að halda þetta mót. Í fyrra voru
um 1500 keppendur og yfir 10.000
gestir á Unglingalandsmótinu,
vinsældir mótsins stigvaxa ár frá ári
og er engin ástæða til að efast um
að enn eigi þetta mót eftir að vaxa
og dafna.
Mörg ykkar þekkja ULM af eigin
reynslu og hafið farið á eitt eða
fleiri mót, þið hin kynnist þessu nú
í fyrsta sinn.
Þær greinar sem keppt verður
í eru: Dans, frjálsíþróttir, glíma,
golf, hestaíþróttir, knattspyrna,
körfubolti, motorcross, skák og
sund. Auk þess verður fjölbreytt
dagskrá fyrir þau ykkar sem ekki
hafið áhuga á hefðbundnum
keppnisgreinum. Smiðjur,
hljómsveitir, flugeldasýning,
rathlaup og margt, margt fleira.
Þarna getið þið komið sterk inn.
Ein af ástæðum þess að ég er að
skrifa þetta bréf til ykkar er að ég veit
að mörg ykkar eruð með frábærar
hugmyndir að dagskrárliðum
þessa helgi. Ég skora á ykkur að
senda annaðhvort mér eða UMSB
bréf og koma með ábendingu
um unglingahljómsveitir, söng,
sýningargreinar og hvað þið viljið
að verði gert í smiðjunum! Ég lofa
ykkur að ég skoða allt. Kannski er
ekki hægt að framkvæma þær allar
en örugglega einhverjar.
Hlakka til að verja verslunar­
mannahelginni 2010 með ykkur!
Bless, bless,
Veronika G. Sigurvinsdóttir
veronika@menntaborg.is eða
umsb@umsb.is
Við landnám þakti
gróður landið allt að
þremur fjórðu hluta þess, þar af var
skógur um 40% af gróðurþekjunni.
Nú þekur gróður landið sem
nemur fjórðungi af stærð þess,
reyndar gatslitið, þar af skógur um
2%. Stærsta manngerða eyðimörk
í heimi. Landgræðslan hefur barist
við gróðureyðinguna í heila öld
og hefur tekist að bæta við einu til
tveimur prósentum, trúlega. Ein
af þeim landgræðsluplöntum sem
dugað hafa best er lúpínan. Þar
sem hún nemur land myndast mjög
frjósamur jarðvegur og þegar fram
líða stundir nema aðrar plöntur þar
land og lúpínan hörfar.
Þar sem fjárbeit er, þrífst ekki
lúpína, þar sem kindur eru sólgnar
í hana og éta hana upp til agna ef
hún stingur upp kollinum. Lúpínan
er því góð til beitar.
Nú hefur umhverfismálaráðherra,
flokkssystir frægs
lúpínuandstæðings, ákveðið að eyða
þessari frábæru plöntu með kjafti
og klóm. Jafnvel nota til þess eitur.
Og hvers vegna? Jú, hún endurgerir
rýra, gatslitna móa þar sem aðeins
lyng vex. Lyngið er jú ein af þremur
algengustu jurtum þessa lands
og vex helst í næringarsnauðum
jarðvegi þar sem aðrar tegundir
eiga erfitt uppdráttar. Það er sem
sagt lyngið sem hverfur í sumum
tilfellum og hvað með það?
Ég hefði nú frekar viljað sjá
ráðherrann huga að öðru í sveitum
landsins en að eyða gróðri, svo sem
eins og að banna lausagöngu búfjár
og koma því öllu í beitarhólf. Leyfa
engar undanþágur á sinubruna,
friða allt kjarr, fylla alla skurði sem
eru eins og skotgrafir um allt land
og banna þessar plastrúllubyggingar
sem eru eins og risavaxin æxli út
um allar grundir. Koma þeim í hús,
reisa veggi í kring, setja háar tyrfðar
moldarmanir eða gróðursetja í
kring. Þá væri það verðugt verkefni
fyrir hann að sjá til þess að láta
hreinsa ruslið af landinu oftar en
einu sinni á ári. Þvílík ruslakista
sem allt landið okkar er orðið.
Það eru reyndar fleiri plöntur
sem fara í taugarnar á þessum
svokölluðu „umhverfissinnum,“
nefnilega kjörvell, hvönn og ösp.
Allt jurtir sem vaxa vel hér á landi
og gætu hugsanlega grætt það upp.
Ekki má svo gleyma því að þær má
borða og nota í lyf allskonar og
síðast en ekki síst nýta asparviðinn.
Ég ætla ekki að hafa mikið fleiri
orð um þessa fáránlegu frétt, að
eyða eigi lúpínunni úr lífríkinu,
þeirri frábæru jurt sem bætt
getur jarðveginn og grætt upp
eyðimörkina okkar. Og það uppi
á hálendinu! Ég hélt að ekki veitti
nú af að græða einmitt upp þar, þar
sem mestallur gróður er fokinn,
ásamt moldinni, út í veður og vind.
Ég hélt líka að við hefðum eitthvað
þarfara með peningana og tímann
að gera, heldur en að eyða því sem
getur vaxið hér í eyðimörkinni.
En ég bið til Guðs, ef endilega á
að fara út í þennan dapra stríðsleik,
að nota ekki til þess eitur. Nýtið
lúpínuna heldur til beitar og
lyfjagerðar. Nýtið svo hinn holla
og góða kjörvel til manneldis.
Margrét Jónsdóttir, eftirlaunaþegi
Pennagrein
Pennagrein
Pennagrein
Sendibréf til
ungmenna 11 ­ 20 ára
í Borgarbyggð
Fleiri opinber störf
á Akranes
Lumar þú á frétt, áhugaverðu efni eða mynd?
Sendu okkur línu á: skessuhorn@skessuhorn.is
eða hringdu í síma 894 8998
Herferð gegn lúpínu
KK & Maggi Eiríks í Logalandi
og Grundarfirði
Kór Menntaskólans við Hamrahlíð
í tónleikaferð í Borgarfirði