Fréttatíminn - 09.10.2015, Blaðsíða 26

Gylfaflöt 7 112 Reykjavík 587 8700 krumma.is
LEIKFÖNGIN
FÆRÐU Í KRUMMA
KÍKTU Á VEFVERSLUN
KRUMMA.IS
Galið að vera
í einhverju
stresskasti
Nýr útgefandi tók við stjórnartaumum í bókaútgáfunni
Sölku þann 1. október. Dögg Hjaltalín heitir hún og
hefur lengi dreymt um að verða forleggjari. Hún gefur
út fjórar bækur í haust, tvær skáldsögur og tvær
barnabækur, og skrifar meira að segja eina þeirra sjálf.
É g hef lengi verið að velta því fyrir mér að fara út í bóka-útgáfu og í staðinn fyrir að
byrja smátt og koma með einn og
einn titil ákvað ég að kaupa Sölku,“
segir Dögg Hjaltalín spurð hvað
hafi orðið til þess að hún keypti
bókaútgáfuna Sölku á dögunum.
„Það er margt framundan og mikið
sem þarf að gera, en ég er bjartsýn
og hef fulla trú á að þetta gangi vel.“
Samningaviðræður milli Daggar
og Hildar Hermóðsdóttur, stofn-
anda og fyrrverandi eiganda Sölku,
hafa staðið yfir í nokkra mánuði að
sögn Daggar og hún fékk að hafa
hönd í bagga með það hvaða bækur
yrðu á útgáfulista haustsins. „Við
komum til með að gefa út fjórar
bækur fyrir jólin, allar eftir íslenska
höfunda, tvær skáldsögur og tvær
barnabækur,“ segir Dögg. „Skáld-
sögurnar eru eftir Iðunni Steins-
dóttur og Ingibjörgu Hjartardótt-
ur og barnabækurnar eru annars
vegar bók um það hvaða áhrif það
hefur á ung börn að eignast systk-
ini eftir unga konu sem aldrei hef-
ur áður gefið út bók og hins vegar
matreiðslubók fyrir börn eftir mig
sjálfa.“
Þannig að þú ætlar að halda
þig við þá stefnu Sölku að leggja
áherslu á útgáfu bóka eftir konur?
„Já, að einhverju leyti allavega. Það
er reyndar tilviljun að allar útgáfu-
bækur haustsins eru eftir konur,
þetta eru bara góðar og áhugaverð-
ar bækur sem hrifu mig. Skáldsög-
urnar eru báðar sagnfræðilegar,
fjalla um líf fólks á 19. og 20. öld og
eru svona nútíma Íslendingasögur.“
Lambapelsar næst á dagskrá
Dögg er viðskiptafræðingur að
mennt og hefur alltaf haft mikinn
áhuga á bókum, skrifaði m.a. mast-
ersritgerð sína um íslenska bókaút-
gáfu. Hún lætur þó engan veginn
þar við sitja og hefur fleiri járn í
eldinum. „Ég stofnaði mína eigin
bókabúð 2008, viðskiptabókabúð
sem rann svo inn í Mál og menn-
ingu. Þar var ég um tíma verslunar-
stjóri en hætti þar þegar búðin fór
á hausinn 2011 og hef síðan mest
verið að sinna eigin verkefnum. Hef
samt hoppað inn í ýmis störf, leysti
af sem upplýsingafulltrúi Íslands-
banka í eitt ár og var svo um tíma
markaðsstjóri Oz. Alltaf hef ég samt
verið að dunda við bókaútgáfu og
svo er ég með annað verkefni í gangi
sem eru íslenskir lambapelsar. Er í
samstarfi við hönnuð og saumakonu
sem hanna pelsana og sauma og
vonandi koma þeir á markað á næstu
vikum. Ég er óskaplega spennt fyrir
því verkefni og hlakka mikið til að
sjá hvernig það gengur.“
Fjórar hænur, fjórar bækur
Fjölskyldan, Dögg, eiginmaðurinn
og tvær dætur, býr á Bráðræðis-
holtinu í gömlu timburhúsi og fyrir
fimm árum tóku þau upp á því að fá
sér hænur sem þau hafa í garðinum.
Hvernig dettur fólki það í hug?
„Ég var mjög hugsi yfir því hvað
við vorum að henda miklu af mat-
arafgöngum og datt þá í hug að það
væri sniðugt að fá sér fjórar hænur
til að fóðra. Það hefur gengið mjög
vel og nú hendum við engum mat,
hænurnar fá alla afganga og við
fáum egg í staðinn, algjörlega sjálf-
bært.“
Það hefur mikið verið talað um
hvað það sé erfitt að reka lítil bóka-
forlög hér í skugga Forlagsins,
verður það ekki dálítið eins og að
vera með nokkrar hænur í sam-
keppni við stóru eggjaframleiðend-
urna? „Fjórar hænur og fjórar bæk-
ur? Held það sé nú ekki alveg það
sama. Ég skrifaði lokaritgerðina
mína í viðskiptafræði um bókaút-
gáfu hér og þekki þann bransa því
nokkuð vel. Ég held að ef maður
nær að halda kostnaðinum niðri þá
eigi þetta alveg að ganga. Þetta er
auðvitað hugsjónabransi, það fer
enginn út í þetta nema vegna áhuga
á að gefa út bækur, excel-skjölin eru
minna atriði. Auðvitað er nauðsyn-
legt að vera með góða titla og kunna
að markaðssetja þá. Það er höfuðat-
riði.“
Og þú hefur þennan brennandi
áhuga sem til þarf?
„Já, ég held það. Mér finnst þetta
mjög áhugaverður geiri og hef alltaf
lesið mikið þannig að með því að
sinna bókmenntum út frá viðskipta-
fræðinni er ég að sameina mín tvö
aðaláhugamál.“
Hluti af því að halda kostnaðinum
niðri felst í því að minnka yfirbygg-
ingu og sem stendur er Dögg sjálf
eini starfsmaður forlagsins. „Ég
ætla að byrja á því að gera þetta ein
og sjá svo til. En ég fæ starfsmann
á næsta ári og svo ætla ég að stofna
fagráð með fólki á öllum aldri af
báðum kynjum sem kemur saman
í janúar, fer yfir innsend handrit og
þýðingar og segir sitt álit á þeim. Ég
ætla mér alls ekki að vera einráð um
það hvaða bækur ég gef út.“
Nýtir námið úr Hússtjórnar-
skólanum
Þú ætlar ekki að láta þér nægja að
gefa út bækur, ein af jólabókunum
er eftir þig sjálfa, matreiðslubók fyr-
ir börn, ertu mikil áhugamanneskja
um matargerð? „Já, ég fór meira að
segja í Hússtjórnarskólann í Reykja-
vík á sínum tíma og tel mig vera al-
veg ágæta í eldhúsinu. Það eru samt
engar flóknar uppskriftir í þessari
bók, enda er hún hugsuð fyrir börn
frá 4-5 ára aldri. Þetta eru allt mjög
einfaldar uppskriftir, það eru bara
þrjú skref í hverri uppskrift og
aldrei meira en fimm hráefni. Þetta
er allt frá því að poppa popp og búa
til ávaxtaspjót og til þess að steikja
fisk, en allt miðað við það að börnin
geti gert þetta sjálf frá a-ö. Það þarf
auðvitað einhver að hjálpa þeim við
eldavélina en þau eiga að fá þá til-
finningu að þau séu sjálf við stjórn-
völinn, séu að elda.“
Hvernig kviknaði þessi hug-
mynd? „Yngri dóttir mín er fimm
ára og hún hefur gríðarlegan áhuga
á matreiðslubókum en allar upp-
skriftir í þeim eru alltof flóknar fyr-
ir hana þannig að ég ákvað bara að
gera eina sjálf. Í bókinni eru 18 upp-
skriftir og ég er búin að vera með 18
mismunandi krakka í að elda og hef
tekið myndir af öllum skrefunum í
hverri uppskrift svo þetta er búin
að vera heilmikil vinna. Ég bjó allar
uppskriftirnar til sjálf og þetta er
bara eðlilegur heimilismatur í holl-
ari kantinum.“
Sallaróleg ennþá
Fyrstu bækur Sölku á þessu hausti
eru væntanlegar í lok október en
Dögg segist ekki finna neitt fyrir
stressinu sem bókaútgefendur
kvarta gjarna yfir á þessum árs-
tíma. „Það hjálpar ekki neitt. Bók-
salan fer ekki í gang að neinu ráði
fyrr en í desember og mest selst
af bókum síðustu helgina fyrir jól
þannig að það er ansi galið að vera
í einhverju stresskasti frá því í lok
ágúst út af því hvað muni seljast og
hvað ekki. Ég er allavega sallaróleg
yfir þessu ennþá en þú getur próf-
að að tala aftur við mig um miðjan
desember og þá verður kannski allt
annað uppi á teningnum.“
Friðrika Benónýsdóttir
fridrika@frettatiminn.is
Þessa dagana er Dögg önnum kafinn við að flytja lager Sölku í nýtt húsnæði. Mynd/Hari
26 viðtal Helgin 9.-11. október 2015