Húnavaka - 01.05.2010, Side 54

H Ú N A V A K A 52
Miklir annatímar
Svo hófst sláttur. Einn morguninn í lok júní í góðu veðri lýsti Stebbi því yfir að
nú hæfist sláttur. Hann spennti Mósa og Rauð fyrir sláttuvélina og var
auðsjáanlega spenntur yfir hvernig þeir gengju saman. Svo keyrði hann
nokkra hringi í kringum blettinn sem hann ætlaði að slá og svo skall
sláttugreiðan í grasið og sláttuvélin byrjaði að slá. Rauður stoppaði um leið.
Mósi beið þolinmóður eftir hvað koma skyldi. Rauður hreyfði sig ekki, sama
hvað Stebbi gerði en svo lagði bara Mósi af stað og dró bæði sláttuvélina og
Rauð og Rauður varð nauðugur viljugur að fylgja með. Hann gat ekki staðið
á móti jötunkröftum Mósa.
Þegar búið var að slá stykkið kom Stebbi keyrandi heim að bænum á
sláttuvélinni og hann ljómaði eins og sól af hreinni gleði yfir að svo vel gekk.
Auðséð var að stórt skref var stigið í rétta átt í heyskapnum.
Nú hófust miklir annatímar frá því snemma morguns og þar til seint á
kvöldin. Farið var á fætur fyrir klukkan sjö og varla farið í rúmið fyrr en eftir
klukkan tíu á kvöldin og jafnvel ekki fyrr en eftir miðnætti, alla daga, jafnt
sunnudaga sem aðra daga.
Seinna um daginn sló Stebbi stærri skika af suðurtúninu og var ég í að raka
frá þar sem þurfti. Þurrkur var góður og fljótlega var byrjað að snúa heyinu
með hrífum. Bogga var forkur í að snúa og raka. Heyið þornaði fljótt og var
þá rakstrarvélin sótt og Mósi spenntur fyrir. Leit út sem Mósa líkaði ekki að
draga rakstrarvélina. Þegar heyinu var sleppt lyftist greiðan með miklum
smelli sem hálffældi Mósa. Heyið var dregið saman í stóra garða með
rakstrarvélinni og svo voru búnar til fínar sátur úr heyinu. Túnið var fínrakað
með hrífum svo ekkert strá varð eftir.
Þegar búið var að búa til sáturnar var strigi settur yfir þær. Oft gat verið
komið langt fram á nótt áður en búið var að ganga frá sátunum. Slæmt var ef
byrjaði að rigna á meðan verið var að sæta heyið. Varð þá að dreifa því út aftur
og þurrka það á ný.
Þegar við vorum búnir að slá allt suðurtúnið fór Stebbi að huga að því að
taka heyið heim í tóftirnar. Við fórum nú og litum á tóftirnar. Þær þörfnuðust
talsverðs viðhalds sem stal tíma frá heyskapnum. Stebbi setti upp staur mikinn
sem hann hafði fundið á reka á Ströndum með Benna sterka um veturinn. Efst
í staurinn setti hann talíu og svert reipi í gegnum sem náði alla leið upp fyrir
tóftirnar. Því næst var reipi slegið utan um sáturnar og Mósi látinn draga þær
heim að tóft. Þar var endanum á reipinu úr talíunni húkkað í reipið og
sáturnar svo dregnar upp í tóftina. Gekk þetta bara vel en mikinn tíma tók að
troða og raða heyinu vel í tóftina svo hægt væri að tyrfa yfir.