Lögmannablaðið - 01.03.2009, Blaðsíða 24

24 < LÖGMANNABLAÐIÐ – 4 / 2008
Hekla og sambandið við
almættið
Um 40 lögmenn og fylgifiskar þeirra
hyggjast arka upp á Heklutind þann 13.
júní næstkomandi. Að því loknu verður
farið á Heklusýningu, snæddur léttur
hádegisverður og endað í heita
pottinum á Leirubakka í Landsveit.
Búið er að panta bongóblíðu og
goslausan dag þarna uppi við dyr
helvítis. Reynir nú á hvernig sambandið
er við almættið. Þeir sem hafa áhuga á
að slást í hópinn geta lesið nánar um
tilhögun ferðarinnar á heimasíðu
LMFÍ.
Sakamál og örnámskeið
Námskeið vorannar hófust um miðjan
janúar með fyrsta hluta námskeiðs
Eiríks Tómassonar, prófessors: „Ný lög
um meðferð sakamála“. 40 manns sóttu
námskeiðið sem var í fjórum hlutum og
stóð í alls ellefu klukkustundir. Einnig
hafa verið haldin námskeiðin: „Kaup
og sala fyrirtækja“ sem Ragnheiður
Margrét Ólafsdóttir hrl., kenndi,
„Lestur og greining ársreikninga“ sem
Árni Tómasson, löggiltur endur­
skoðandi, kenndi og „Sushigerð“ sem
Snorri Birgir Snorrason, kokkur, kenndi
en öll voru þau vel sótt. Gerð var
könnun á áhuga félagsmanna á
örnámskeiði í Power Point og eru allar
líkur á því að slíkt námskeið verði
haldið fljótlega.
Kerra, plógur, hestur
Félagsdeild bauð einnig upp á námskeið
í samskiptum lögmanna og skjól­
stæðinga undir heitinu: „Viðskiptavinir
undir álagi“ en því miður reyndist ekki
áhugi á því meðal lögmanna. Öðru
hvoru hefur verið reynt að bjóða upp á
námskeið sem eiga að efla hæfni
lögmanna til mannlegra samskipta eða
til að hjálpa þeim að takast á við erfið
mál skjólstæðinga. Lítill sem enginn
áhugi hefur reynst á slíkum námskeið­
um og er það umhugsunarefni hvað
veldur. Lögmenn aðstoða skjólstæðinga
sína oft á erfiðustu augnablikum lífs
þeirra. Það eiga þeir sameiginlegt með
prestum og heilbrigðisstarfsfólki nema
að sálgæsla fyrir lögmenn er engin. Ég
auglýsi hér með eftir tillögum að
námskeiðum sem gætu höfðað til
lögmanna því það er óþarfi að vera eins
og „Baslhagmennið“ sem Stephan G.
Stephans sonar orti um forðum:
Löngum var ég læknir minn
lögfræðingur, prestur
smiður, kóngur, kennarinn
kerra, plógur, hestur.
Halló Akureyri
Í samstarfi við símenntun Háskólans á
Akureyri bauð félagsdeild upp á tvö
námskeið fyrir norðan. Því fyrra „Kaup
og sala fyrirtækja“ var aflýst vegna
lélegrar þátttöku en það síðara „Lestur
og greining ársreikninga“ með
Hólmgrími Bjarnasyni, endurskoðanda
hjá Deloitte verður í apríl.
LÖGMANNALISTINN
Um þessar mundir stendur yfir átak til
að minna lögmenn á gagnsemi
LÖGMANNALISTANS á heimasíðu
LMFÍ. Lögmenn geta skráð sig á tíu
sérsvið en undir hverju þeirra eru
nokkrir málaflokkar. Það kostar
einungis 1600 krónur að skrá sig á hvert
sérsvið á ári en félagsmenn félagsdeildar
fá 25% afslátt.
Auglýsingar á Miðlaranum
Miðlarinn er upplýsingatorg fyrir
lögmenn þar sem þeim gefst kostur á
að auglýsa skrifstofuhúsnæði og störf.
Ekkert gjald er tekið fyrir þjónustuna
enn sem komið er. Nú er auglýst eftir
fulltrúa á Miðlaranum sem og skrif­
stofuhúsnæði til leigu. Nánari upplýs­
ingar á www.lmfi.is – Fyrir lögmenn –
Miðlarinn.
Fréttir frá félagsdeild
Eyrún Ingadóttir
Hekla og hestur