Skólavarðan - 01.04.2005, Blaðsíða 19

SKÓLAVARÐAN 3.TBL. 5. ÁRG. 2005
sinni. Enginn þarf að vera fullkominn.
Þetta gerir að verkum að öll samskipti
verða auðveldari en ella.
Við leitumst við að virkja börnin og
sýna þeim hvers þau eru megnug. Til þess
notum við hvað-, hvernig- og hvers vegna-
spurningarnar. Við göngum út frá þessu í
öllu starfinu; tónlist, myndlist, málörvun
og hreyfingu. Hér gilda m.ö.o. vinnubrögð
lýðræðis. Allir mega hafa skoðun og allir
eiga að leggja eitthvað til málanna og svo
ákveður hópurinn hvaða leið skuli valin.
Við erum auðvitað með ramma kringum
starfið en börnin raða inn í rammann,“
sagði Sólveig.
Flugvélar og bútasaumur
Sólveig og Jenný sögðu að hóparnir
ynnu oft með ákveðið þema í lengri eða
skemmri tíma. “Einn er til dæmis með
þemað flugvélar síðan í haust og er það
í sífelldri þróun. Börnin eru leidd áfram
með spurningum um þemað og þannig
er vilji þeirra sjálfra settur á oddinn. Þau
eru spurð hvort hægt sé að búa til lag um
flugvélar og það er nú ekki vandamál,
það er líka hægt að leika þær, teikna og
smíða. Flugvélin hefur
orðið börnunum mjög
hugleikið verkefni. Þau
hafa skoðað í þaula
hvernig flugvélar líta út
og séð að það eru stafir
á þeim. Þau hafa nú
smíðað sína eigin flugvél
og eru afar stolt af henni.
Mikla lukku gerði það
þegar þau fengu svo að
fara í vettvangsferð út á
flugvöll.
Ein af konunum hér
kom með efnisbúta
og börnin fengu það
verkefni að búa eitthvað
til úr þeim. Ekki vantaði hugmyndirnar.
Það væri hægt að búa til teppi eða kjól og
það varð úr. Þau saumuðu kjól og notuðu
meira að segja saumavél við það. En þau
saumuðu líka risastórt bútasaumsteppi.
Börn hafa ótrúlegt hugmyndaflug og
eru afar sveigjanleg. Þau laga sig að
aðstæðum og umhverfi eftir þörfum og
þá beinist hugur þeirra í eina markvissa
átt, til dæmis þegar þau eru í tónlistartíma
hjá Jenný þá er tónlistin ríkjandi. Þá vilja
þau ekki einu sinni tala um flugvélina eða
saumaskapinn.“
G-lykill er mikil krúsindúlla
Tónlistin er aðalatriði hér í Fögrubrekku en
myndlist og hreyfing eru sterkir þættir líka.
Kennsla Jennýar, sem fer fram í smáhýsi
á skólalóðinni, byggist á mjög öruggum
spuna. Hún grípur á lofti atriði sem verða
til í samræðum milli hennar og barnanna
og vinnur með þau á fræðandi hátt með
leiðandi spurningum. Landamæri milli
greina eru virt að vettugi og samræður
um grænmeti og ávexti snerta margar
fræðilegar hliðar eins og liti, tölur og
bókstafi, form og lögun, nótnatákn, dýra-
tegundir og íslenskan orðaforða.
„Það er í raun mjög flókið að vera
Reggio-kennari,“ sagði Jenný. „Maður
þarf að geta stokkið inn í aðstæðurnar og
spunnið út frá þeim. Ég var kannski búin að
ákveða eitthvað voða sniðugt en það fékk
svo engan hljómgrunn hjá börnunum. Ég
er steinhætt þessu. Ég vinn tímana eftir á
og byrja kennslustundina á því að rifja upp
hvað við gerðum síðast. Núna rifjuðum við
upp orðið lykill og þá komu upp orð eins
og skiptilykill og fleira.“
Erla samstarfskona Jennýar sótti
möppur barnanna og þar var til dæmis
mynd af g-lykli frá því síðast. Í framhaldi
af þessu fór mikið verkefni í gang sem
fólst í því að teikna nótnatáknið. Börnin
fengu stór blöð sem lögð voru á gólfið og
fyrsta vers var að búa til fimm línur. Síðan
var rifjað upp hvernig farið var að því að
skrifa g-lykil og Jenný gaf forskrift. Síðan
reyndu börnin að herma eftir. Um leið
sagði Jenný að þegar tónlistarmenn væru
komnir með g-lykil á línurnar sínar þá fyrst
væri hægt að skrifa ta-tí-tí-nótur. Þau
virtust alveg með á nótunum. Það reyndist
vera mikill vandi að teikna g-lykilinn og
ýmsar útgáfur hans voru býsna frumlegar
enda er g-lykill flókin krúsindúlla.
Sólveig var spurð að því hvort þær
hefðu fylgst með frekara tónlistarnámi
barnanna sem lokið hefðu námi í Fögru-
brekku. „Við vitum dæmi þess að börn,
sem hafa verið hér hjá okkur, hafa stokkið
yfir forskóla tónlistarskóla og farið beint
í hljóðfæranám. Nú í vor útskrifast frá
okkur 18 börn og það er fyrsti hópurinn
sem sem hefur verið í tónlistarnámi frá
tveggja ára aldri. Þau spila öll á flautu og
hafa lært nokkrar nótur.“
Enn sem komið er hafa þær Fögru-
brekkukonur ekki haldið námskeið eða
kennt öðrum að vinna eftir aðferðum
sínum en þær hafa miklu að miðla þeim
sem hafa hug á að vinna markvisst með
listir, en eins og stendur á heimasíðu
Fögrubrekku taldi Platón að iðkun lista
væri undirstaða allrar menntunar.
Guðlaug Guðmundsdóttir
Ljósmyndir Skólavarðan
Úllen dúllen doff,
kikkelane koff, koff, koff.
Hrafnhildur Irma, hvar ert þú?
Hér er ég.
Hvert er uppáhaldsgrænmetið
þitt?
Hrafnhildur Irma: Gúrka, kring-
lótt gúrka.
Strákur: Gúrkur eru ekki kring-
lóttar!
Stelpa: Jú, þegar búið er að
skera þær.
Jenný: Hver vill vera næstur og
teikna g-lykil?
Strákur: Ég. -Ég ætla að gera
krass!
Jenný: Erum við að æfa það?
Allir: Nei!
Stelpa: Þú átt að gera g-lykil.
Úllen dúllen doff, kikkelane koff, koff, koff.
Rúnar, hvar ert þú?
Hér er ég.
Hvert er uppáhaldsgrænmetið þitt?
Rúnar: Vínber.
Jenný: Er vínber grænmeti?
Strákur: Nei, það er ávöxtur.
Bubbi byggir-hópurinn lék lag á flautur
og ásláttarhljóðfæri á fagnaðarfundi.
19