Skólavarðan - 01.04.2005, Blaðsíða 26

26
SKÓLAVARÐAN 3.TBL. 5. ÁRG. 2005
Comeniusar-áætlunin er hluti af
Evrópuáætluninni Sókratesi og lýtur
að leik-, grunn- og framhaldsskólum.
Markmið hennar er að styrkja samstarf
milli evrópskra skóla með því að
auka þekkingu á menningu og tungu
Evrópuþjóða. Skilyrði er að a.m.k. þrír skólar í þremur löndum
vinni saman að verkefninu. Margir íslenskir skólar á öllum þessum
skólastigum eru þegar í blómlegu samstarfi innan Comeniusar-
áætlunarinnar. Flestir kennaranna hafa farið utan stundum með
nemendur og hitt samstarfsaðila sína í öðrum Evrópulöndum.
Þátttakendur í könnuninni „Pro Teachers“ og nokkrir áhugamenn um
Sókrates/Comeniusar-verkefni komu saman á fund fyrir stuttu þar sem
kynnt voru Comeniusar-verkefni sem íslenskir kennarar og nemendur
þeirra hafa tekið þátt í undanfarin ár. Nokkrir kennarar héldu stutta
framsögu um sín verkefni, gerðu grein fyrir út á hvað þau gengju og
hvernig þau hefðu tekist. Þá fóru fram umræður og leitast var við að
svara þeirri spurningu hver væri helsti ávinningurinn af því að taka þátt
í samþjóðlegum verkefnum. Verkefnin sem unnin hafa verið eru afar
margbreytileg og það var samdóma álit þeirra sem til þekkja að vinna
af þessu tagi sé afar gefandi og dýrmæt fyrir nemendur og kennara.
Á fundinum voru dregin út nöfn þriggja kennara sem munu sækja
ráðstefnu sem haldin verður í Lissabon 20. maí nk. og kynna niðurstöður
verkefna sinna þar. Þeir eru: Friðbjörn Holm í Öskjuhlíðarskóla, Oddný
Yngvadóttir í Hlíðaskóla og Kristín Runólfsdóttir í Fjölbrautaskóla
Suðurlands.
Í næstu Skólavörðu verður frekari umfjöllun um Comeniusar-
samstarfið.
Sjá nánar www.ask.hi.is
Comeniusar-verkefni kynnt í Lissabon í maí