Skólavarðan - 15.10.2002, Side 2

Nú eru einungis rúmir sex mánuðir þar til kosið verður til alþingis.
Skólamál og framtíð skólakerfisins eru meðal mikilvægustu mála sem
kosið verður um í vor.
Meðal annars verður kosið um það hve miklu fé eigi að verja til skóla-
mála. Þó að einungis framhaldsskóla- og háskólastig séu alfarið á ábyrgð
og kostnað ríkisins skiptir ekki síður miklu máli fyrir leik-, grunn- og
tónlistarskólastig hvernig alþingi er skipað. Framtíð þessara skólastiga er
háð pólitískum vilja og skilningi alþingis ekki síður en sveitarfélaga.
Kennarasamband Íslands gagnrýndi á sínum tíma harðlega hve lítið
fjármagn fylgdi flutningi grunnskólans frá ríki til sveitarfélaga. Sú gagn-
rýni á enn fullan rétt á sér. Ég tel það vera eitt af brýnustu verkefnum á
næstu árum að stórauka fjárframlög til framhalds- og háskóla ásamt því
að breyta skiptingu skatttekna frá því sem nú er þannig að sveitarfélögin
fái meira í sinn hlut. Það hlýtur að teljast óeðlilegt að sveitarfélögin í
landinu séu rekin með halla en ríkissjóður skili hagnaði ár eftir ár. Ýmsir
ráðherrar segja reyndar að þetta stafi af óráðsíu í fjármálastjórn sveitar-
félaga og beina þá oft spjótum sínum að stjórnendum Reykjavíkurborgar.
Hið rétta er auðvitað að sveitarfélögin í landinu eru jafnmisjöfn og þau
eru mörg og þeim er stjórnað af einstaklingum sem tilheyra mismunandi
stjórnmálaflokkum. Ekki má heldur gleyma því að þingmenn eru íbúar
hver í sínu sveitarfélagi og eru oft virkir þátttakendur í sveitarstjórn áður
en þeir setjast á þing og í sumum tilfellum jafnhliða þingsetu.
Mér finnst það vera frumskylda þeirra sem hyggjast bjóða sig fram til
alþingis að upplýsa um stefnu sína í skólamálum eins og öðrum málum
og hvort þeir séu fylgjandi því að samfélagið verji meira fjármagni til
skólamála en nú er gert. Sveitarfélögin hafa mörg hver ekki efni á að
ráðstafa meiru til skólanna en nú er gert nema til komi auknar tekjur. Til
að standast alþjóðlega samkeppni á komandi árum verðum við að vera
tilbúin að leggja meira fjármagn í menntun og það verður ekki gert nema
með tilstuðlan alþingis.
Í aðdraganda kosninga er eðlilegt að spyrja þingmannsefni áleitinna
spurninga um þessi mál og ganga eftir efndum að loknum kosningum og
stjórnarmyndun. Það er aðeins eitt sem er öruggt að gerist í framhaldi
kosninga og það er að einhverjir 63 einstaklingar af framboðslistum
flokkanna setjast á þing og úr þeim hópi verður næsta ríkisstjórn til. Það
er ekki óeðlileg krafa að þeir sem sækjast eftir þessum sætum upplýsi
okkur hin um stefnumál sín og loforð svo að við getum krafið þá um
efndir eftir kosningar.
Eiríkur Jónsson
Formannspist i l l
3
Fjármögnun skólakerfisins