Feykir - 20.08.2015, Blaðsíða 2
2 31/2015
Á þessum árstíma, þegar sumarfrí eru að renna sitt skeið á enda,
skólakrakkar að koma til náms á ný, heyskapur að klárast og berin
orðin þroskuð, hallast maður iðulega að því að nú sé sumarið
búið. Útilegudótinu er pakkað í
bílskúra og geymslur, misslitinn
sumarfatnaður færður í efri skápa
og skóladótið tekið fram á ný.
Þessum árstíma fylgir líka að taka
fram kertaljós, elda heitar og
matarmiklar súpur og huga að
haustverkunum framundan. Því
það styttist jú í að þurfi að sækja fé á
fjall og safna matarforða til
vetrarins.
Það kann einhverjum að þykja það fullsnemmt að blása „sumarið
sem aldrei kom“ af upp úr miðjum ágúst. En einhvern veginn er það
svo í hugum flestra hér á fróni að þegar verslunarmannahelgin er
liðin, já og kannski næstu tvær helgar á eftir, sem eru talsvert
annasamar, þá er sumarið á enda.
Þá tekur við að svarið við spurningunni sem erlendir ferðamenn
hafa stundum spurt mig í sumar: „Hvað gerið þið á veturna?“ Nú er
kannski rétti tíminn til að hugleiða hvernig maður ætlar að verja
tómstundum sínum þegar allt kemst smám saman í sína daglegu
rútínu eða hinar einu sönnu föstu skorður.
Er kannski kominn tími til að hafa sig upp úr hjólfarinu, já eða
bara sófanum, og finna sér nýtt tómstundagaman? Skella sér í
leikfélag? Syngja í kór eða taka þátt í sjálfboðaliðastarfi? Leggja stund
á einhverja hreyfingu eða finna sér nýja söfnunaráráttu? Lesa góða
bók eða hlusta á tónlist?
Hvað sem verða kann fyrir valinu finnst mér haustið alltaf dálítið
notalegur og rómantískur tími. Fátt er fallegra en kyrrlátt haustkvöld
og litbrigðin sem haustinu fylgja. Í mínum huga markar haustið
alltaf nýtt upphaf, ekki síður en vorið.
Að vísu eru hálka og óveður ekkert sérstakt tilhlökkunarefni,
sérstaklega ekki eftir sumar sem vafamál er hvort borið hafi upp á
helgi eða virkan dag þetta árið, en engu síður gerist svo margt
skemmtilegt á veturna.
Sjálf er ég þeirrar gerðar að ég man varla eftir að hafa látið mér
leiðast hin síðari ár. Og hafi það hent að mér leiddist dagpart annað
veifið þegar ég var krakki, þá hef ég eflaust haft afar gott af því.
Ef ekkert annað rekur á fjörur manns þennan veturinn þá er
upplagt að ráðast á pokann með ókláruðu handavinnunni, staflann
af ólesnu bókunum eða albúmin með óflokkuðu myndunum. Eftir
það held ég að ekki verði verkefnaskortur, hvorki heima, í vinnunni
eða félagslífinu.
Kristín Sigurrós Einarsdóttir
blaðamaður
Útgefandi: Nýprent ehf., Borgarflöt 1, Sauðárkróki
Póstfang Feykis: Borgarflöt 1, 550 Sauðárkrókur
Ritstjóri & ábyrgðarmaður:
Berglind Þorsteinsdóttir – berglind@feykir.is & 455 7176, 694 9199
Blaðamenn:
Kristín Sigurrós Einarsdóttir – kristin@feykir.is & 867 3164
Óli Arnar Brynjarsson – oli@feykir.is Þóra Kristín Þórarinsdóttir – thora@nyprent.is
Áskriftarverð: 530 kr. hvert tölublað með vsk. Lausasöluverð: 650 kr. með vsk.
Áskrift og dreifing: Nýprent ehf. Sími 455 7171. Umbrot og prentun: Nýprent ehf.
Óháð fréttablað á Norðurlandi vestra - alltaf á fimmtudögum
LEIÐARI
Sumri tekið að halla
Fögnuður við sundlaugina
Bjartasta
vonin
Feykir og Skotta kvik-
myndafjelag kalla eftir
ábendingum
Í samvinnu við Skottu
kvikmyndafjelag auglýsir
Feykir eftir ábendingum um
frumkvöðla í atvinnulífi á
Norðurlandi vestra til
umfjöllunar í þáttum sem
hefja göngu sína í haust.
Sérstök áhersla verður
lögð á frumkvöðla og
fyrirtæki sem skapa ný og
áhugaverð störf fyrir ungt
fólk og konur í lands-
hlutanum. Þættirnir verða
sendir út á netinu. Ábend-
ingar berist til ritstjórnar. /BÞ
Hauststarfið
komið á fullt
Farskólinn á NLV
Starfsfólk Farskólans er nú
komið til starfa eftir sumar-
frí. Skipulag haustannar er
í fullum gangi og námsvísir
í smíðum.
Næsta ár verður áhersla
lögð á heimsóknir í fyrirtæki
og stofnanir, starfstengd
námskeið og raunfærnimat,
eins og fram kemur í frétt á
vef Farskólans. Enn er tími
til að senda hugmyndir á
Farskólann varðandi nám-
skeið þetta skólaár. Hægt er
að hafa samband við Far-
skólann í 455 6010. /KSE
„Hefur gengið heldur hægt“
Heyskapur í Húnaþingi
Heyskapur í Húnaþingi og á
Ströndum hefur gengið heldur
hægt, að sögn Önnu Margrét-
ar Jónsdóttur, ráðunautar hjá
RML á Blönduósi. „Þurrkar og
kuldi hömluðu sprettu framan
af svo heyskapur hófst seinna
en vant er. Vel gekk þó að
heyja í júlímánuði og náðu
menn þá vel verkuðum heyjum
og flestir kúabændur luku
fyrri slætti,“ sagði Anna
Margrét í samtali við Feyki.
Sauðfjárbændur sem þurftu
vegna kaldrar tíðar í vor að beita
sín tún lengur en oft áður biðu
margir eftir meiri sprettu og áttu
því talsvert eftir af fyrri slætti í
byrjun ágústmánaðar, að sögn
Önnu Margrétar.
„Ég held að í Húnaþingi
vestra heyskapur hafi víðast
gengið þokkalega framan af og
fyrri sláttur ætti að hafa náðst vel
verkaður en spretta hins vegar
víða lítil eða mjög lítil vegna
kuldatíðar og þurrka,“ sagði
Sigríður Ólafsdóttir ráðunautur
hjá RML á Hvammstanga þegar
Feykir hafði samband við hana í
vikunni. „Núna í ágúst hefur
verið votara og hlýrra sem er
gott fyrir sprettu en hefur hins
vegar aðeins verið að trufla
menn við að ná heyjum,“ sagði
Sigríður ennfremur. /KSE
Sumarslátrun
Sláturhús KVH á
Hvammstanga
Sumarslátrun hófst í
sláturhúsi KVH í byrjun
vikunnar. Hátt í sjö hundruð
lömbum var slátrað fyrsta
daginn, eins og haft var eftir
Magnúsi Frey Jónssyni,
framkvæmdastjóra
sláturhúss KVH í frétt á
Ríkisútvarpinu. Jafnframt
hófst slátrun viku fyrr á
síðasta ári.
Meðalþungi dagsins var
14,3 kg sem er í samræmi við
væntingar og árstíma. Kjötið
af lömbunum sem slátrað
var á mánudag fer allt á
Ameríkumarkað og sagði
Magnús í samtali við RÚV að
eftirspurnin þar væri meiri
en hann gæti annað núna.
Hann gerði þó ráð fyrir að
slátra í heildina svipuðu
magni og í fyrra. /KSE
Miklir hagsmunir í húfi
Innflutningsbann Rússa
Rússar settu í síðustu viku
viðskiptabann á vörur frá
Íslandi og fjórum öðrum
löndum. Íslensk stjórnvöld
segjast harma þessa
ákvörðun Rússa í tilkynningu
sem þau sendu frá sér.
Samkvæmt upplýsingum
utanríkisráðuneytisins liggur
fyrir að íslenskar vörur verði
ekki tollafgreiddar og hætta
sé á að vörum verði fargað á
landamærunum.
„Þetta eru gríðarleg vonbrigði.
Við höfum leitað allra leita til að
útskýra afstöðu okkar fyrir
rússneskum stjórnvöldum og þá
hagsmuni sem undir eru,“ sagði
Gunnar Bragi Sveinsson utan-
ríkisráðherra. Í fréttatilkynn-
ingunni segir að ljóst sé að
bannið feli í sér að íslenskum
fyrirtækjum verði ekki lengur
unnt að markaðssetja sjávar-
afurðir í Rússlandi auk þess sem
bannið tekur til landbúnaðarvara
að frátöldu lambakjöti, ærkjöti,
hrossakjöti og niðursoðnu
fiskmeti í dósum.
„Ísland mun halda áfram því
samtali sem ráðherrar og
embættismenn hafa átt við
Rússa á síðustu vikum til að
draga úr áhrifum þessarar
ákvörðunar,“ segir loks í tilkynn-
ingu frá utanríkisráðuneytinu.
Unnið að því að
finna nýja markaði
„Þetta er töluvert áfall,“ sagði
Gylfi Guðjónsson útgerðastjóri
hjá FISK Seafood á Sauðárkróki.
Viðskiptabannið hefur mikil
áhrif á FISK Seafood, líkt og
önnur fyrirtæki sem starfa í
sjávarútvegi, en að sögn Gylfa
var gert ráð fyrir að selja drjúgan
hluta af makríl til Rússlands.
„Við erum að vinna í því að finna
nýja markaði en það tekur allt
tíma. Þetta er auðvitað mjög
slæmt, þetta eru miklir
hagsmunir,“ sagði Gylfi í samtali
við Feyki. /BÞ
Húnar á Hálendisvaktinni
Björgunarsveitirnar
Á sunnudaginn fór hópur frá
Björgunarsveitinni Húnum í
Húnaþingi vestra á svæði
norðan Vatnajökuls til að taka
þátt í Hálendisvaktinni.
Þátttaka Húna er orðin að
föstum lið í starfseminni en
þetta er tíunda árið í röð sem
hópur er sendur frá sveitinni í
Hálendisvaktina.
Með Húna í för eru félagar
úr Björgunarsveitinni Strönd á
Skagaströnd og tveir menn frá
systursamtökum Landsbjargar í
Wales. Hópurinn var varla
mættur á Hálendisvaktina er
fyrsta aðstoðarbeiðni barst. Um
var að ræða bilaðan rússn-eskan
eðalvagn. Framhjólin voru ekki
samstíga hvert skildi stefna eins
og fram kemur á fésbókarsíðu
Húna og sjá má á meðfylgjandi
mynd. /KSE
Lada Rússanna innskeif. MYND: HÚNAR