Morgunblaðið - 13.06.2018, Blaðsíða 4

4 FRÉTTIRInnlent
MORGUNBLAÐIÐ MIÐVIKUDAGUR 13. JÚNÍ 2018
MANDUCA
BURÐARPOKINN
Manduca burðarpokinn er hannaður með
það markmið að leiðarljósi að barn geti
viðhaldið M-stellingu fóta og mjaðma.
Borgartún 3, sími 847 1660, www.bambus.is, bambus@bambus.is
bambus.is bambus.is bambus.is
Opið mánudaga og fimmtudaga frá kl. 10-14
Jón Birgir Eiríksson
jbe@mbl.is
Um kvöldmatarleytið í gær náðist
samkomulag um að þingi yrði slitið í
gær og var þingið að störfum langt
fram á kvöld. Frumvarp um per-
sónuvernd og vinnslu persónuupp-
lýsinga var tekið á dagskrá um mitt
kvöld og málið tekið til annarrar um-
ræðu. Málið er viðamikið og hafa
tæplega 300 umsagnir borist frá fyr-
irtækjum, sveitarfélögum, stofnun-
um og öðrum hagsmunaaðilum.
Meðal annars var rafrettufrum-
varpið svonefnda samþykkt með 54
atkvæðum í gær, en í því eru tak-
markanir á leyfilegum styrkleika og
stærð áfyllinga fyrir rafrettur. Einn-
ig eru sett takmörk á notkun raf-
retta. Frumvarpið hefur sætt mikilli
gagnrýni og tók talsverðum breyt-
ingum í meðförum þingsins.
Þar að auki var samþykkt laga-
frumvarp til breytinga á lögum um
aðgerðir gegn peningaþvætti og
fjármögnum hryðjuverka, um sýnd-
arfé og stafræn veski. Þá var 69 ein-
staklingum veittur íslenskur ríkis-
borgararéttur samkvæmt hefð.
Sömdu við Miðflokkinn
Uppnám varð um þinglok sam-
kvæmt fyrra samkomulagi flokk-
anna við upphaf þingfundar klukkan
13:30 í gær, en tilefnið var frávís-
unartillaga efnahags- og viðskipta-
nefndar vegna frumvarps Miðflokks-
ins sem gerði ráð fyrir því að
húsnæðisliður í útreikningi vísitölu
neysluverðs yrði felldur á brott.
Lagði nefndin til að málinu yrði
vísað til úrvinnslu í starfshópi til fag-
legrar meðferðar samkvæmt þings-
ályktun sem samþykkt var einróma í
þinginu 8. maí sl. Töldu þingmenn
Miðflokksins að samkomulag flokk-
anna um þinglok hefði verið svikið
með frávísunartillögunni. „Nú sjáum
við svik á ný,“ sagði Sigmundur Dav-
íð Gunnlaugsson, formaður Mið-
flokksins, í ræðustól þingsins og
fékk, auk annarra þingmanna Mið-
flokksins, mikla gagnrýni frá þing-
mönnum ríkisstjórnarflokkanna.
Óli Björn Kárason, þingmaður
Sjálfstæðisflokks og formaður efna-
hags- og viðskiptanefndar, sagði að
frávísunartillagan hefði verið rök-
studd og rædd í nefndinni síðasta
föstudag. Miðflokkurinn hefði þann-
ig vitað af afstöðu meirihlutans í
fjóra daga, en ekkert aðhafst þá.
Um kvöldmatarleytið boðaði
Katrín Jakobsdóttir forsætisráð-
herra formenn flokkanna á sinn fund
í fundarherbergi forsætisnefndar og
náðist þar sátt um þinglokin. Fékk
Miðflokkurinn aftur inn á dagskrá
þingsályktunartillögu um óháða,
faglega staðarvalsgreiningu fyrir
nýtt þjóðarsjúkrarhús og ömuðust
hinir stjórnarandstöðuflokkarnir
ekki við því.
Samkomulag náðist
að nýju um þinglokin
 Alþingi samþykkti meðal annars frumvarp um rafrettur
Teitur Gissurarson
teitur@mbl.is
Nýlegar umsagnir Samtaka fjár-
málafyrirtækja (SFF) um frumvarp
til laga um persónuvernd og vinnslu
persónuupplýsinga snúa að mestu að
vinnslu persónuupplýsinga innan vá-
tryggingafélaga. Nokkur óvissa rík-
ir um áhrif hinna nýju persónu-
verndarlaga á starfsemi félaganna
en í umsögnum SFF er því lýst
hvernig aðgangur tryggingafélaga
að sjúkra- og lögregluskýrslum
verði mögulega skertur til muna.
Þá segir í umsögnunum að
vinnsla viðkvæmra persónuupplýs-
inga sé nauðsynlegur hluti af
áhættumati félaganna.
Óvissa um túlkun laganna
„Það sem við erum að benda á
er að þetta er ekki nægilega skýrt.
Það er vafi á um hvort þetta verði
talið heimilt,“ segir Vigdís Halldórs-
dóttir, lögfræðingur hjá SFF, spurð
út í aðgang tryggingafélaga að
heilsufarsupplýsingum um foreldra
og systkini vátryggingataka. Í um-
sögninni er bent á að heilsufars-
upplýsingar nánustu ættingja séu
mikilvægar grundvallarupplýsingar
til þess að áhættumat geti farið
fram. Áhættumat sé svo forsenda
ákvörðunar um hvort unnt sé að
veita vátryggingu eða ekki.
Vigdís segist þó ekkert geta
fullyrt um hvaða áhrif lögin muni
hafa á neytendur og tryggingafélög
verði þau samþykkt óbreytt en bæt-
ir þó við: „Ef þessu verður ekki
breytt munu tryggingafélögin lík-
lega þurfa að leita til Persónuvernd-
ar um hvernig þetta er túlkað.“
Hafa ekkert heyrt
Vigdís hefur ekki heyrt hvort
Allsherjar- og menntamálanefnd Al-
þingis ætli að taka athugasemdir
þeirra til greina en SFF sendi í mars
frá sér sameiginlega umsögn með
„Samtökunum“ (SA, SI, SF, SFF,
SVÞ, Samorku, Samtök fyrirtækja í
sjávarútvegi og SÍ). „Við höfum
raunverulega bara farið og hitt
nefndina út af þeirri umsögn. Það
var áður en umsóknartíminn leið hjá
en við höfum ekkert heyrt.“
Óvissa um mikil-
vægar upplýsingar
 Aðgangur tryggingafélaga að heilsufars-
upplýsingum ættingja gæti skerst til muna
Morgunblaðið/Styrmir Kári
Þingmenn Frumvarpið hefur feng-
ið hraða meðferð í fastanefndum.
hjá persónu-
verndarstofn-
unum innan ESB
veit hún til þess
að 100 ný mál
bárust þeirri
finnsku strax 25.
maí og um 1.300
ný mál höfðu bor-
ist þeirri írsku
tveimur vikum
eftir gildistöku
reglugerðarinnar.
„Við erum í algjöru hámarki af
málum nú þegar,“ segir Helga, en
málafjöldi er á leið með að fjórfald-
ast frá árinu 2002.
Áætlað er að fjölga starfsmönnum
Persónuverndar úr 12 í 25 á árunum
2019-2023. teitur@mbl.is
„Rétt tala í dag er 709,“ segir Helga
Þórisdóttir, forstjóri Persónuvernd-
ar, í samtali við Morgunblaðið um
opin og óafgreidd mál hjá stofnun-
inni og bætir við: „Þetta er í fyrsta
sinn í sögu Persónuverndar sem óaf-
greidd mál eru svona mörg.“
Á dögunum sendi Persónuvernd
frá sér umsögn um frumvarp til
nýrra persónuverndarlaga, en í um-
sögninni kemur meðal annars fram
að mála hafi fjölgað gríðarlega á síð-
ustu árum. Útlit er fyrir að þeim
muni fjölga enn frekar þegar nýja
persónuverndarlöggjöfin tekur gildi.
Evrópska persónuverndar-
reglugerðin sem nýju lögin eru
byggð á tók gildi innan ESB 25. maí.
Þrátt fyrir að Helga hafi ekki ná-
kvæmar tölur yfir aukningu mála
Óafgreidd mál í
sögulegu hámarki
Helga
Þórisdóttir
„Þessi aðgerð var nauðsynleg en hún
dugar ekki,“ segir Gylfi Arnbjörns-
son, forseti Alþýðusambands Íslands,
um þá ákvörðun Alþingis að leggja
kjararáð niður. Ráðið verður lagt nið-
ur 1. júlí og hefur Katrín Jakobsdóttir
forsætisráðherra sagt að hún vonist
til að þetta skapi aukna sátt á vinnu-
markaði um launaákvarðanir æðstu
embættismanna.
Gylfi segir að umdeildar ákvarðanir
kjararáðs frá 2016, þegar laun forseta
Íslands, þingmanna og ráðherra voru
hækkuð um mörg hundruð þúsund
krónur, standi enn og þær þurfi að
ganga til baka. „Það hefur verið og er
enn krafa okkar að þessar ákvarðanir
verði færðar niður. Það á sérstaklega
við um launahækkanir alþingis-
manna, ráðherra, skrifstofustjóra og
ráðuneytisstjóra. Þar stendur hnífur-
inn enn þá í kúnni. Við höfum ítrekað
komið þessum kröfum á framfæri við
ríkisstjórnir en á þessu hefur ekki
orðið nein breyting. Ef það er vilji
ráðamanna að það verði umræða um
kjarasamninga og launaþróun þarf að
taka þetta mein af borðinu.“
Undir þetta tekur Sólveig Anna
Jónsdóttir, formaður Eflingar: „Það
er jákvætt að kjararáð sé leyst upp,
það lýsir í það minnsta pólitískum
skilningi á því hversu miklu uppnámi
ákvarðanir þess hafa valdið meðal al-
mennings. Vandamálið er samt
óleyst. Þessar brjálæðislegu hækkan-
ir særðu réttlætiskennd fólks og þær
þurfa að ganga til baka.“
hdm@mbl.is
Jákvætt skref en hækkanir
frá 2016 þarf að leiðrétta
 Verkalýðsleiðtogar fagna því að kjararáð sé lagt niður
Gylfi
Arnbjörnsson
Sólveig Anna
Jónsdóttir
Bjarni Siguróli Jakobsson náði 9. sætinu í Evrópufor-
keppni Bocuse d’Or-matreiðslukeppninnar sem haldin
var í Tórínó í gær.
Bocuse d’Or er ein af virtustu matreiðslukeppnum
heims og eru þátttakendur meðal fremstu matreiðslu-
manna sinna landa. Keppnin er hörð og eru gerðar
miklar kröfur til keppenda. Bjarni Siguróli hafði 5 ½
klukkustund til þess að matreiða forrétt og kjötrétt
fyrir 20 dómara. Glæsilegur árangur Bjarna gefur hon-
um keppnisrétt í aðalkeppni Bocuse d’Or, sem haldin
verður í Lyon í Frakklandi 24.-25. janúar 2019. Þjálfari
Bjarna er Viktor Örn Andrésson, bronshafi og Bocuse
d’Or-keppandi 2017, og aðstoðarmaður er Ísak Þor-
steinsson.
AFP
Bjarni keppir til úrslita í Bocuse d’Or