Ljósmæðrablaðið - 01.07.2017, Side 8

8 Ljósmæðrablaðið - júlí 2017
Það voru 11 stjórnarfundir haldnir á þessu starfsári. Vinna við kjaramál
á þessu ári hefur aðallega snúist um að reyna að koma 1.65% hækkun
til útfærslu menntunarákvæðis inn í stofnanasamninga og endurskoða
þá eftir föngum. Þessi vinna hefur gengið hægt þar sem ekki er
samhljómur milli túlkunar LMFÍ og KMR (kjara- og mannauðssýslu
ríkisins) og stofnanir hafa verið tregar til að ljúka stofnanasamningum.
Þessari vinnu er þó lokið á fáeinum stöðum. Þegar þetta er skrifað er
beðið eftir dómi Héraðsdóms Reykjavíkur sem nú er að minnsta kosti
tveimur vikum seinna á ferð en búist var við.
Það er ánægjulegt að segja frá því að félagið hefur nú greitt upp
allar skuldir sínar vegna verkfalls 2015, miklu fyrr en áætlað var.
Þetta hefur komið til bæði vegna talsverðrar hagræðingar í rekstri
félagsins og einnig vegna þess að félagsgjöld eru nú innheimt af
heildarlaunum í stað grunnlauna áður.
Félagið hefur tekið þátt í NJF (Nordisk Jordmor Forbund) starfi
nú sem endranær. Síðasti stjórnarfundur NJF var í Gautaborg í
tengslum við ráðstefnu. LMFÍ átti nú í fyrsta sinn fulltrúa á fundi
EMA (European Midwives Association) sem haldinn var í Sofia í
Búlgaríu. Það var mjög upplýsandi og er það mat stjórnar að félagið
eigi fyllilega heima á þessum vettvangi. Það sem hefur strax komið út
úr þessu samstarfi er að félaginu bauðst að tilnefna fulltrúa í ritstjórn
(editorial board) nýs rafræns ljósmæðratímarits sem fer að líta dagsins
ljós. Félagið tilnefndi Helgu Gottfreðsdóttur prófessor og samþykkti
hún að taka að sér verkefnið. Einnig hefur hollenska ljósmæðrafélagið
(KNOV) lýst yfir áhuga á samstarfi við Ísland í „twinning“ verkefni.
Hollendingar bjóða fulltrúum félagsins til Hollands nú í apríl til að
ræða flöt á því og hvort það gæti hentað báðum löndum. Samstarf
við ICM (International Confederation of Midwives) hefur verið
með hefðbundnum hætti og sótti félagið fund Evrópudeildar ICM
sem haldinn var í Sofia í Búlgaríu í kjölfar EMA fundar. Félagið tók
einnig á móti hópi ljósmæðra og lækna frá Svíþjóð sem óskuðu eftir
að koma til að kynna sér skipulag mæðraverndar á Íslandi.
Ljósmæðradagar voru haldnir á Nauthóli í maí 2016 eins og hefð
er orðin fyrir. Fengum við að þessu sinni til okkar ýmsa fyrirlesara
auk erlendu gestanna Söru Wichham og Ank de Jonge. Sara Wickham
var einnig með heilsdagsvinnustofu. Góður rómur var gerður að
þessum dögum. Við fengum einnig aðra erlenda gesti sem töluðu við
ljósmæður, má þar nefna Billie Hunter sem ræddi um efnið Caring
for the carer, hin sænska Hjördís Högberg kom einnig og ræddi um
áfengisneyslu á meðgöngu og hvað væri til ráða. Einnig bryddaði
félagið uppá þeirri nýbreytni að bjóða í ljósmæðrakaffi annan
miðvikudag í mánuði. Þangað geta allar ljósmæður mætt og sýnt sig
og séð aðra. Engin formleg dagskrá er í ljósmæðrakaffinu heldur er
leyfilegt að ræða allt milli himins og jarðar.
Formaður fór og ræddi hugmyndir um víkkað starfssvið ljósmæðra
bæði við landlækni, forsvarsmenn heilsugæslunnar og ráðherra. Var
hugmyndunum vel tekið en lítið gerist í því að koma hugmyndum í
framkvæmd hjá hinu opinbera. Í þessu sambandi var einnig rætt um
lagabreytingar til að veita ljósmæðrum leyfi til að ávísa ákveðnum
flokkum lyfja. Landlæknir studdi þær hugmyndir og sagði það á
vefsíðu sinni. Ráðherra og velferðarnefnd hlustuðu á erindið en þar
sem frumvarpið að lagabreytingunni komst ekki að og búið er að
skipta um bæði ráðherra og velferðarnefnd þarf að ræða þetta allt að
nýju.
Á þessu ári komu tvö tölublöð út af Ljósmæðrablaðinu. Blaðið
er nú aðgengilegt á vefsíðu félagsins. Í sparnaðarskyni var Fylgjan
gefin út til tveggja ára fyrir ári síðan. Engin Fylgja var því gefin út
að þessu sinni. Ekki hefur verið tekin ákvörðun um hvort útgáfunni
verður hætt eða með hvaða hætti hún verður ef af verður.
Félagið hefur staðið fyrir tveimur nálastungunámskeiðum á árinu.
Leiðbeinandi var Guðlaug María Sigurðardóttir og hefur góður
rómur verið gerður að námskeiðunum. Félagið réðst einnig í að fá
danska fyrirtækið Gynzone til að koma hingað til lands og halda
masterclass í saumaskap. Mikil aðsókn hefur verið á þessi námskeið
og eru nú þegar þrjú fullbókuð námskeið í Reykjavík á döfinni og
að minnsta kosti eitt fullbókað og annað hálfbókað á Akureyri.
Smáforritið Ljósan – þegar von er á barni, er loksins í
burðarliðnum og kemur út nú alveg á næstunni. Forritið er ætlað
verðandi foreldrum og er gefið út í samvinnu við Sundhedsstyrelsen
í Danmörku og danska ljósmæðrafélagið.
Sem fyrr rekur félagið tvær vefsíður. Ljosmodir.is er mjög vel
sótt síða og fjöldi fyrirspurna berst þangað í hverjum mánuði. Síðan
er fjármögnuð með auglýsingum og hefur skilað okkur ágætum
tekjum frá því að rekstri hennar var umturnað. Ljosmaedrafelag.is
er ekki eins virk síða og stjórn hefði kosið. Það er á dagskrá að
reyna að koma henni í nútímalegra og gagnlegra horf og nota hana
meira.
Allmörg einstaklingsmál hafa borist inn á borð félagsins og hafa
þau verið mjög misjafnlega umfangsmikil og flókin. Vel hefur gengið
að leysa flest það sem á borð félagsins hefur komið. Félagið hefur nú
sem fyrr tekið þátt í öllu samstarfi sem verið hefur innan BHM á
árinu. Félagsmenn eru duglegir að nýta sjóði félagsins sem er gott.
Það sem er framundan er vinna við kjarasamninga, gerðardómur
rennur út þann 31. ágúst 2017 og einnig er vinna framundan við að
ljúka yfirferð á stofnanasamningum. Framundan er líka vinna við
undirbúning útgáfu nýs ljósmæðratals og sögu félagsins frá 1979.
Við erum þegar byrjuð að undirbúa ráðstefnu og afmæli árið 2019,
einnig eru hugmyndir að námskeiðahaldi ef áhugi reynist nægur.
Þó að það komi starfi félagsins ekki beint við er ekki hægt að láta
hjá líða að minnast á að á árinu hafa ljósmæður eignast tvo nýja
doktora, þær Berglindi Hálfdánsdóttur og Sigfríði Ingu Karlsdóttur
og eigum við þessi litla stétt nú samtals fjóra doktora. Síðast en
ekki síst er nú fyrsti prófessorinn í röðum ljósmæðra orðinn að
veruleika en það er Helga Gottfreðsdóttir. Stjórn félagsins þakkar
öllum þeim ljósmæðrum og öðrum sem starfað hafa fyrir félagið
á síðasta ári og einnig þeim sem hafa látið sig málefni félagsins
varða, haft samband og komið með ábendingar.
Skýrsla ritnefndar
Í ritnefndinni árið 2016 voru Hrafnhildur Ólafsdóttir ritstjóri,
Ólöf Ásta Ólafsdóttir, Berglind Hálfdánsdóttir, Ingibjörg Th.
Hreiðarsdóttir, Sigrún Ingvarsdóttir, Rut Guðmundsdóttir og Embla
Ýr Guðmundsdóttir.
Haldnir voru tveir ritnefndarfundir, einn fyrir hvort blað. Svo eru
mikil samskipti hjá nefndinni með tölvupósti.
Árið 2016 voru gefin út tvö blöð eins og undanfarin ár. Ekki hefur
verið erfitt að fá efni í blaðið. Nokkrir fastir liðir eru í blaðinu eins og
verkefni frá ljósmóðurnema og hugleiðingar ljósmóður. Ein ritrýnd
grein var birt á síðasta ári og eru fleiri væntanlegar á þessu ári.
Töluverður kostnaður hefur verið við útgáfu blaðsins, uppsetningu,
prentun, auglýsingasöfnun, pökkun og dreifingu og í raun hefur þessi
kostnaður hækkað á hverju ári. Dóra Stephensen sem sá um að safna
Skýrsla stjórnar LMFÍ 2016-2017
F R É T T I R A F F É L A G S S TA R F I