Morgunblaðið - 18.09.2018, Side 6

6 FRÉTTIRInnlent
MORGUNBLAÐIÐ ÞRIÐJUDAGUR 18. SEPTEMBER 2018
Sigurður Bogi Sævarsson
sbs@mbl.is
Fyrsti snjórinn á þessu hausti kom
nú um helgina. Við Frostastaðavatn á
Landmannaafrétti var marautt yfir
að líta um kl. 20 á laugardagskvöldið
þegar myndin sem er til vinstri hér
að ofan var tekin. Um nóttina snjóaði
hins vegar svo gránaði í rót í fjalls-
hlíðum, hálsum og ásum eins og
myndin til hægri sýnir. Ungar konur
frá Ísrael sem ljósmyndari Morg-
unblaðsins hitti á Frostastaðahálsi
tóku snjónum fagnandi – enda er
fönnin þeim framandi. Að hætti túr-
ista tóku þær fram stöngina og sím-
ann – og útkoman var mynd af þeim
sjálfum í stórbrotnu umhverfi.
En svo kom sólin upp og þegar líða
tók á sunnudaginn hafði snjóinn að
mestu tekið upp. Varð þetta
snemmbúna hret því ekki til þess að
raska smalamennsku, en fjallmenn
úr Landsveit og Holtum eru nú í fjár-
leitum á þessu víðfeðma svæði og
þurfa um hundrað fjöll að fara. Reka
þeir nú safnið á undan sér fram af-
rétttinn en féð verður dregið í dilka í
réttunum í Áfangagili næstkomandi
fimmtudag.
Snjóað gæti norðan jökla
Veður fer kólnandi þegar líður á
vikuna, spáð er norðanátt og má bú-
ast við einhverri snjókomu á norðan-
verðu landinu og inni á hálendinu
norðan jökla. Ósennilegt er þó, að
sögn veðurfræðings, að snjói á sunn-
anverðum öræfunum, svo sem á
Fjallabakssvæðinu, en vafalítið muni
þó frysta og skæni leggjast á tjarnir
og bolla á köldum nóttum, sér-
staklega ef bjartviðri ríkir.
Á Suður- og Vesturlandi verður
hins vegar áfram sama blíðviðrið og
verið hefur að undanförnu, það er
hóflegur hiti og léttskýjað, sem í
flestra vitund er kærkominn sum-
arauki.
Veðrabrigði Myndin til hægri var tekin kl. 20:05 á laugardagskvöld. En svo fölnaði allt á hélunótt og á sunnudagsmorgun hafði landið fengið nýjan og kuldalegan svip, sem þó varði ekki lengi.
Morgunblaðið/RAX
Fyrsti snjórinn við Frostastaðavatn
 Jörð á Landmannaafrétti var grá um helgina  Kuldaspá í kortunum fyrir norðanvert landið
Morgunblaðið/RAX
Ferðalangar Ungum konum frá Ísrael sem eru á ferð um landið var snjórinn í senn undrunarefni og ævintýri.
Sigurður Ægisson
Siglufirði
Þessi ungi smyrill var að gæða sér
á nýveiddum hrossagauk á dög-
unum og nærvera ljósmyndarans
virtist ekki hafa nein truflandi
áhrif.
Smyrillinn er norðlægur fugl
með útbreiðslu um alla jörð. Hann
er t.d. að finna á Írlandi, í Skot-
landi, Wales, Skandinavíu, austur
eftir allri Síberíu og í Alaska og
Kanada, þó ekki eins langt norður
og fálkinn. Kjörlendið er mishæð-
ótt bersvæði, s.s. lyngheiðar.
Mismunandi að lit
Kynin eru mismunandi að lit.
Kvenfuglinn er brúnn að ofan og
ljós að neðan, með dökkum rák-
um, karlfuglinn blágrár að ofan
og ryðlitur að neðan, með dökk-
brúnum rákum. Lithimna augna
er dökkbrún og fætur gulir. Ungir
fuglar líkjast kvenfuglum.
Íslenski smyrillinn er að mestu
farfugl og dvelur á Írlandi, Bret-
landseyjum og meginlandi Evrópu
á veturna. Allmargir verða þó eft-
ir hér og bíða af sér veturinn,
einkum á sunnanverðu landinu.
Smyrill að snæðingi
Ljósmynd/Sigurður Ægisson
Innleiðing á þriðja orkupakka Evr-
ópusambandsins í lög hér á landi
fæli ekki í sér slík frávik frá þver-
pólitískri stefnumörkun og rétt-
arþróun á Íslandi að það kalli sér-
staklega á endurskoðun
samningsins um Evrópska efna-
hagssvæðið. Með innleiðingu hans
væri ekki brotið blað í EES-sam-
starfinu. Þetta er niðurstaða grein-
argerðar Birgis Tjörva Péturssonar
lögmanns um þriðja orkupakkann en
hún var unnin að beiðni iðnaðarráð-
herra.
Athugun Birgis á þriðja orku-
pakkanum leiðir heldur ekki í ljós
grundvallarfrávik frá þeirri stefnu-
mörkun sem fólst í innleiðingu fyrsta
og annars orkupakka ESB á sínum
tíma. Hann fær ekki séð að reglur
þriðja orkupakkans um aukið sjálf-
stæði raforkueftirlits feli í sér frávik
eða eðlisbreytingu frá því sem gildir
um aðrar sjálfstæðar eftirlitsstofn-
anir á Íslandi. Sú aðlögun þriðja
orkupakkans að tveggja stoða kerf-
inu sem EES-samningurinn mælir
fyrir um á sér samsvörun í aðlögun
gerða um fjármálaeftirlit, að sögn
Birgis. Hann telur óvírætt að vald-
heimildir Eftirlitsstofnunar EFTA
(ESA) á grundvelli þriðja orkupakk-
ans rúmist vel innan þeirra marka
sem dregin voru við innleiðingu
reglna um evrópskt samkeppnis- og
fjármálaeftirlit.
Í niðurstöðum greinargerðarinnar
kemur fram að reglur um sam-
keppni, bann við ríkisaðstoð, neyt-
endavernd og fleira takmarka svig-
rúm íslenskra stjórnvalda í
raforkumálum, en þessar takmark-
anir hafi nú þegar verið leiddar í lög
hér á landi.
Þarf sterk rök til að hafna
Þórdís Kolbrún Reykfjörð Gylfa-
dóttir iðnaðarráðherra segir grein-
argerðina mikilvægt innlegg í um-
ræðu um málið. „Á grundvelli þess
sem hefur komið fram um málið er
ekki að sjá að innleiðing þess í ís-
lensk lög fæli í sér meiriháttar frávik
frá fyrri stefnumótun stjórnvalda í
þessum málaflokki en almennt
myndi ég telja að það þurfi afar
sterk rök til að hafna með öllu upp-
töku ESB-gerðar í EES-samninginn
sem talin er varða innri markaðinn.
Það væri í fyrsta skipti frá upphafi
sem við gerum það og ekki ljóst
hvert það myndi leiða,“ er haft eftir
ráðherra á vef ráðuneytisins.
Innleiðing orkupakka
brýtur ekki blað í EES
 Ráðherra tekur undir álit lögmanns um þriðja orkupakkann
Morgunblaðið/Helgi Bjarnason
Tengivirki Þriðji orkupakkinn leggur ekki skyldu á stjórnvöld hér á landi
að tengjast innri raforkumarkaði sambandsins með sæstreng.