Skessuhorn - 01.11.2017, Blaðsíða 16

MIÐVIKUDAGUR 1. NÓVEMBER 201716
Færst hefur í vöxt að Íslendingar
sem og nágrannar okkar á norð-
lægum slóðum fari í tannlækna-
ferðir til Póllands. Einnig hefur
á liðnum árum verið talsvert um
slíkar ferðir til Búlgaríu og fleiri
landa Austur-Evrópu. Ferðum Ís-
lendinga í þessum tilgangi til Pól-
lands hefur fjölgað að undanförnu
og margir lýst ánægju sinni með þá
reynslu. Tilviljun réði því að Sig-
rún Hjartardóttir í Hátúni í Borg-
arfirði heimsótti eina slíka stofu og
hefur undanfarin misseri aðstoðað
nágranna sína og fjölskyldu til að
komast utan til tannlækninga. En
þessi starfsemi er hratt að vinda
upp á sig hjá Sigrúnu og allt upp
í fimmtán einstaklingar hafa farið
saman í slíkar ferðir á hennar veg-
um og framundan eru fleiri ferðir.
Skessuhorn fékk að forvitnast um
þennan vísi að ferðaskrifstofu sem
Sigrún rekur frá heimili sínu í upp-
sveitum Borgarfjarðar.
Hægt að leita tilboða
„Þetta byrjaði fyrir fimm árum. Þá
fórum við Steini maðurinn minn,
mamma hans og stjúpi, í borgar-
ferð til Varsjár í Póllandi. Steina
vantaði að komast til tannlæknis
og hafði ýtt því verkefni dálítið á
undan sér. Í og með fórum við því
í þessa borgarferð til að skoða að-
stæður á tannlæknastofum í Varsjá.
Við höfðum séð að algengt var að
fólk frá t.d. Noregi, Bretlandi og
Danmörku hafði verið að fara til
Póllands til að leita sér tannlækn-
inga vegna þess hversu hagkvæmt
það þótti. Áður en við fórum út
höfðum við aðeins kynnt okk-
ur málið. Pólskar tannlæknastofur
bjóða t.d. upp á upplýsingasíðu á
netinu þar sem hægt er að óska eft-
ir tilboðum í tannlækningar. Fólk
gefur þá upp ákveðnar grunnupp-
lýsingar um hvað það haldi að
þurfi að gera og getur óskað eftir
tilboðum út frá því. Þar getur ver-
ið um að ræða tannviðgerðir, rétt-
ingar eða tannsmíði. Þegar ósk um
tilboð hefur verið send, koma til-
boð til baka frá þremur tannlækna-
stofum, ásamt myndum af starfs-
fólki, aðstöðu á stofunum, opn-
unartíma, meðmælum sjúklinga
og verði. Út frá slíkum tilboðum
völdum við okkur eina tannlækna-
stofu og vorum rosalega heppin
með það val. Eftir það höfum við
fylgt tannlækninum á stofunni og
eltum hann reyndar þegar hann
stofnaði nýja stofu með félögum
sínum á öðrum stað. Þessi tann-
læknir kennir auk þess við háskól-
ann í Varsjá og hefur reynst okk-
ur einstaklega vel. Hann er í senn
traustur, vandvirkur en ekki síst
ódýr í mælikvarða við það verðlag
sem við þekkjum hér heima,“ seg-
ir Sigrún.
Skipuleggur
það sem þarf
Í boði eru ódýrar flugferðir til Var-
sjár í Póllandi. Með því að leita
hagstæðustu verða er jafnvel hægt
að fá flug báðar leiðir auk gisting-
ar í nokkra daga fyrir innan við
hundrað þúsund krónur. „Lág-
gjaldaflugfélagið Wizz air flýg-
ur í beinu flugi til Varsjár og þá er
WOW einnig með ferðir þangað.
Þegar fólk biður mig að aðstoða
sig við að panta tannlækningar er
ég gjarnan að panta flug, gistingu,
bóka tannlæknatíma og slíkt. Tek
jafnvel mynd á símann til að tann-
læknarnir geti áttað sig á mögu-
legu umfangi viðgerðanna. Þann-
ig hjálpa ég fólki að senda upp-
lýsingar sem þarf til að hægt sé
að fá tilboð í viðgerðir eða tann-
smíði og átta sig á heildarkostnaði
við ferðina. Í flestar þessar ferðir
fer ég sjálf með og í þeim tilfell-
um sem fólk treystir sér ekki til að
tala ensku fer ég með því á stof-
una og túlka. Þá eru reyndar einn-
ig dæmi um að fólk fari bara sjálft
út án leiðsagnar.“
Getur munað hundr-
uðum þúsunda króna
Sigrún segir að pólskar tannlækna-
stofur séu mjög opnar og gefi al-
mennt meiri upplýsingar en þær
íslensku, svo sem um verð. „Þær
leggja mikla áherslu á að undirbúa
sjúklinginn eins vel og hægt er.
Teknar eru myndir og lögð áhersla
á að átta sig á umfangi viðgerða
eða smíði og finna út verð áður en
hafist er handa. Þannig getur sjúk-
lingurinn nánast treyst að hverju
hann gengur bæði í tíma og verði.
Mér hefur þannig sýnst í öllum til-
fellum sem ég þekki að jafnvel þótt
við tökum með ferða- og dvalar-
kostnað sé þetta ódýrari kostur
þegar upp er staðið. Dæmi eru um
að peningalegur ávinningur skipti
hundruðum þúsunda króna í þeim
tilfellum sem fólk hefur leitað til-
boða í umfangsmiklar viðgerðir
eða tannsmíði.“
Hótel í göngufæri
Sigrún segir ferðirnar sem hún
hefur skipulagt að undanförnu taki
um viku. Þeir sem eru að fara í
miklar tannviðgerðir eru þá jafnvel
að fara á stofuna alla dagana með-
an dvalið er ytra, stundum tvisvar á
dag, en stofan er opin mánudaga til
laugardaga. „Mörgum finnst gott
að þjappa umfangsmiklum tann-
viðgerðum á stuttan tíma, finnst
best að drífa þetta af, sérstaklega
ef það glímir við tannlæknafóbíu,“
segir hún.
En hvernig fjármagnar Sigrún
þessa þjónustu fyrir þá sem vilja
komast í kynni við ódýra tann-
læknaþjónustu? „Ég fæ kommisjon
frá tannlækninum en auk þess tek
ég smávegis þjónustugjald hjá fólki.
Eitthvað sem dugar fyrir umsýslu-
kostnaði, vinnu við bókanir, útveg-
un hótels eða bílaleigubíls og slíkt.
Ég reyni alltaf að finna hagkvæman
kost fyrir fólk. Til dæmis að bóka
hótel sem er í göngufæri við tann-
læknastofuna og þá er ég í föstum
viðskiptum við leigubílstjóra; gaml-
an skemmtilegan poppara sem við
komumst í kynni við. Ég reyni svo
að velja íbúðahótel sem býður upp
á eldunaraðstöðu. Margir sem eru
í stífu tannlæknaprógrammi eru
ekki mikið fyrir að fara út að borða
harðan mat og vilja þá geta brasað
graut eða eitthvað mjúkt fæði heima
á hóteli.“
Margt í boði
Nú er Sigrún búin að fylgja nokkr-
um tugum einstaklinga til Póllands
og eru ferðirnar orðnar fimm tals-
ins. „Já, þetta hefur undið upp á sig
án þess að það hafi verið ætlunin í
upphafi. Nú eru það ekki lengur ein-
göngu nágrannar og fjölskyldumeð-
limir sem eru að fara með okkur.
Þetta hefur spurst út. Svo er ég að
reyna að skipuleggja ferðirnar þann-
ig að fólk fái sem mest út úr þeim,
geri líka úr þeim skemmtiferð. Til
dæmis er miðbærinn í Varsjá mjög
fallegur fyrir jólin og í næstu ferð í
byrjun desember eru makar að fara
með og nýta ferðina til innkaupa
eða njóta borgarinnar. Sumir jafn-
vel taka bílaleigubíl og ferðast um.
Varsjá er falleg borg, var að miklu
leyti endurbyggð eftir stríð. Hins
vegar er mikill munur á borginni
eftir því hvar þú ert. Úthverfin eru
eins og víða má finna í austur - evr-
ópskum borgum, en miðbærinn er
iðandi af skemmtilegu mannlífi. Al-
menningssamgöngur eru mjög góð-
ar og íbúar eru afskaplega vinalegir
og hjálpsamir. Til dæmis fórum við
Steini einhvern tímann út úr strætó
á röngum stað og þá tók einn inn-
fæddur sig til og aðstoðaði okkur,
tók korter í það þannig að finndum
rétta leið til baka. Maturinn þarna er
einnig mjög góður og hægt að velja
matsölustaði á öllum skala. Mikið er
af verslunum, allt frá dýrum merkja-
búðum í verslanir eins og ég held
að Íslendingar almennt vilji. Víða
í borginni eru íbúðablokkir með
verslunum á jarðhæðinni og söfn-
in í Varsjá eru líka mjög skemmti-
leg. Jafnvel þótt þetta sé austur evr-
ópsk borg þá hefur hún yfir sér mjög
fjölþjóðlegt yfirbragð. Þeir sem hafa
áhuga geta heimsótt söfn, en þarna
er meðal annars að finna Chopin
safn, Kopernicus vísindastofnunina
og safn um Marie Curie eðlisfræð-
ing og nóbelsverðlaunahafa sem
einmitt var nýlega sýnd mynd um í
sjónvarpinu. Stríðið hafði mikil áhrif
á borgina. Áin Visla rennur þvert í
gegnum hana, en að henni komust
Rússar í seinna stríðinu, en aldrei
yfir hana. Þeir sprengdu hins veg-
ar allt sem þeir gátu handan árinn-
ar. Pólverjar eru stríðshrjáð þjóð og
víða í borginni er hægt að sjá merki
þess og vafalítið hefur þetta mótað
fólkið sem þarna býr.“
Illu er best aflokið
Að endingu segir Sigrún að það sé
ánægjulegt verkefni að geta skipu-
lagt skemmtiferð úr tannlækna-
ferð fólks, sem jafnan er ekki bund-
ið við sérstaka skemmtun. „Margir
hugsa með sér að gott sé að þjappa
tannlæknadæminu saman á stuttan
tíma og máltækið „Illu er best af-
lokið,“ hljómar því oft í mín eyru.
Auk næstu ferðar sem verður viku
af desember, er í undirbúningi ferð í
þriðju viku janúar og svo önnur með
vorinu,“ segir Sigrún Hjartardóttir
að endingu.
mm
Sameinar tannlæknis- og skemmtiferðir til Póllands
Heima við eldhúsborðið er Sigrún í samskiptum við tannlæknastofuna ytra og
skipuleggur allt er varðar ferðir Íslendinga til Varsjár.
Ef fólk óskar eftir því fylgir Sigrún því og túlkar á tannlæknastofunni í Varsjá.
Ánægðar á heimleið eftir vel heppnaða ferð. F.v. Sigríður Einarsdóttir, Jóhanna
Þorvaldsdóttir og Auður Eyleif Einarsdóttir.
Svipmynd frá aðventumarkaði í mið-
borg Varsjár.
Oftast er farið í beinu flugi með Wizz air til Varsjár.Í stólnum góða, finnsk hönnun með ítölsku leðri.Ánægður viðskiptavinur eftir vikudvöl hjá tannnlæknunum.