Bændablaðið - 16.05.2019, Page 4

Bændablaðið | Fimmtudagur 16. maí 20194
FRÉTTIR
AB mjólk gefin nýfæddum
lömbum í stað sýklalyfja
Sala á AB mjólk tekur alltaf
mikinn kipp á vorin en
ástæðan er sú að fjölmargir
sauðfjárbændur gefa mjólkina
nýfæddum lömbum til að reyna
að sporna gegn slefsýki og kemur
í stað pensilíns áður.
Lömb sem veikjast af slefsýki
verða sinnulaus, þau hætta að sjúga,
leggjast niður, eru blaut um nasir
og munn og kviður þeirra er oft
útblásinn. AB mjólkin hefur sannað
gildi sitt og kemur í veg fyrir þessi
einkenni, enda inniheldur hún
mikið af góðum gerlum. Á bænum
Teigi í Fljótshlíð fá lömbin AB
mjólkina um leið og þau fæðast
en meðfylgjandi mynd var tekin í
fjárhúsinu þar. /MHH
Einar Örn Jónsson garðyrkjufræðingur var starfsfólki Stofnunar Árna
Magnússonar til aðstoðar við upptöku á plöntunum.
Trjáplöntum bjargað
úr Holuskógi
Tilkynnt var á ársfundi Stofnunar
Árna Magnússonar í síðustu viku
að ríkið væri búið að samþykkja
tilboð í að reisa Hús íslenskunnar.
Grunnur húss var grafinn 2013
og hefur staðið auður síðan þá og
ýmiss konar gróður, þar á meðal
trjáplöntur, hafið landnám í
holunni.
Af þeim tegundum sem vaxa í
grunninum eru dúnurt, arfi, gras og
víðir mest áberandi og af einstökum
tegundum má nefna augnfró,
krossfífil, hóffífil, vætudúnurt,
akurarfa, blóðarfa, njóla, baldursbrá
og garðamaríustakk. Þar fundust
einnig sex trjátegundir, grávíðir,
gulvíðir, alaskaösp, birki, reynir og
greni.
Búið að taka tilboði
í að reisa húsið
Eva María Jónsdóttir, upplýsinga-
fulltrúi Árnastofnunar, segir að
á ársfundinum 8. maí hafi meðal
annars verið tilkynnt um að
framkvæmdir við húsið mundu
hefjast fljótlega.
„Á fundinum voru kynntar
nýjungar í starfi stofnunarinnar og
svo skemmtilega vildi til að daginn
fyrir fundinn varð ljóst að ríkið
væri búið að taka tilboði verktaka
til að reisa húsið.“ Eva segir að
oft hafi verið talsverð spenna á
ársfundunum vegna áralangrar
biðstöðu við byggingu hússins. „Að
þessu sinni var því raunverulega
hægt að gleðjast og fagna þessum
tímamótum.“
Auðlegðin í holunni
„Líkt og aðrar stofnanir er
Árnastofnun að reyna að gera
starfsemi sína umhverfisvænni og
taka græn skref og kolefnisjafna
að minnsta kosti vinnuferðir
starfsmanna. Okkur þótti því
sjálfsagt að nýta þá auðlegð sem
hefur myndast í holunni og bjarga
eins miklu af trjáplöntum og hægt
er og flytja þær annað.
Við tókum því upp rúmlega
hundrað plöntur, víði, ösp, greni og
birki, og færðum Skógræktarfélagi
Reykjavíkur að gjöf og mun félagið
sjá um að finna þeim stað innan
borgarlandsins.“ /VH
nýjan stað innan borgarlandsins.
Mynd / Guðlaug Berglind Guðgeirsdóttir.
Fimmlemba í Skarði – hefur átt 37 lömb
Ærin Dimma á bænum Skarði
í Landsveit hjá Guðlaugu
Berglindi Guðgeirsdóttur og
Erlendi Ingvarssyni er alvöru
kynbótakind því hún hefur átt 37
lömb í gegnum tíðina.
Dimma, sem er tíu vetra
gömul, bar nýlega fimm fallegum
lömbum. Ellefu af lömbum
Dimmu hafa verið sett á.
Meðalfallþungi hjá Dimmu er
18 kg, 10.3 fyrir gerð og 6.8 fyrir
fitu. Í Skarði eru 1.050 kindur á
fóðrum og þar er reiknað með
um 1.800 lömbum í sauðburði
vorsins.
Um síðustu helgi áttu um 300
ær eftir að bera. /MHH
Hrossaræktarsamtök Eyfirðinga og Þingeyinga:
Matthías frá Brún heiðraður fyrir hrossarækt
Mynd / Þórir Tryggvason
Matthías Eiðsson, lengst af
kenndur við bæinn Brún ofan
Akureyrar, var heiðraður á
sýningu sem Hestamannafélagið
Léttir efndi til á dögunum með
yfirskriftinni Hestaveisla. Það
voru Hrossaræktarsamtök
Eyfirðinga og Þingeyinga sem
stóðu að heiðrun Matthíasar
fyrir ævistarf hans við
hrossaræktun hér á landi.
Matthías hefur í áratugi
stundað hrossarækt og hefur
ræktun hans skipt sköpum í
hrossarækt á landinu „og skilað
þeim árangri að nú er um allt land
mikill fjöldi hrossa sem eiga með
einum og eða öðrum hætti tengsl
sín og ættir að rekja við hross
Matthíasar og formóður farsæls
ræktunarstarfs hans,“ segir í
umsögn hrossaræktarsamtakanna
um Matthías.
Hekla frá Árgerði í Eyjafirði
er formóðir þessarar ræktunar
og dóttir hennar og eina folald,
Ósk frá Brún, hefur skilað af sér
mörgum afkvæmum og farsælum
stóðhestum sem svo sannarlega
hafa sett svip sinn á hestaheiminn
á Íslandi á liðnum áratugum.
Með þessu vilja Hrossaræktar-
samtök Eyfirðinga og Þingeyinga
þakka Matthíasi af heilum hug
framlag hans til hestamennskunnar
í landinu,“ segir enn fremur í
umsögninni. /MÞÞ
Bleikjuveiði í Norðfjarðará
dregst saman
Talsverð hnignun hefur orðið
á bleikjuveiði í Norðfjarðará
og var veiði síðasta sumar
í sögulegu lágmarki, en þá
veiddust 531 bleikja í ánni og er
veiðin talsvert undir meðaltali í
annars gjöfulli bleikjuá.
Efnt var til íbúafundar um
stöðu Norðfjarðarár á dögunum,
en meginefni fundarins voru
niðurstöður rannsóknar
Hafrannsóknastofnunar sem sýna
fram á hnignun árinnar.
Guðni Guðbergsson, sviðsstjóri
hjá Hafrannsóknastofnun, kynnti
stöðuna út frá niðurstöðum
áfangaskýrslu Hafró á vöktun á
laxfiskastofnun Norðfjarðarár
í kjölfar efnistöku. Fram kom
í máli hans að mikilvægt væri
að sýna ám skilning og þrengja
ekki um of að þeim, þær þyrftu
sitt svæði til að geta þrifist sem
búsvæði fyrir þær lífverur sem
þar lifa, þar með talið bleikjuna.
Sagði Guðni mikilvægt að hlúa
að búsvæðum bleikjuseiðanna
en efnistaka hefur neikvæð
áhrif. Nefndi hann að ekki væri
ástæða að svo stöddu að óttast
niðurstöður rannsóknarinnar, en
nauðsynlegt að huga að góðri
umgengni við þessa gjöfulu
bleikjuá. /MÞÞ