Bændablaðið - 16.05.2019, Qupperneq 24

24 Bændablaðið | Fimmtudagur 16. maí 2019
LÍF&STARF
Vel sótt samfélagsþing haldið í Snæfellsstofu í Fljótsdal:
Fögur framtíð í Fljótsdal
Fljótsdalur býr yfir margvíslegum
auðlindum og ef byggt er annars
vegar á grunni fortíðar og hefðar
og hins vegar á styrkleikum og
tækifærum á öllum sviðum,
verður „fögur framtíð í Fljótsdal“.
Þetta kom fram á samfélagsþingi
sem haldið var í Fljótsdal fyrir
skömmu, en það var haldið af
Fljótsdalshreppi og var hluti af
samfélagsverkefni sem hófst í
ágúst í fyrra.
Skilaboð þingsins verða nýtt til að
skilgreina valkosti sveitarfélagsins,
við stefnumörkun í margvíslegum
málum, s.s. varðandi skipulagsmál,
atvinnumál, þjónustu og eflingu
samfélagsins. Þingið var haldið í
Snæfellsstofu og stóð í tvo daga.
Það var ætlað Fljótsdælingum,
búsettum og brottfluttum, ásamt
þeim sem hafa tengsl og rætur í
dalinn, eiga þar hús eða jarðir eða
starfa hjá fyrirtækjum og stofnunum
í Fljótsdal. Það gekk eftir, allir þessir
hópar áttu fulltrúa á þinginu og fór
þátttaka fram úr björtustu vonum,
því hátt í 50 manns mættu.
Búskapur, matvælavinnsla og
kolefnisbinding
Fyrirkomulag þingsins byggði á
alþjóðlegu fundaformi sem kallast
Open Space, eða Opið rými. Þingið
hófst á því að þeir þátttakendur
sem það vildu, gátu stungið upp á
málefnum til umræðu, sem síðan
voru rædd í minni hópum. Þannig var
rætt um 20 ólík mál, sem vörðuðu
samfélag, atvinnulíf og umhverfi.
Í lok þings var þessum málefnum
síðan forgangsraðað. Þar skoraði
langhæst málaflokkur sem kallaður
var „búskapur, matvælavinnsla
og kolefnisbinding“. Þar var allt
undir, búskapur og landnýting
tengd hestum, kindum, skógi,
ferðaþjónustu, grænmeti, kornrækt,
hreindýrum, villtum jurtum, fuglum,
fiskum og orku. Kallað var eftir
sameiginlegri aðstöðu til úrvinnslu
matvæla og átaki í markaðssetningu
og sölu. Þá var rætt um tækifæri
og einnig ógnanir sem geta falist í
loftslagsbreytingum.
Þátttakendur á þinginu
töldu viðburði og félagslíf vera
næst mikilvægasta málefnið til
eflingar byggðar og samfélags í
Fljótsdalshreppi. Þar kom fram
mikill áhugi á að gera meira úr
mörgum þeirra viðburða sem
þegar eru til staðar, en þó að varast
að búa aðeins til viðburði fyrir
gesti, heldur leggja áherslu á að
heimamenn skemmti sér saman.
Meðal annars var stungið upp á að
búa til handverkshóp.
Sýnileiki markaðssetningar
Rætt var um möguleika tengda
virkjunum, bæði heimavirkjunum
og orkuauðlindum í stærra samhengi
og kallað eftir stefnumótun af hálfu
sveitarfélagsins. Þá var lögð áhersla
á sýnileika og markaðssetningu
Fljótsdals. Af öðrum málum sem
þátttakendur töldu mikilvæg, má
nefna atvinnu- og verðmætasköpun,
náttúruvernd og sjálfbærni, merkingu
gönguleiða, bætta aðstöðu við
Hengifoss og á fleiri áfangastöðum
og hvað mætti gera betur varðandi
Vatnajökulsþjóðgarð og þann
hluta hálendisins sem tilheyrir
sveitarfélaginu. Á þinginu fór fram
vönduð greining á styrkleikum,
veikleikum, ógnunum og tækifærum
Fljótsdals og var einnig skoðað
hvaða innviðir og þjónusta þyrftu
að vera til staðar til að laða að
nýja íbúa. Þar var t.d. rætt um
húsnæðismál, leik- og grunnskóla,
íþróttaaðstöðu, almenningssvæði
og öldrunarheimili og varpað
fram hugmynd um uppbyggingu
byggðakjarna á aðlaðandi stað.
Einnig þarf, að mati þátttakenda, að
huga að samgöngum, gsm sambandi,
útsendingarskilyrðum sjónvarps,
sorpmálum og gámasvæði. Þá kom
fram að bygging iðnaðarhúsnæðis
gæti skapað ýmis tækifæri og bent
var á leiðir til að bæta aðstöðu á
tjaldsvæði.
Sameining við önnur sveitarfélag
verði skoðuð
Hægt væri að gera enn meira
úr fræðastarfi og rannsóknum í
tengslum við stofnanir og fyrirtæki
sem þegar eru starfandi í Fljótsdal og
voru viðraðar ýmsar hugmyndir um
verkefni og samstarf. Loks var rætt
um mannauð og tengsl, s.s. erlend
samskipti, tengingu við brottflutta
og móttöku nýrra íbúa. Rætt var um
kosti og galla sameiningar við önnur
sveitarfélög og fólk meðvitað um að
ekki sé spurning um hvort, heldur
hvenær komi til sameiningar, vegna
stefnumörkunar ríkisvalds og talið
nauðsynlegt að hreppsnefnd greini
mögulegar sviðsmyndir og móti
stefnu. Einnig var ýmsum hugleikið
hvernig sveitarfélagið gæti stutt
við nýsköpun og m.a. nefndir þeir
möguleikar að koma á fót stöðugildi
við sveitarfélagið og/eða að stofna
sprotasjóð.
Umsjón samfélagsþings
var í höndum Sigurborgar Kr.
Hannesdóttur hjá ILDI, sem nú
mun vinna samantekt um skilaboð
þingsins, sem síðan fer til frekari
úrvinnslu og eftirfylgni hjá
samfélagsnefnd og sveitarstjórn.
Á þinginu létu margir ungir
Fljótsdælingar að sér kveða og ljóst
að hjarta Fljótsdælinga slær fyrir
dalinn, jafnvel þeirra sem hleypt
hafa heimdraganum. Með þennan
kraft fólksins, auðlindir og sterka
stöðu sveitarfélagsins, ættu markmið
samfélagsverkefnis að nást, enda var
því í lok þings gefið nafnið „Fögur
framtíð í Fljótsdal“. /MÞÞ
Samfélagsþing var haldið í Snæfellsstofu í Fljótsdal fyrir skömmu, en það var haldið af Fljótsdalshreppi og var
hluti af samfélagsverkefni sem hófst í ágúst í fyrra.
Myndin er frá frumsýningarkvöldinu, en hana tók Hulda Signý Jóhannesdóttir
og er hún birt á vef Húna.
Leikflokkur Húnaþings vestra:
Uppsetning á Hárinu þótti
athyglisverð áhugasýning
Dómnefnd Þjóðleikhússins
hefur valið sýningu Leikflokks
Húnaþings vestra á Hárinu,
í leikstjórn Sigurðar Líndal
Þórissonar, athyglisverðustu
áhugaleiksýningu leikársins
2018–2019. Í áliti dómnefndar
segir að sýningin sé unnin af
gríðarlegum metnaði og hvergi
hafi verið slegið af kröfum við
uppfærsluna.
Leikmynd, búningar og leikgervi,
dansar, tónlistarflutningur, lýsing og
hljóðblöndun skapa saman sterka
heild, segir í áliti dómnefndar.
Einnig að stór leikhópur sem
skipaður sé hæfileikafólki njóti sín
í botn, söngur er sterkur, leikgleði
og orka allsráðandi. „Afslappaður
leikurinn skilar frásögninni á
einlægan og einfaldan máta þannig
að húmor og boðskapur verksins
komast vel til skila,“ segir í álitinu.
Þetta er í fyrsta sinn sem sýning
Leikflokks Húnaþings vestra er
valin áhugasýning ársins og það
vakti sérstaka athygli dómnefndar
hvað starfsemi leikflokksins er öflug
í ár. Önnur sýning leikflokksins
kom einnig sterklega til greina við
valið, en það er Snædrottingin í
leikstjórn Gretu Clough.
Þjóðleikhúsið hefur boðið
leikflokknum að koma og sýna
Hárið á Stóra sviði Þjóðleikhússins
í júní næstkomandi. /MÞÞ
Kristófer Tómasson sveitarstjóri heilsaði upp á Böggu á 100 ára afmælisdegi
hennar. Bagga hefur allt sitt líf búið í Steinsholti. Hún hélt lengi heimili með
bræðrum sínum, Jóni og Sveini, og rak með þeim myndarbú.
Mynd / Magnús Hlynur Hreiðarsson
Skeiða- og Gnúpverjahreppur:
Bagga húsfreyja í Steinsholti
er orðin 100 ára
Það var kátt á hjalla á bænum
Steinsholti í Skeiða- og
Gnúpverjahreppi 22. apríl sl.
þegar Guðbjörg Eiríksdóttir
húsfreyja, alltaf kölluð Bagga,
fagnaði 100 ára afmæli sínu.
Hún er fyrsti íbúinn í
Gnúpverjahreppi til að ná þessum
aldri svo vitað sé og hún er
jafnframt fimmti Íslendingurinn
sem nær hundrað ára aldri á þessu
ári. Bagga hefur verið hraust alla
ævi og alltaf jákvæð og glöð.
Systkinin voru sex en eru aðeins
tvö á lífi í dag, hún og Margrét,
sem er 93 ára og býr í Eystra-
Geldingaholti í sömu sveit og
Bagga. /MHH
BJB-Mótorstilling býður
upp á mikið úrval af öllum
tegundum af dekkjum
Flatahrauni 7 | 220 Hafnarfirði | Sími 565 1090 | www.bjb.is
SAMEINUÐ GÆÐI
Við bjóðum einungis
gæða dekk á gæða verði