Bæjarins besta - 17.09.1997, Blaðsíða 10
10 MIÐVIKUDAGUR 17. SEPTEMBER 1997
una. Núna stendur yfir endurskipulagning á skipastól félagsins
og við áætlum að þeirri vinnu ljúki fljótlega upp úr áramótunum.
Á því sviði standa yfir umfangsmiklar breytingar.“
Einu þröskuldarnir heimatilbúnir
„Við teljum að þegar kemur fram yfir áramótin verði komið
það útlit á fyrirtækið sem menn sjá fyrir sér í dag. Þá fyrst held
ég að menn geti farið að sýna verulega þann kraft sem ég er
sannfærður um að býr í Básafelli. Fyrr en þá finnst mér
ósanngjarnt að kveða upp dóma yfir þessu fyrirtæki. Ég bendi
á, að í allri þeirri vinnu sem unnin hefur verið við endurskipu-
lagningu á fjárhag þessa fyrirtækis hefur okkur alls staðar
verið tekið mjög vel. Við virðumst alls staðar hafa fullt traust
– nema kannski hjá þeim sem næst okkur standa. Ég segi það
fyrir mig, að maður bjóst við því að margir þröskuldar yrðu á
vegi okkar í þessari vinnu. En að einu þröskuldarnir sem við
höfum rekið okkur á skuli vera heimatilbúnir – það er nokkuð
sem við áttum ekki von á. Í allri þessari vinnu hefur það komið
okkur mest á óvart.“
Einkennileg umræða
– En jepparnir?
„Sjálfur keyri ég ekki á jeppa. Reyndar sé ég alltaf eftir
Pajeró-jeppanum sem ég átti. En mér hefur alltaf þótt það
einkennilegt, þegar umræðan um atvinnulíf og þróun vestfirskra
byggða er látin snúast um bifreiðaeign einstakra manna.“
Hugmyndirnar um að breyta
húsnæði Norðurtangans í skólahúsnæði
– Bæjarstjórnarmeirihlutinn og þínir eigin hagsmunir?
„Við skulum koma að því. Í vetur kviknaði sú hugmynd að
breyta Norðurtangahúsunum í skólahúsnæði. Ég held að ég
fari rétt með það, að sú hugmynd hafi fyrst komið fram þegar
Elísabet Gunnarsdóttir arkitekt var að vinna að deiliskipulagi
fyrir Eyrina. Hún kom hér í heimsókn og var að velta fyrir sér
framtíð rekstrar hér í Norðurtanganum og hvort uppi væru
óskir hjá okkur um aukið landrými fyrir reksturinn. Á þeim
tímapunkti var nánast búið að taka ákvörðun um að leggja af
þessa vinnslu hér. Í framhaldi af þeim tíðindum kviknaði sú
hugmynd innan bæjarkerfisins að breyta þessu húsnæði í
skólahúsnæði. Nokkrum mánuðum áður hafði fræðslunefnd
Ísafjarðarbæjar hafið vinnu við að fara yfir þá kosti sem fyrir
hendi væru til þess að komið yrði á einsetningu grunnskólanna
í Ísafjarðarbæ, sem við komumst ekki hjá frekar en önnur
sveitarfélög. Þessi vinna fræðslunefndar hefur því miður ekki
verið kynnt nægilega vel. Af einhverjum ástæðum hefur ekki
tekist að koma því nægilega vel á framfæri í bæjarfélaginu,
hversu viðamikið og gott starf fræðuslunefndin hefur unnið,
og það er kannski það versta. En það var samdóma álit allra í
fræðslunefnd, eftir að húsið hér hafði verið skoðað út frá
þessu sjónarmiði, að það myndi henta mjög vel fyrir þessa
starfsemi.
Bæjarstjórn samþykkti á sínum tíma samhljóða þá stefnu-
mótun fræðslunefndar, að kaupa skyldi húsnæði í nágrenni
grunnskólans. Í öllu þessu ferli hefur verið mikil samstaða. Á
síðustu metrunum virtist svo allt í einu koma upp einhver
meiningarmunur, sem hafði ekki orðið vart við áður, og á
endanum afgreiddi bæjarstjórn málið með þeirri ákvörðun
sem öllum er kunnug, að draga til baka kauptilboð sitt í hús
Norðurtangans og fara yfir þessi mál aftur.
Í framhaldi af því hef ég sagt, að ég sæi engin rök fyrir því
að kasta frá sér í einu vetfangi allri þeirri miklu vinnu sem
fræðslunefnd hefur unnið ágreiningslaust í þessu máli. Ég lét
orð falla á þá leið, að meirihluti bæjarstjórnar, sem færi að
hlutunum með þeim hætti, væri enginn meirihluti. Síðan hafa
menn farið yfir málin og ég trúi því að áfram verði haldið hinni
faglegu vinnu, þ.e. að kanna þá kosti sem fyrir hendi eru.
Núna hefur allt í einu komið inn í umræðuna að menn vilji
byggja nýtt og þá er sjálfsagt að kanna þann möguleika.“
Ekkert að óttast meðan unnið er með faglegum hætti
„Á meðan menn eru í þessari faglegu vinnu er ekkert að
óttast. Það eina sem ástæða getur verið til að óttast í þessu
máli, eins og svo mörgum öðrum sem að sveitarfélaginu snúa,
er að menn geri sér ekki fulla grein fyrir fjárhagsstöðunni. Það
vita allir sem vilja vita, að Ísafjarðarbær er mjög skuldsett
sveitarfélag og menn verða að taka ákvarðanir í samræmi við
það. Auðvitað væri gott að geta gert hina og þessa hluti, ef
menn ættu nóg af peningum, en það er nú einu sinni upphaf og
endir alls, að eiga fyrir hlutunum.“
Pólitískur styrkur minn ofmetinn
„Hver svo sem niðurstaðan verður í þessu máli, þá vona ég
bara að menn gleymi ekki hvernig við erum stödd fjárhagslega.
En að ég sé að huga að eigin hagsmunum í þessu máli, þá er
þess að geta, að jafnskjótt og það kom til tals að bærinn keypti
þetta húsnæði, þá tók ég þá ákvörðun að koma hvergi nálægt
afgreiðslu þess máls og enginn getur sagt um mig að ég hafi
ekki staðið við það. Ég hef hvergi setið fundi þar sem þessi
mál hafa verið rædd. Á hinn bóginn ber mér á endanum sem
bæjarfulltrúi að axla mína ábyrgð á rekstri sveitarfélagsins og
hlýt að taka mínar ákvarðanir í samræmi við það. Það er því
ekkert óeðlilegt að ég sem bæjarfulltrúi tjái mig um þessi mál,
en ég hef ekki komið nálægt afgreiðslu þeirra á nokkurn hátt.
Varðandi allt tal um það, sem maður hefur svo sem heyrt í
bland við aðrar sögur, að þetta mál sé runnið undan mínum
rifjum, þá vil ég nú segja, að þar er pólitískur styrkur minn
ofmetinn.“
Ekki á leiðinni að sprengja meirihlutann
– Þú hefur þá ekki verið að hugleiða það undanfarið, að
sprengja meirihlutann...
„Nei, vissulega ekki. Á meðan sá meirihluti sem nú er
starfar á faglegum nótum, þá sé ég enga ástæðu til að vera að
sprengja eitt eða neitt. Það samstarf sem við erum nú í hefur
að mörgu leyti gengið mjög vel og það síðasta sem okkur
vantar á þessu svæði er að fara að efna til einhverra pólitískra
illinda. Við Ísfirðingar höfum fengið alveg fullan skammt af
slíku á undanförnum árum. Ég sé engin efni til neinna pólitískra
styrjalda um stjórn bæjarfélagsins.“
Spennandi verkefni bíða nýrrar bæjarstjórnar
– Nú líður senn að nýjum kosningum til bæjarstjórnar.
Hyggur þú á áframhaldandi setu í bæjarstjórn?
„Þetta er spurning sem alls ekki er tímabært að svara í dag.
Ég held að lengra verði að líða áður en ég tek ákvörðun um
það. Ég leiddist út í þetta af hálfgerðri slysni á sínum tíma og
er nú búinn að sitja í bæjarstjórn bráðum fjögur ár, allan
tímann í meirihluta. Við höfum komið mjög mörgum málum
í gegn, þó að sameining sveitarfélaganna standi þar auðvitað
upp úr. En það er afar tímafrekt að sitja í sveitarstjórn og erfitt
samhliða öðru tímafreku starfi. Hins vegar bíða spennandi
verkefni við rekstur bæjarfélagsins á komandi árum. Sveitar-
stjórnarmenn eiga t.d. eftir að sanna sig við rekstur grunn-
skólanna. Það er verkefni sem verður mjög spennandi að
fylgjast með á næstu árum. Bættir skólar hér á svæðinu verða
að vera eitt af forgangsverkefnum Vestfirðinga. Þar þurfum
við að sýna miklu meira frumkvæði en við höfum gert. Í fullri
hreinskilni sagt hef ég enga ákvörðun tekið um það, hvort ég
gef kost á mér áfram í bæjarstjórn.“
Prófkjör hjá Sjálfstæðisflokknum?
– Nú hefur engin ákvörðun verið tekin um það í þínum
flokki, hvort efnt verður til prófkjörs hér í Ísafjarðarbæ. Í
Reykjavík hefur þegar verið ákveðið að viðhafa prófkjör.
Hver er skoðun þín á þessu?
„Mér finnst liggja í augum uppi að hér verði haldið prófkjör,
þótt ekki hafi enn farið fram nein formleg umræða um það.
Reyndar hef ég verið lítið hrifinn af prófkjörum gegnum
tíðina, því að oft hafa þau skapað fleiri vandamál en þau hafa
leyst. Málið en hins vegar það, að ekki hefur verið fundin nein
leið sem fólki hugnast almennt betur. Aðstæðurnar voru reyndar
mjög sérstakar fyrir kosningarnar í fyrravor, þegar sveitarfé-
lögin voru sameinuð. Umræðan var þá í þeim anda, að menn
vildu láta það fólk sem áður hafði verið kosið á hverjum stað
halda starfinu áfram í sameinuðu sveitarfélagi. Niðurstaðan
hjá okkur sjálfstæðismönnum varð einmitt sú, að hafa ekki
prófkjör við þær aðstæður, heldur að stilla saman því fólki
sem hafði unnið að sameiningunni. Hugað var að því sem
alltaf hlýtur að vera sérlega mikilvægt við stofnun nýs
sveitarfélags, að allir hlutar þess hefðu sína fulltrúa. Í heildina
finnst mér hafa tekist ágætlega til við uppstillingu á listann hjá
okkur.
Nú er þetta hins vegar farið að slípast og sveitarfélagið
orðið ein heild og vonandi hafa menn sýnt fram á það, að
einstakir hlutar sveitarfélagsins þurfa ekki að hafa neinar
áhyggjur af sinni stöðu. Þess vegna finnst mér eðlilegast að nú
verði prófkjör um uppstillingu á lista.“
Bæjarstjórinn og stjórnarformennskan í Samherja
– Í dálki Stakks í Bæjarins besta í síðustu viku kom fram
gagnrýni á það, að bæjarstjórinn á Ísafirði skuli jafnframt vera
stjórnarformaður í Samherja. Hvaða skoðun hefur þú á því
máli?
„Því er fljótsvarað. Ég hefði ekki gerst stjórnarformaður
Samherja í sporum Kristjáns. Hann fékk hins vegar heimild til
þess frá forystumönnum þeirra flokka sem standa að meirihluta
bæjarstjórnar og hafði fullt traust þeirra. Ég taldi þetta óheppi-
legt fyrir mann í hans stöðu. En þetta varð einfaldlega niður-
staðan og við því er í sjálfu sér ekkert að gera. Ég hef ekki
orðið var við það hingað til, að þetta hafi á nokkurn hátt komið
niður á störfum hans sem bæjarstjóra. Og ég vil segja varðandi
þau blaðaskrif, sem átt hafa sér stað undanfarið um meinta
hagsmunaárekstra hans, að mér finnast þau ákaflega ómerkileg.
Þeim hefur ekki fylgt hinn minnsti rökstuðningur um að þetta
hafi skaðað starf hans sem bæjarstjóra á nokkurn hátt. Á
meðan svo er ekki finnst mér ekki nokkur ástæða til að taka
þetta mál upp. Mér finnst Kristján Þór hafa staðið sig ákaflega
vel í sínu starfi sem bæjarstjóri og þetta einstaka mál breytir
engu um það.“
Fólk með sjálfstæðar skoðanir
– Er það rétt, að upp hafi komið á liðnum mánuðum og
misserum nokkur alvarleg ágreiningsmál innan bæjarstjórnar-
flokks Sjálfstæðisflokksins, þannig að við hafi legið að upp úr
syði?
„Ég hef vissulega ekki mikla reynslu í stjórnmálum, enda er
þetta aðeins fjórða árið mitt í bæjarstjórn, þannig að ég hef
ekki mikinn samanburð. Hitt leyndist engum sem sáu
framboðslistann okkar fyrir síðustu kosningar, að þar var í
efstu sætunum kröftugt fólk sem hefur verið þekkt fyrir flest
annað en lítillæti eða undanslátt. Það hefur ekkert breyst. Í
annan stað fylgja sameiningu sveitarfélaga mjög mörg álitamál.
Það er alveg rétt að við höfum oft tekist á um hlutina, en ég hef
aldrei orðið var við annað hingað til en að menn hafi getað sest
niður og leyst vandamálin í fullu bróðerni. Hins vegar höfum
við engan samanburð í þessum efnum í bæjarstjórninni núna.
Sjálfstæðisflokkurinn er auk Funklistans eini flokkurinn sem
á fleiri en einn bæjarfulltrúa. Því hljóta skoðanaskipti fimm
bæjarfulltrúa Sjálfstæðisflokksins að vekja meiri athygli en
eins manns tal annarra flokka. Ég verð að segja að mér finnst
það nú frekar vera styrkur flokks að þar skuli geta hvesst á
stundum og hef hreint ekkert við það að athuga“, segir Halldór
Jónsson.
Hlynur Þór Magnússon.
„Kjaftasögur um náungann eru það auðveldasta sem hægt er að koma af stað hér. Við Básafellsmenn höfum ekki farið
varhluta af því á undanförnum mánuðum,“ segir Halldór Jónsson.