Strandapósturinn - 01.06.1971, Qupperneq 108

Magnús Gunnlaugsson,
Ytra-Ósi, Strandasýslu:
HEILIR HEIM!
Við bjóðum heila heiðursmenn
og hjartaprúða svanna,
sem glaðir Strandir gista enn
og gamlar slóðir kanna.
Hér eiga margir ungdómsspor
og æskuminning bjarta,
er lifðu allt sitt œskuvor
við yl frá móðurhjarta.
Gleður jafnan handtak hlýtt
er hittum vini forna
og yljar hjarta brosið blítt
sem birta sumar morgna.
Gott er líka á góðri stund
að gleyma dagsins önnum
og eiga slíkan unaðsfund
með ykkur Strandamönnum.
Aldrei rofna ættarbönd
né ást á feðraslóðum.
Þó förum við um fjarlœg lönd
við finnum hvar við stóðum.
Við þekkjum öll, sú þrá er heit
sem þjóðarsameind tryggir.
Nú fagnar ykkur friðsæl sveit
og fólk, sem Strandir byggir.
106