Morgunblaðið - 31.12.2021, Page 20

ÚR BÆJARLÍFINU
Líney Sigurðardóttir
Þórshöfn
Að halda jólaglögg á aðventu er víða
vinsæll siður en varla er algengt að slíkar
samkomur séu haldnar í litlum reykkofa
uppi í sveit, innan um hangilæri, nautatung-
ur og fleira reykt góðgæti. Fréttaritari
rann á hangikjötsilminn og óm af marg-
rödduðum söng frá reykkofanum við Lax-
árdal í Þistilfirði á dimmu desemberkvöldi,
þar sem nokkrar söngelskar „kaffistofukell-
ur“ hefja sína árlegu aðventuhátíð.
„Þetta byrjaði allt með því að mér datt
í hug að koma vinkonunum á óvart með að
halda „jóla-afterworkið“ eða jólaglöggið inni
í sveit í reykkofa foreldra minna en örstutt
er á milli bæja okkar. Við kellurnar vorum
vanar að hittast í sameiginlegu kaffistofunni
í byggingunni sem hýsti vinnustofur okkar
en reykkofahugmyndin sló í gegn og þetta
er sjöunda árið sem aðventuglöggið okkar
er þarna í kofanum,“ sagði Hildur Stef-
ánsdóttir, kaffistofukella og ferðaþjón-
ustubóndi í Holti í Þistilfirði.
- - -
Aðventugleðin í reykkofanum er nú
orðin hápunktur ársins hjá kaffistofukell-
unum en Hólmfríður húsfreyja í Laxárdal,
ásamt áðurnefndri Hildi, dóttur sinni, hefur
þá fært litla kofann í jólabúning með kerta-
ljósum, jólaglöggi og þjóðlegum veitingum.
Þar eru sungin jólalög og frumsaminn óður
til Hólmfríðar, sem hefur veg og vanda af
reykkofanum og matvælum þar ásamt Stef-
áni bónda sínum. Aðventugleði þessara
samhentu söngkvenna lýkur svo á gisti-
heimili Hildar, Grásteini, með hátíðar-
kvöldverði að hennar hætti og mun þar ekki
vera í kot vísað.
- - -
Sameining sveitarfélaganna Langanes-
byggðar og Svalbarðshrepps hefur verið til
umræðu um hríð og nýlega samþykkti
sveitarstjórn Langanesbyggðar tillögu við-
ræðunefndar um að hefja formlegar við-
ræður við Svalbarðshrepp um mögulega
sameiningu sveitarfélaganna. Einnig var
samþykkt tillaga um að stofnaður yrði sjóð-
ur um jarðir hins sameinaða sveitarfélags
ásamt drögum að samþykktum fyrir sjóð-
inn. Nokkrum þessara jarða fylgja verðmæt
laxveiðihlunnindi sem gefa af sér þó nokkr-
ar tekjur.
- - -
Íbúafundir hafa verið haldnir þar sem
ræddar voru hugmyndir um útfærslu mögu-
legrar sameiningar en þessi tvö sveitarfélög
eiga margt sameiginlegt, eru eitt atvinnu-
svæði og samrekstur á ýmsum sviðum. Ráð-
inn hefur verið verkefnisstjóri vegna máls-
ins og markviss vinna og undirbúningur
hefst strax í janúar. Stefnt er á að hægt
verði að kjósa um þessa sameiningu í mars-
lok eða byrjun apríl, að sögn Sigurðar Þórs
Guðmundssonar, oddvita Svalbarðshrepps.
- - -
Það styttist í að loðnuvertíð hefjist á
nýju ári en á Þórshöfn var búið að bræða
rúm 7.000 tonn af loðnu á síðustu vikum
fyrir áramót. Stöðug uppbygging hefur ver-
ið hjá Ísfélagi Vestmannaeyja á Þórshöfn en
með vorinu verður byrjað á stækkun frysti-
húss, um 400 m2. Vinnslurýmið verður
stækkað og útbúin ný starfsmannaaðstaða
en skrifstofur félagsins verða einnig í nýja
hlutanum.
Á Þórshöfn, eins og víðar á landinu, eru
bundnar miklar vonir við að loðnuvertíð árs-
ins verði happasæl og góð.
Morgunblaðið/Líney Sigurðardóttir
Jólaglögg Konurnar kátar í reykkofanum á aðventunni, með hangilæri umlykjandi með kræs-
ingar á borði og söngtexta í hendi. Sungin voru jólalög, m.a. frumsaminn óður til gestgjafans.
Aðventugleði í reykkofa hápunkturinn
Þórshöfn Reykkofinn sem hýsti gleðina.
20 FRÉTTIR
Innlent
MORGUNBLAÐIÐ FÖSTUDAGUR 31. DESEMBER 2021
Framfarasjóður Samtaka iðnaðar-
ins hefur veitt fjórum verkefnum
styrki samtals að upphæð átta
milljónir króna. Við val á verkefn-
unum er horft til þess að þau efli
menntun í iðn-, verk- og tækni-
námi, að um sé að ræða nýsköpun
sem styrki framþróun í iðnaði og
að þau leiði til framleiðniaukn-
ingar.
Sjóðurinn var stofnaður árið
2016 í þeim tilgangi að skapa far-
veg sem styður við og þróar fram-
faramál tengd iðnaði. Sjóðnum bár-
ust átta umsóknir að þessu sinni, að
því er fram kemur í tilkynningu frá
Samtökum iðnaðarins.
Eftirtaldir aðilar hlutu styrki
Framfarasjóðs SI vegna fjögurra
verkefna: Málarameistarafélagið,
Eiríkur Ástvald Magnússon og
Sylgja Dögg Magnúsdótir, Qair
Iceland og Starfsgreinahópur
fyrirtækja í prentiðnaði innan SI.
Málarameistarar fengu eina
milljón í styrk til að þýða, prenta
og dreifa kynningarbæklingi sem á
að tryggja að allir verkkaupar taki
út vinnubrögð málara eftir sam-
ræmdum viðmiðunum. Eiríkur og
Sylgja fengu tveggja milljóna
króna styrk til að greina stöðu
námsgagna og kennslu varðandi
rakaöryggi bygginga og greina
þarfir á gerð uppfærðra náms-
gagna á þessu sviði fyrir íslenskar
aðstæður.
Qair Iceland fékk 2,5 milljónir til
rannsókna á laga- og reglugerðar-
umhverfi á Íslandi fyrir vetnis- og
rafeldsneytisframleiðslu. Starfs-
greinahópur prentiðnaðarins fékk
einnig 2,5 milljónir sem fara í
fræðsluátak um sjálfbærni pappírs-
og prentkostnaðar. Átakið er unnið
í samstarfi við evrópsku samtökin
Two sides og íslenska skógfræð-
inga.
Framfarasjóð-
ur SI styrkti
fjögur verkefni
Ljósmynd/Birgir Ísleifur
Framfarir Við afhendingu styrkja, talið f.v.: Jón Svan Sverrisson, fjármálastjóri Svansprents, Sigurður Hannesson,
framkvæmdastjóri SI, Tryggvi Þór Herbertsson, formaður Qair Iceland, Jóhanna Klara Stefánsdóttir, sviðsstjóri
mannvirkjasviðs SI, Eiríkur Ástvald Magnússon byggingarverkfræðingur, Árni Sigurjónsson, formaður SI, Már
Guðmundsson, formaður Málarameistarafélagsins, og Sigríður Mogensen, sviðsstjóri iðnaðar- og hugverkasviðs SI.