Morgunblaðið - 19.03.2022, Blaðsíða 10

10 FRÉTTIR
Innlent
MORGUNBLAÐIÐ LAUGARDAGUR 19. MARS 2022
Höskuldur Daði Magnússon
hdm@mbl.is
„Það hafa komið tímabil þar sem
snjór og bylur trufluðu en fram-
kvæmdirnar eru meira og minna á
áætlun,“ segir Gísli Ásgeirsson,
framkvæmdastjóri Six Rivers Pro-
ject.
Miklar framkvæmdir standa nú
yfir í Vopnafirði við byggingu veiði-
húsa á vegum breska auðmannsins
Jims Ratcliffes. Annars vegar er
verið að byggja nýtt og stór-
glæsilegt hús í Vesturárdal en hins
vegar stækka veiðihúsið við Selá. Ís-
lenskir aðalverktakar sjá um bygg-
ingu hússins í Vesturárdal en Mæli-
fell á Vopnafirði um stækkunina við
Selá. Framkvæmdirnar hafa ekki
farið fram hjá neinum í Vopnafirði
enda efnisflutningar tíðir og þá hef-
ur þurft að flytja vinnuafl á staðinn.
Þannig hafa starfsmenn Íslenskra
aðalverktaka lagt undir sig Hótel
Tanga og eru öll herbergi þar bókuð
heilt ár fram í tímann.
„Stækkunin við Selá klárast
sennilega eftir einn og hálfan mánuð
eða svo og verður tilbúin fyrir sum-
arið. Stefnt er að verklokum í Vest-
urárdal á næsta ári,“ segir Gísli.
Eins og kom fram í Morgun-
blaðinu þegar uppbygging Ratcliffes
var kynnt síðasta sumar hyggst
hann leggja minnst fjóra milljarða í
byggingu fjögurra nýrra veiðihúsa á
næstu misserum. Auk áðurnefndra
húsa eru þetta veiðihús við Hofsá í
Vopnafirði og Miðfjarðará í Bakka-
firði. „Við erum að ræða við bændur
við Hofsá um það hvort þeir vilji
nýtt hús, við erum að semja um það.
Hönnun á húsinu við Miðfjarðará er
lokið og búið að velja staðsetningu
þess. Nú er verið að gera nákvæma
kostnaðaráætlun og fara í val á
tækjum, efnisval og fleira. Við von-
umst til að geta byrjað á því húsi
síðar á þessu ári,“ segir Gísli.
Fundað með heimamönnum
Áform Jims Ratcliffes lúta að því
að hingað komi fleiri laxveiðimenn
sem láti sig, líkt og hann sjálfur, við-
gang og verndun norðuratlantshafs-
laxins varða. „Við áttum fund með
landeigendum og bændum á dög-
unum þar sem við vorum að kynna
fyrstu niðurstöður úr þessum rann-
sóknarverkefnum sem hafa verið
sett í gang. Það var mjög áhuga-
verður fundur og alltaf gaman að
heyra álit heimamanna á hlut-
unum,“ segir Gísli. Hann segir að
rannsóknarstarfið og uppbygging
við árnar vinni saman. „Til þess að
hægt sé að búa til tekjur sem standa
undir þessum rannsóknarverk-
efnum þarf að sækja viðskiptavini
sem vilja borga hærra verð. Slíkir
viðskiptavinir óska eftir betri að-
stöðu en við höfum áður getað boð-
ið.“
Og það virðist ljóst að nýju húsin
munu svara þeirri eftirspurn. Þann-
ig er viðbyggingin við Selá sögð
vera ein stór svíta eða álma sem
ætluð er einum viðskiptavini hverju
sinni. Veiðihúsið í Vesturárdal er í
raun sex hús saman í þyrpingu auk
bílskúrs og hlöðu. Þau verða alls um
1.400 fermetrar en rúma samt að-
eins 16 gesti í gistingu, að því er
fram kemur í greinargerð sem lögð
var fram þegar deiliskipulag svæð-
isins var gert. Húsið er nokkuð af-
skekkt, það stendur ofar í hlíðinni
en almennt er um sveitabæi á þess-
um slóðum. Ratcliffe lét leggja veg
frá þjóðveginum að lóð veiðihússins,
alls um 1,8 kílómetra leið.
Risaframkvæmd Ratcliffes á áætlun
- Byggir stórt veiðihús í Vesturárdal í Vopnafirði - 1.400 fermetrar undir sex hús, bílskúr og hlöðu
- Lét leggja nýjan veg - Hótelið á staðnum lagt undir verkamenn - Veiðihúsið við Selá stækkað
Bygging Framkvæmdir í Vesturárdal hófustu í haust og hafa ekki farið
fram hjá neinum í Vopnafirði. Miklir efnisflutningar hafa verið frá svæðinu.
Mynd/PWP Architects
Veiðihús Svona mun svæðið í landi Ytri-Hlíðar líta út samkvæmt tölvuteikn-
ingu arkitektanna. Alls er um að ræða sex hús auk hlöðu og bílskúrs.
Morgunblaðið/Einar Falur
Selá Gísli Ásgeirsson og sir Jim
Ratcliffe í Selá sumarið 2019.