Skinfaxi - 01.01.2017, Síða 3

SKINFAXI tímarit Ungmennafélags Íslands 3
Þ ótt aðeins rúmt ár sé liðið frá stofn-
un íþróttafélagsins Vestra á Ísafirði
er þegar farið að kveða að kepp-
endum á stórmótum. Formaður
félagsins segir hagræði felast í sameiningu
en að nokkur tími muni líða áður en sam-
legðaráhrif verða komin fram að fullu.
„Sameining íþróttafélaga tekur tíma og
ýmislegt sem þarf að slípa. Það er óraunhæft
að ætla að ná fram öllum kostunum á einu til
tveimur árum. Tíu ár er nærri lagi,“ segir Hjalti
Karlsson, formaður Íþróttafélagsins Vestra á
Ísafirði. Félagið fagnaði ársafmæli í janúar
síðastliðnum. Það var stofnað 16. janúar 2016
þegar fjögur félög gengu í eina sæng í deilda-
skiptu íþróttafélagi.
Mjög var vandað til undirbúningsins, sem
stóð yfir í á annað ár. Þetta var önnur atlagan
að sameiningu félaganna en fyrir áratug
hafði verið reynt að sameina öll íþróttafélög-
in í Ísafjarðarbæ. Fulltrúar annarra fjölgreina-
félaga voru á meðal þeirra sem fengnir voru
til ráðgjafar. Hjalti segir þá hafa verið sam-
mála um að sameining íþróttafélaga tæki
tíma og þó að kostirnir við sameiningu væru
augljósir þyrfti nýtt félag ákveðinn aðlögun-
artíma til að þeir kæmu að fullu í ljós. Enginn
efaðist hins vegar um að miklir möguleikar
byggju í nýju félagi.
„Markmiðið er bæði af félagslegum og
rekstrarlegum toga. Það eru mikil tækifæri
fólgin í því að reka margar greinar undir einu
merki. Við höfum sett aðalstjórn yfir stjórnir
deilda og verið að vinna í ýmsum málum
sem gagnast öllum. Þar á meðal sameigin-
legum styrktaraðilum, samskiptum við bæj-
arfélagið og fleira sem kemur félaginu og
deildum þess til góða. Stærra félag með fleiri
iðkendur getur náð hagstæðari samningum
en ella, til dæmis lægra verði í innkaupum á
þjónustu og búnaði. Við sjáum sérstaklega
fyrir okkur aukið hagræði í ferðakostnaði,
hagstæðari samninga við bílaleigur og margt
fleira. Ferðakostnaðurinn er ævintýralega hár
og þurfa sumar deildir að greiða milljónir í
ferðakostnað,“ segir Hjalti en sem dæmi spil-
ar meistaraflokkur karla í knattspyrnu nær
eingöngu við lið á Austur- og Norðurlandi
næsta sumar. Það kallar á mikil útgjöld.
Hjalti segist ennfremur binda vonir við
að félagið geti áður en langt um líður ráðið
starfsmann sem sjái um ýmis praktísk mál
fyrir deildirnar, það léttir vinnu af stjórnar-
mönnum deilda sem allir leggja fram mikla
sjálfboðavinnu fyrir félagið í frítíma sínum.
„En síðast en ekki síst er það félagslegi
þátturinn við sameininguna sem skiptir gríð-
arlega miklu máli því það eykur samkennd
og samtakamátt að tilheyra stóru félagi þar
sem allir bera sama búninginn undir sama
merki,“ segir Hjalti að lokum.
Langþráð markmið náðust eftir sameiningu
Hamingjan skein úr andlitum drengjanna í 9. flokki þegar þeir fögnuðu langþráðum sigri í körfubolta. Mynd: Bára Dröfn Kristinsdóttir – karfan.is.
Íþróttafélagið Vestri varð til 16. janúar
2016 með sameiningu Boltafélags
Ísafjarðar (BÍ), Körfuknattleiksfélags
Ísafjarðar (KFÍ), Sundfélagsins Vestra,
Blakfélagsins Skells og knattspyrnu-
hluta Ungmennafélags Bolungavíkur.
„Við erum stolt af því að margir krakk-
ar frá okkur í knattspyrnu, blaki og
körfu hafa verið að banka á dyrnar í
unglingalandsliðunum,“ segir Hjalti.
Fleiri iðkendur hafa verið að gera
góða hluti á landsvísu. Karlalið
Vestra í blaki náði eftirtektarverðum
árangri og mun leika í undanúrslitum.
Athygli vakti þegar drengir í 9. flokki
Vestra í körfubolta sigruðu Val í
úrslitaleik í Maltbikarkeppninni en
Valur er ríkjandi Íslandsmeistari í
þessum aldurshópi. Annað eins hafði ekki sést fyrir vestan
síðan 2. flokkur kvenna á Ísafirði varð Íslandsmeistari í
körfubolta árið 1967. Drengirnir kepptu í nýjum búningum
Vestra en þeir voru keyptir sérstaklega fyrir úrslitakeppnina.
„Það þótti ótækt að senda strákana í sjónvarpið í gömlu
búningunum,“ segir Hjalti og er augljóslega ánægður með
að fyrsti titill hins nýja félags, Vestra, skuli vera kominn í hús.
Það þótti ótækt að senda strákana
í sjónvarpið í gömlu búningunum
Hjalti Karlsson,
formaður Íþrótta-
félagsins Vestra.
Knattspyrnulið Vestra lék í 2. deild síðastliðið sumar og endaði í 6. sæti.