Goðasteinn - 01.09.2023, Síða 255

253
Goðasteinn 2023
haft með sér til að leika sér á. Hún óð út í sjóinn og settist svo á slönguna, sem
auðvitað lagði af stað frá landi. Það kostaði víst smá vesen að ná henni aftur til
lands.
Þegar hún starfaði í Hrauneyjum, um 1980, vann hún eitt sinn utanlandsferð
í bingói. Hún lét nú fátt stöðva sig hún Sigga, heldur fjárfesti í ferð til Mallorka
og skellti sér þangað mállaus og alein. Hún lifði lengi á þessari ferð og kom
heim með þykka ferðatösku, fulla af allskyns spænskum styttum, sem sumar
hverjar geymdu marglita, görótta drykki. Það var endalaust tilefni hláturs og
gamansagna í fjölskyldunni.
Síðustu árin átti Sigga heimili á Kirkjuhvoli á Hvolsvelli eins og áður sagði.
Það lýsir henni vel að hún sótti þar um sjálf og flutti sig nánast hjálparlaust
þangað, enda afskaplega sjálfstæð og fyrirhyggjusöm kona alla tíð. Hún átti
góðan tíma á Kirkjuhvoli og undi sér við handavinnu og það sem í boði var
fyrir heimilisfólk og eldri borgara, auk þess að vera dugleg að heimsækja fólkið
sitt.
Hægt og rólega færðist svo kvöldið og nóttin yfir með árunum og hvíldin var
kærkomin. Hún lést á Kirkjuhvoli, 20. september 2022, 97 ára að aldri.
Sigríður var jarðsett í Ásólfsskálakirkjugarði, 8. október 2022.
Haraldur M. Kristjánsson
fyrrv. sóknarprestur