Golf á Íslandi - 01.06.2017, Side 8

Í vor felldi Golfsamband Íslands niður þá rótgrónu kröfu
að mót á vegum sambandsins færu fram á 18 holu
golfvöllum. Holufjöldi mótsvalla var þar með gefinn frjáls.
Í tilkynningu um þá ákvörðun lét ég hafa eftir mér að
þarfir kylfinga og annarra sem hafa áhuga á heilnæmri
útivist hafi breyst mikið og muni halda áfram að gera það.
Ákvörðun GSÍ vakti talsverða athygli á alþjóðavettvangi. Banda­
ríska golftímaritið Links Magazine spurði m.a. í fyrirsögn sinni
hvort framtíð golfleiksins væri að finna á Íslandi (e. Will Golf‘s
Future Emerge from Iceland?). Í greininni segir m.a: „Uppátæki
Golfsambands Íslands breyta venjulega litlu um það hvernig
Bandaríkjamenn stunda golfið sitt, en í þessu tilviki gæti frumkvæði
landsins haft mikla þýðingu fyrir framtíð golfleiksins.“ Við hvaða
annað tilefni gætum við lesið viðlíka umfjöllun um golf á Íslandi í
útbreiddu bandarísku golftímariti, þar sem þeirri spurningu er varpað
fram, grínlaust, hvort lykilinn að framtíð íþróttarinnar sé að finna á
eyjunni fögru? Oft veltir lítil þúfa þungu hlassi.
Þessi jákvæðu viðbrögð hvöttu okkur til dáða og var lauslega rætt
um möguleikann á að halda Íslandsmótið í holukeppni á golfvelli
með færri en átján holur í náinni framtíð, enda er holukeppi
heppilegasta keppnisfyrirkomulagið fyrir óhefðbundinn holufjölda.
Forgjafarútreikningur skiptir engu máli auk þess sem hefðbundin
holukeppni er sjaldnast akkúrat 18 holur, henni lýkur yfirleitt
fyrr og stundum síðar. Það sama gildir ekki um höggleiksmót og
forgjafarreglur standa þessu beinlínis í vegi.
Örlögin réðu því að tækifærið gafst fyrr en áætlað var. Íslandsmótið
í holukeppni fer fram í Vestmannaeyjum að þessu sinni en eins og
flestir vita er völlurinn átján holur. Nokkrar flatir vallarins voru því
miður ekki í viðunandi ástandi og vill golfsambandið bjóða sínum
bestu kylfingum upp á bestu mögulegu keppnisaðstæður hverju
sinni. Upp var því komin snúin staðan, sem í raun getur skotið upp
kollinum á hverjum einasta golfvelli landsins, hvort sem það er
vegna kals, sjávarseltu eða annarra náttúruástæðna. Þetta þarf ekki
að vera eitthvert feimnismál og stundum veitir okkur ekki af meiri
auðmýkt gagnvart náttúruöflunum.
Mótshaldarar stóðu því frammi fyrir þremur valkostum. Í fyrsta
lagi að leika á hinum skemmdu flötum. Í öðru lagi að færa mótið á
annan golfvöll og í þriðja lagi að leika færri en átján holur vallarins.
Fyrsti kosturinn kom aldrei til greina, því eins og áður segir þá
viljum við bjóða upp á bestu keppnisaðstæður hverju sinni. Slæmar
flatir falla ekki þar undir. Annar kosturinn krafðist þess að finna
hefði þurft annan golfvöll með afar skömmum fyrirvara, sem alls
ekki er hlaupið að, auk þess sem kylfingar og golfklúbburinn í Eyjum
hefðu orðið fyrir fjárhagstjóni vegna breytinganna. Golfklúbburinn
var búinn að fjárfesta mikið í mótinu og margir keppendur búnir að
kaupa sér ferðir og gistingu umrædda helgi. Þriðji kosturinn blasti
því við og ákveðið var að fækka holunum.
Svo því sé haldið til haga þá hefði verið hægt að leika 18 holur,
þótt einungis hefðu verið notaðar 13 holur til þess - með því að
leika sumar holur tvisvar sinnum. Við ákváðum hins vegar að ganga
alla leið í þeim hugmyndum sem við höfðum áður rætt og tókum
ákvörðun að Íslandsmótið yrði leikið á 13 holum.
Það er ekkert leyndarmál að gripið var til þessa ráðs vegna ástands
tiltekinna flata á vellinum og eins og áður segir þarf það ekki að
vera neitt feimnismál. Þótt kringumstæðurnar hefðu mátt vera aðrar
þá breytir það ekki því að hugmyndin að baki er góð. Það hefur
því verið undarlegt að lesa gagnrýni þeirra sem telja hugmyndina
um sveigjanlegan holufjölda góða en telja á sama tíma rangt að
hrinda henni í framkvæmd vegna vallaraðstæðna. Full ástæða
er til að benda á að hugmyndafræðin að baki sveigjanlegum
holufjölda snýr einmitt að því að leysa vandamál sem upp geta
komið. Það má reyndar segja að ákvörðun um að halda 13 holu
golfmót á fullkomnum 18 holu velli sé í raun glórulaus því þá væri
hugmyndinni einungis hrint í framkvæmd, hugmyndarinnar vegna.
Viðbrögð kylfinga við þessari nýbreytni voru misjöfn og voru
nokkrir ósáttir við hugmyndina. Það er vel skiljanlegt. Golfíþróttin
hefur verið leikin með íhaldssömum hætti um langa hríð og
breytingar geta verið umdeilanlegar og kallað fram sterk viðbrögð.
Það er engu að síður áhugavert að horfa til þess að í sögulegu
samhengi hefur 18 holu golfleikur einungis verið ríkjandi í um
fjórðung af sögu golfíþróttarinnar.
Golfsambandið og Golfklúbbur Vestmannaeyja gerðu sitt besta
í snúinni stöðu, með skömmum fyrirvara, og ákváðu að breyta
vandamáli í tækifæri. Rétt er að velja gæði umfram magn og þegar
öllu er á botninn hvolft þá skiptir holufjöldinn ekki öllu máli. Sá
kylfingur sigrar, sem best leikur.
Haukur Örn Birgisson
Forseti Golfsambands Íslands
Oft veltir lítil þúfa þungu hlassi
8 GOLF.IS - Golf á Íslandi
Forseti Golfsambands Íslands