Dagur - 22.08.1992, Blaðsíða 6

6 - DAGUR - Laugardagur 22. ágúst 1992
Hestar
Ævintýraferðir yfir Kjöl og
í Mývatnssveit með Hestasporti
Tveir ungir Skagfirðingar, þeir Björn Sveinsson á Varmalæk
og Magnús Sigmundsson frá Vindheimum, eiga og reka
ferðaþjónustufyrirtækið Hestasport í Skagaflrði. Tilurð
Hestasports má rekja allt aftur til ársins 1974, þegar Sveinn
á Varmalæk, faðir Björns, hóf að fara í hestaferðalög með
erlenda ferðamenn. Segja má að Sveinn hafí í raun verið
upphafsmaður að hestaferðum fyrir erlenda ferðamenn eins
og fyrirkomulag þeirra er í dag um land allt. Þegar Sveinn
lést fyrir nokkrum árum héldu Björn sonur hans og Magnús
þessari starfsemi áfram. Samstarf þeirra hófst árið 1986 og í
dag er á vegum Hestasports rekin margþætt ferðamanna-
þjónusta, sem byggð er að öllu leyti á íslenska hestinum. Hjá
Hestasporti eru um þessar mundir hátt á annað hundrað
hestar á járnum. Magnús Sigmundsson varð við þeirri ósk að
svara nokkrum spurningum um starfsemina, en vegna mikilla
anna reyndist ógerlegt að ná tali af þeim félögum báðum,
Magnúsi og Birni, samtímis.
- Magnús, hvernig gengur
rekstur Hestasports?
„Fyrirtækið hefur fengið að
þróast hægt og rólega enda tekur
mörg ár að skapa sér sess á ferða-
markaðnum. Það sem stendur
allri ferðaþjónustu fyrir þrifum
og einnig okkur er hvað það er
skammur tími á hverju ári sem
fyrirtækið getur starfað. Það er
að segja aðeins á meðan erlendir
ferðamenn eru hér á landi yfir
hásumarið. í dag rekum við tvær
hestaleigur, aðra í tengslum við
tjaldstæðin við Steinsstaðaskóla
og hina við tjaldstæðin í Varma-
hlíð. Á okkar vegum eru haldin
reiðnámskeið fyrir erlenda ferða-
menn en einu slíku er að ljúka
um þessar mundir. Einnig förum
við í lengri hestaferðalög yfir
Kjöl, milli Skagafjarðar og
Mývatnssveitar og höldum sýn-
ingar á íslenska hestinum á Vind-
heimamelum. Eftirspurnin hefur
vaxið stig af stigi allt þar til nú en
mér virðist vera ákveðið bakslag
í allri ferðaþjónustu í ár. Hins
vegar halda langferðirnar hjá
okkur nokkuð sínum hlut enda
yfirleitt bókaðar langt fram í tím-
ann og draumaferðir þeirra sem í
þær ætla. Fækkun á ferðamönn-
um kemur fram í hestaleigunum
og styttri hestaferðum. Hjá
Hestasporti komu hestasýning-
arnar á Vindheimamelum hins
vegar inn sem nýr þáttur nú í vor
og það vegur á móti minni eftir-
spurn á öðrum sviðum.“
- Telur þú ferðaþjónustu
mikilvæga fyrir hestamennsku
sem atvinnugrein?
„Ferðaþjónusta sem byggir á
íslenska hestinum er að mínum
dómi gífurleg lyftistöng fyrir
hestamennsku sem atvinnugrein.
Bæði vegna þeirrar kynningar
sem hún er á hestinum og vegna
þeirra atvinnutækifæra sem hún
skapar. Þeir ferðamenn sem
kynnast íslenska hestinum hér og
hrífast af honum eru væntanlegir
viðskiptavinir þeirra sem ala upp,
temja og selja hross til útflutn-
ings. Það kemur oft fyrir að gestir
okkar vilja ekkert fremur en
kaupa einn þeirra hesta sem þeir
hafa riðið á í hestaferðalaginu og
oft hefur okkur tekist að verða
við þeim óskum.“
Fjalltraustir
hestaleiguhestar
- Geta þeir sem varla vita hvað
snýr aftur eða fram á hrossi farið
á bak hjá ykkur í hestaleigunni?
„Já, ég held að það sé óhætt að
segja það. Hestarnir sem við not-
um í hestaleigurnar eru fjall-
traustir og því upplagt fyrir þá
sem aldrei hafa fengið tækifæri til
að fara á hestbak að nýta sér það.
Bæði íslenskir og erlendir ferða-
menn eru viðskiptavinir hjá
hestaleigunum og börn og ungl-
ingar hafa sérstaklega gaman af
heimsókn þangað. Algengast er
að farið sé í eins eða tveggja
klukkustunda útreiðartúr.
Klukkustund á hestbaki í hesta-
leigu kostar í dag kringum eitt
þúsund krónur. Það er kjörið fyr-
ir ferðamenn að stöðva bílinn við
einhverja hestaleigu og kynnast
íslenska hestinum af eigin raun í
stað þess að á í enn einni sjopp-
unni.“
Pílagrímsferöir
íslandshestaunnenda
- Á vegum Hestasports er farið í
allt að átta daga hestaferðalög
með erlenda ferðamenn. Hverjir
eru það sem kjósa að ferðast um
íslensk fjöll á hestum?
„Hestaferðalög í ýmsum
myndum eru stór þáttur í ferða-
þjónustu víðsvegar í heiminum
og hestaferðir á Islandi fylla upp í
þá mynd. Margir erlendu ferða-
mannanna sem fara í þessi ferða-
lög eru að koma hingað í eins-
konar pílagrímsferð. Þeir eiga
hugsanlega íslenska hesta erlend-
is eða hafa kynnst þeim þar og
vilja heimsækja landið þeirra.
Draumurinn er að fá tækifæri til
að kynnast íslenska hestinum á
heimavelli. Annar hluti ferða-
mannanna er hestafólk sem
aldrei hefur komið á bak á
íslenskum hesti en er vant stórum
hestum.
Flestir viðskiptavinir okkar eru
Þjóðverjar, Austurríkismenn eða
Svíar, en tölvert af Bandaríkja-
mönnum hefur einnig ferðast
með okkur. Sumir gesta okkar
eru búnir að spara og safna í tvö
þrjú ár til að geta komist í hesta-
ferðalag á íslandi. Þegar nóg er
orðið í buddunni koma þeir og
njóta hverrar mínútu til hins
ítrasta. Annar hluti viðskiptavina
okkar er verulega vel efnað fólk.
Við erum svo heppnir að sömu
ferðamennirnir kjósa að ferðast
með okkur aftur og aftur og vinir
þeirra og kunningjar. Það færir
okkur heim sanninn um að gestir
okkar eru ánægðir og að við
Björn Sveinsson á gæðingnum Hrímni.
erum á réttri leið. Ferðamennirn-
ir sem fara með okkur í hesta-
ferðirnar eru á öllum aldri allt frá
unglingum til ellilífeyrisþega og
það skemmtilegasta við þetta allt
saman er að við erum mun eftir-
sóttari af kvenkyninu en karlkyn-
inu.“
Bjóðum engum manni
upp á truntu
- Nú eruð þið nýkomnir úr
hestaferð frá Skagafirði í
Mývatnssveit. Hvernig gengur
slfk ferð fyrir sig?
„Við höfum farið í um það bil
sex langar hestaferðir á hverju
sumri. Við ríðum austur að
Mývatni á sjö dögum, áttunda
daginn skoða ferðamennirnir
Mývatnssveit, að. því loknu
kveðjum við hópinn og nýr hópur
ferðamanna kemur og ríður með
okkur úr Mývatnssveit í Skaga-
fjörð um Sprengisand. Við förum
yfirleitt eina ferð á sumri yfir
Kjöl, einn hópur fer með okkur
suður Kjöl og annar norður.
I langferðirnar leggjum við
upp með milli tíu og tuttugu
erlenda ferðamenn og um það bil
þrjá hesta á mann. Auk ferða-
mannanna eru nokkrir aðstoðar-
menn með í ferðinni, leiðsögu-
menn, bílstjóri og kokkur.
Hestaferðalögin hafa gengið
alveg ótrúlega vel miðað við hvað
þau eru í raun áhættusöm.
Erlendu ferðamennirnir standa
sig eins og hetjur og óhöpp eru
sem betur fer fátíð. í þessum
ferðum gistum við ýmist í gangna-
mannakofum, í tjöldum, ýmsum
fjallakofum eða hjá ferðaþjón-
ustubændum. Það er ávallt bíll
með í för og kokkurinn okkar sér
um alla matseld fyrir hópinn. Að
sjálfsögðu leggjum við áherslu á
íslenskan mat og íslenskt hráefni.
í baðstofunni í Baugaseli í
Barkárdal höfum við slegið upp
þorrablóti fyrir gesti okkar og
hefur það vakið mikla lukku.
Við gerum þær kröfur til okkar
að ferðamennirnir geti notið
hestaferðarinnar til hins ítrasta.
Þess vegna leggjum við metnað
okkar í að hafa góðan hestakost.
Við reiknum með þremur hestum
á mann og það er mjög erfitt að
finna nægilega marga hentuga
hesta. Það er útbreiddur mis-
skilningur að heppilegir ferða-
þjónustu- og hestaleiguhestar séu
einhverjar steindauðar truntur.
Hestarnir verða að vera viljugir
og getumiklir en samt sem áður
hrekklausir. Erlendu ferða-
mennirnir eru margir hverjir
mjög færir reiðmenn. Við verð-
um að gæta þess að bjóða þeim
ekki upp á lélega hesta, þeir eiga
ef til vill miklu betri hesta heima
hjá sér!“
- Er rekstur hestaferðaþjón-
ustufyrirtækis skemmtileg
atvinna, eða eigum við heldur að
segja aukabúgrein?
„Það er oft mjög gaman! Ótal
skemmtilegar stundir, annars
væri algjörlega útilokað að
standa í þessum rekstri því hann
krefst bæði ákaflega mikillar
vinnu og honum fylgir gífurlega
mikil ábyrgð,“ sagði Magnús.
Erum við náttúrusvín?
- Eru hestaferðalangarnir heill-
aðir af fegurð landsins?
„Vissulega eru þeir það, en við
íslendingar verðum að gæta þess
að lifa ekki í einhverjum drauma-
heimi í fullvissu þess að ísland sé
og verði „hreint land, fagurt
land“. í raun tel ég að við séum
allt að því náttúrusvín! Það sem
hefur bjargað okkur og landinu
er fyrst og fremst hvað við erum
fá. Nær alls staðar þar sem
mannaferðir eru að einhverju
marki má sjá rusl og drasl á víð
og dreif, auk þess er í mörgum
tilfellum skammarlegt hvernig
framkvæmdir okkar mannanna
hafa sett ör og lýti á landið. Við
verðum öll að líta í eigin barm,
einstaklingar, bændur, forsvars-
menn fyrirtækja, sveitarfélaga og
ríkisfyrirtækja, enginn er undan-
skilinn þegar náttúra landsins er
annars vegar.
Við sem störfum við ferða-
þjónustu erum sífellt minnt á
mikilvægi náttúruverndar því að
glöggt er gestsaugað. Ferða-
mennirnir sem ríða með okkur
um öræfi íslands taka eftir þess-
um hlutum í landinu sem auglýst
er hreint og ómengað. Ég verð að
viðurkenna að oft hef ég dauð-
skammast mín og virkilega orðið
að bíta á jaxlinn þegar þessi mál
hafa komið upp á yfirborðið.
íslendingar, minnumst þess að
ósnortin náttúra er listaverk, sem
okkur ber að varðveita eins og
gull!“