Morgunblaðið - 20.11.2003, Blaðsíða 2
2 B FIMMTUDAGUR 20. NÓVEMBER 2003 MORGUNBLAÐIÐ
NFRÉTTIR
Viðskiptablað Morgunblaðsins Kringlunni 1, 103 Reykjavík, sími 5691100, netfang
vidsk@mbl.is Útgefandi Árvakur hf. Umsjón Guðrún Hálfdánardóttir, fréttastjóri gu-
na@mbl.is Auglýsingar sími 5691111 netfang augl@mbl.is Bréfsími 5691110 Prentun
Prentsmiðja Árvakurs hf.
HAGNAÐUR Granda hf. á fyrstu 9 mánuðum
ársins 2003 nam 765 milljónum króna eftir skatta. Á
sama tímabili á síðasta ári var hagnaður 1.425 millj-
ónir og dróst hann því saman um 46% milli ára.
Rekstrartekjur fyrirtækisins á tímabilinu námu
3.825 milljónum króna samanborið við 4.546 millj-
ónir króna á sama tíma á síðasta ári, sem er 16%
tekjulækkun.
Rekstrarhagnaður fyrir afskriftir var 747 millj-
ónir króna eða 19,5% af rekstrartekjum samanbor-
ið við 1.220 milljónir króna, eða 26,8% fyrir sama
tímabil árið áður. Veltufé frá rekstri nam 717 millj-
ónum króna, sem er um 18,7% af rekstrartekjum
samanborið við 978 milljónir, eða 21,5% á sama tíma
árið áður. Eiginfjárhlutfall Granda í lok tímabilsins
er 38% en var 39% á sama tíma í fyrra.
Samkeppni frá Kína hefur áhrif
Í tilkynningu frá Granda segir að rekstur félagsins
hafi verið að þyngjast það sem af er árinu, eins og
hjá öðrum íslenskum sjávarútvegsfyrirtækjum. Áð-
ur hafi komið fram að breytingar á rekstrartekjum
og hagnaði skýrist af lækkandi afurðaverði á er-
lendum mörkuðum auk gengisbreytinga. Afurða-
verð hafi haldið áfram að lækka, bæði á sjó- og land-
frystum afurðum, og enn sé ekki ljóst hvort þessi
þróun hafi stöðvast. Þá segir í tilkynningunni að í
ljósi væntinga um hækkun gengis íslensku krón-
unnar og áframhaldandi harða samkeppni við ódýr-
ar tvífrystar afurðir frá Kína, sé við því að búast að
samkeppnisstaða og afkoma íslenskra sjávarút-
vegsfyrirtækja verði áfram erfið. „Því er leitað leiða
til að mæta breyttum aðstæðum á mörkuðum. Unn-
ið er að hagræðingu með aðgerðum til lækkunar
kostnaðar, en ljóst er að tekjur dragast saman frá
því sem vænst var. Hagræðingaraðgerðir fela með-
al annars í sér fjárfestingu í aukinni sjálfvirkni og
öðrum framleiðniaukandi tæknibúnaði sem vænst
er að skili sér í lækkuðum vinnslukostnaði,“ segir í
tilkynningunni.
Um 600 milljóna hagnaður
af sölu hlutabréfa
Rekstrarhagnaður af eigin starfsemi Granda var
264 milljónir króna samanborið við 731 milljón
króna á sama tíma árið áður. Liðurinn fjáreigna-
tekjur að frádregnum fjármagnsgjöldum var já-
kvæður um 520 milljónir króna, en á sama tíma í
fyrra var hann jákvæður um 909 milljónir króna. Sú
breyting hefur orðið frá fyrra ári að fjáreignatekjur
nú eru að stórum hluta hagnaður af sölu hlutabréfa,
eða um 600 milljónir króna. Á sama tímabili í fyrra
var hagnaður af sölu hlutabréfa 343 milljónir. Geng-
ismunur og verðbætur eru nú 23 milljónir, en voru
707 milljónir á fyrstu níu mánuðum ársins 2002.
Vaxtagjöld hafa lækkað úr 248 milljónum í 207
milljónir á milli ára.
Áhrif dóttur- og hlutdeildarfélaga voru jákvæð
um 76 milljónir samanborið við 135 milljónir á sama
tímabili árið 2002. Segir í tilkynningunni að lækk-
unin skýrist bæði af slakari afkomu hlutdeildar-
félaga sem og að hluta vegna sölu hlutafjár í hlut-
deildarfélögum.
Hagnaður fyrir frádrátt tekjuskatts nam 860
milljónum króna á móti 1.775 milljónum króna á
fyrra ári. Gjaldfærðar eru 95 milljónir króna í tekju-
og eignaskatt.
Heildareignir Granda í lok septembermánaðar
voru 15.074 milljónir króna og höfðu hækkað um
rúmar þúsund milljónir frá árinu áður. Eigið fé var
5.786 milljónir og skuldir 9.288 milljónir.
Á fyrstu 9 mánuðum þessa árs seldi Grandi 9,9%
hlut sinn í SH, 7,2% hlut sinn í Fiskmarkaði Íslands,
þriðjung af 15% hlut í Hraðfrystihúsinu Gunnvöru
og 4,8% hlut sinn í Eimskipafélagi Íslands. Hlutur
félagsins í Fiskeldi Eyjafjarðar var aukinn úr 0,1% í
4,4% og í júní eignaðist Grandi hf. 70% hlutafjár í fé-
laginu Salar Islandica.
Grandi hagnast um
765 milljónir króna
Hagnaðurinn dróst saman um 46% miðað við síðasta ár þegar hann var 1.425 milljónir króna
650 starfsmenn sænska símafyr-
irtækið Ericsson fengu uppsagnarbréf í
gær og má búast við enn frekari upp-
sögnum á næstunni, að því er fram kem-
ur í dagblaðinu Dagens Industri. Flestir
þeirra sem missa vinnuna eru starfs-
menn upplýsingatæknideildar félagsins.
Þegar afkoma félagsins á þriðja árs-
fjórðungi var kynnt þá kom fram að
starfsmenn Ericsson hafi verið í lok
september rúmlega 53 þúsund alls en á
sama tíma í fyrra voru þeir tæplega 72
þúsund. Alls hefur þeim fækkað um
26%.
Ericsson hefur verið rekið með tapi
frá árinu 2001.
REUTERS
Uppsagnir
hjá Ericsson
EITT stærsta fyrirtæki heims,
General Electric samsteypan
bandaríska, er bjartsýnt á fram-
tíðina. Stjórnarformaðurinn, Jeffrey
Immelt, sagði frá því fundi með
fjárfestum og greiningaraðilum á
þriðjudag að fyrirtækið ætli að ein-
beita sér að tvenns konar starfsemi,
heilbrigðistækni og skemmt-
anaiðnaði. Sagði hann breytingarn-
ar lið í því að samsteypan gæti ein-
beitt sér að starfsemi í hröðum
vexti.
Haft er eftir stjónarformanninum
í frétt Reuters að hann geri ráð
fyrir að 11 af 13 fyrirtækjum
samstæðunnar muni auka hagnað
sinn á næsta ári, vegna hagstæðra
skilyrða í hagkerfinu.
GE kynnti á fundinum þær fyr-
irætlanir sínar að selja í opnu útboði
bréf í fyrirtækjum í eigu samsteyp-
unnar á sviði fasteignaviðskipta- og
líftrygginga. Bréfin í félögunum
sem GE ætlar að selja verða seld í
opnu útboði. Immelt sagði að útboð-
ið væri mikilvægt skref fyrir fyr-
irtækið þar sem fyrrnefnd starfsemi
er ekki í miklum vexti. GE hyggst í
nánustu framtíð leggja mesta
áherslu á tvennt: heilbrigðistækni,
en fyrirtækið er einn stærsti fram-
leiðandi heims á lækningatækjum,
og skemmtanaiðnaðinn. Meðal
eigna GE á því sviði er bandaríska
sjónvarpsstöðin NBC.
„Næstu tvö ár verða nokkuð stöð-
ug,“ er haft eftir Immelt í frétt Reu-
ters. Hann kvaðst bjartsýnn á fram-
tíð fyrirtækisins þótt veltan myndi
líklega minnka á næstunni og hagn-
aður á þessu ári sé undir áætlunum.
Immelt segir áhrif breytinganna
sem nú eru gerðar ekki koma fram
fyrr en á árinu 2005. Þá muni hlut-
hafar sjá 15% aukningu hagnaðar
samstæðunnar. Hagnaður fyrirtæk-
isins jókst verulega á árinu 2001 en
vöxtur hefur verið hægari á þessu
ári og því síðasta.
GE spáir því að hagnaður á hlut í
fyrirtækinu verði á milli 1,55 og 1,65
dalir á hlut á næsta ári, sem er ögn
bjartsýnna en greiningaraðilar gera
ráð fyrir.
Bjartsýni og breytingar hjá GE
Reuters
Jeffrey Immelt, sem tók við stjórnarfor-
mennsku hjá GE af Jack Welch, segir
samsteypuna vilja einbeita sér að starf-
semi í hröðum vexti.
Megináhersla General Electric verður lögð á
rekstur í heilbrigðistækni og skemmtanaiðnaði
● BANDARÍSKA leikfangakeðjan Toys "R" Us ætlar að
loka 146 Kids "R" Us og 36 Imaginarium verslunum, og
segja upp 3.800 starfsmönnum. Þetta samsvarar 11% af
heildarfjölda verslana félagsins sem alls eru 1.629 um all-
an heim. Ástæða lokunarinnar er versnandi afkoma fyr-
irtækisins á þriðja fjórðungi þessa árs sem einkum er rak-
in til of hás stjórnunarkostnaðar og stöðnunar í sölu.
Kids "R" Us er barnafatakeðja og Imaginarium er
þroskaleikfangakeðja, hvort tveggja í eigu Toys "R" Us.
Toys "R" Us er önnur stærsta dótabúð í Bandaríkjunum
á eftir Wal-Mart, en Wal-Mart er stærsta stórmark-
aðskeðja í heimi. Toys "R" Us segir að lokun verslananna
ætti að auka rekstrarhagnað félagsins um 8 milljónir doll-
ara á næsta ári, eða 600 milljónir króna, og 20 milljónir ár-
ið þar á eftir, eða sem samsvarar 1.500 milljónum króna.
„Afkoma þessara búða hefur farið hratt hnignandi sem
hefur leitt til þeirrar niðurstöðu að það sé félaginu og hlut-
höfum fyrir bestu að loka verslununum,“ sagði John J.
Eyler, forstjóri og stjórnarformaður félagsins.
Toys "R" Us tapaði 38 milljónum Bandaríkjadala á síð-
asta ársfjórðungi sem endaði í nóvember, en á sama tíma
á síðasta ári var tapið 27 milljónir dollara.
AP
Kids "R" Us-verslunin í Lawrenceville í New York í Bandaríkjunum er ein þeirra búða sem á að loka.
Toys "R" Us lokar 182 verslunum
VERÐ á gulli fór í gær yfir 400 dali
únsan í fyrsta skipti frá árinu 1996. Í
frétt Reuters kemur fram að þetta
stafi af óvissu á alþjóðavettvangi og
gengislækkun dalsins gagnvart evr-
unni. Verðið fór þó aftur undir 400
dali þegar evran lækkaði á ný og að
sögn gjaldeyrismiðlara staðfestir
það að hækkun gullsins hafi verið
vegna gjaldeyrisáhrifa.
Gull yfir
400 dali
◆