Fréttablaðið - 20.04.2007, Page 40

BLS. 8 | sirkus | 20. APRÍL 2007
„Ég hef oft þurft að stappa í mig
stálinu til að fara ekki að gráta vegna
þess hversu erfitt þetta hefur verið en
ég hef aldrei fundið fyrir því að vilja
losna út úr þessu eða nenna ekki að
leika Silvíu Nótt. Það er gríðarlega
erfitt að leika svona spuna, maður
þarf alltaf að vera á tánum og
einbeittur. Það er gífurlegt álag og ég
viðurkenni að stundum var ég við það
að bugast. En spennan við að leika
þennan karakter er svakalega mikil.
Síðan er ég líka svo stolt af þessum
gjörningi okkar og það skiptir öllu
máli,“ segir Ágústa Eva.
Auðvelt að fara úr karakter
Eftir þriggja ára keyrslu sem Silvía
Nótt liggur beinast við að spyrja hvort
þetta ofdekraða og kjaftfora
ólíkindatól sem Silvía er sé ekki
orðinn hluti af Ágústu Evu? Er ekkert
erfitt fyrir hana að fara úr gervinu?
„Línan er óljós ennþá. Þótt fólk viti
að þetta er leikið þá gerir það sér ekki
alveg grein fyrir því. Það á erfitt með
að greina á milli. Núna þegar ég er
komin út úr skápnum og er bara
Ágústa Eva þá er fólk samt að koma
upp að mér og spyrja hvort ég geti
gefið því eiginhandaráritun. Þá er ég
beðin um að skrifa Silvía en ekki
Ágústa Eva. Þannig að nafnið mitt er
Silvía hjá rosalega mörgum. Ég vona
bara að fólk vilji ekki að að ég sé
Silvía Nótt. Það er rosalega gaman að
leika Silvíu Nótt en ég held að það sé
ekkert sérstaklega skemmtilegt að
vera hún. Hún er afskaplega
grunnhygginn og týndur einstakling-
ur. Það er ekkert grín að vera Silvía
Nótt,“ segir Ágústa Eva og hlær.
Og hún heldur áfram: „Þótt ég leiki
Silvíu Nótt þá er ég ekki hún og það er
ekki eins og ég hafi verið með
víbratorinn á lofti á hverju kvöldi
andsetin að reyna að koma mér úr
karakter. Það er ótrúlega gott að anda
og slaka á eftir Silvíu. Fólk vissi ekki
hver ég var fyrir utan Silvíu Nótt en ég
er bara stelpan sem var að leika Silvíu
Nótt í Eurovision og Evu Lind í
Mýrinni á sama á tíma. Það var
ekkert mál að hoppa á milli. Robert
De Niro hefur leikið mörg hlutverk en
hann er samt bara Robert De Niro í
lok dagsins.”
Enginn milljónamæringur
Sögur hafa gengið um að Ágústa
Eva hafi grætt mikla peninga á því að
leika Silvíu Nótt. Birt var frétt í Séð og
heyrt þar sem því var haldið fram að
hún hefði fengið 40 milljónir fyrir
nýjustu þáttaröðina Silvia Night frá
Skjá einum. Ágústa Eva segir það af
og frá að hún hafi orðið rík á þessu
ævintýri en bendir réttilega á að þetta
hafi verið nánast hennar eina vinna
undanfarin þrjú ár og hún hafi fengið
greidd laun í samræmi við það.
„Ég er ekki rík. Fjölmiðlar virka
svona. Það spurðist út að við hefðum
fengið 40 milljónir til að gera þessa
þáttaröð. Hún var tekin upp um allan
heim með miklu fleira fólki en við
vorum vön. Það kostaði þessa
upphæð en því var slegið fram eins og
ég hefði fengið það í minn vasa. Það
selur miklu meira að segja að ég hafi
fengið 40 milljónir. Það er ekki verið
að ljúga en sannleikanum er hagrætt,“
segir Ágústa Eva og virðist lítið kippa
sér upp við það þótt fréttir séu slitnar
úr samhengi.
„Við erum ekki í þessu fyrir
skjótfenginn gróða. Við leggjum allt
okkar í þetta. Þetta er ástríðan okkar.
Þetta er vinnan mín og ég lifi á þessu
en ég er ekki milljónamæringur. Ég
hefði hins vegar getað verið á
árshátíðum ef ég hefði viljað maka
krókinn almennilega. Þá hefði ég
verið úti um allt. Silvía Nótt hefði
getað mætt í fermingarveislur og
fengið fimmtíu þúsund kall fyrir en
það stangast líka á við hugmyndina á
bak við karakterinn. Er Silvía
manneskja sem myndi mæta á
árshátíð? Ég bara spyr. Hún hefur
nánast aldrei troðið upp þrátt fyrir
óteljandi beiðnir. Ég held líka að fólk
myndi ekki vilja fá hana því það er
aldrei að vita hvað gerist,“ segir
Ágústa Eva.
Subbulegt að tala um einkamál
Það er ekki hægt að fara í felur með
það að Ágústa Eva er afar myndarleg
ung kona og hafa ástarmál hennar oftar
en ekki ratað á forsíður tímarita og
blaða. Hún var til að mynda spyrt við
Frosta Logason í Mínus og tökumann á
Skjá einum. Hún vill hins vegar sem
minnst tjá sig sjálf um ástarmál sín.
„Ef Silvía væri hérna þá myndi hún
láta gamminn geysa um þetta efni en
mér finnst mín einkamál ekkert
sérstaklega spennandi. Mér finnst
það eiginlega bara subbulegt að tala
um það. Ég get ekki stjórnað því hvað
fólk sér og hvað fólk skrifar um en ég
get dregið línu. Ég hef ekki áhuga á
tilfinningaklámi í fjölmiðlum.“
Ertu á lausu?
„Guð veit það, ég veit það en þú
veist það ekki,“ segir Ágústa Eva og
flissar.
Fær aulahroll í viðtölum við
sjálfa sig
„Mér finnst ekki gaman að vera í
viðtölum, finnst það hreinlega ekki
spennandi. Þegar ég er Silvía Nótt þá
er ég að leika og þá er hægt að segja
og gera hvað sem er en svo eru
hlutirnir aðeins flóknari þegar maður
er sjálfur í viðtali. Þá fæ ég aulahroll
og hugsa af hverju ég sé að segja þetta
og hitt. Mér finnst gaman að vera í
sviðsljósinu þegar ég hef afsökun. Ég á
það til að vera feimin og mér finnst
vandræðalegt þegar ég þarf að segja
mínar skoðanir opinberlega. Ég
myndi aldrei hleypa neinum fjölmiðli
inn til að skoða nýja sófann minn eða
kúkinn í klósettinu. Ég er bara ekki
þannig,“ segir Ágústa Eva í byrjun
viðtalsins. Þegar Silvíu-brynjan er
fallin og meikið horfið úr andlitinu
vill hún helst fá að vera í friði.
Silvía er fín fyrir ferilskrána
Þegar talið berst að því hvað
framtíðin ber í skauti sér segir
Ágústa Eva margt spennandi vera
fram undan.
„Það er alltaf eitthvað í gangi. Fólk
má búast við öllu af okkur. Við hjá
Meistara alheimsins höfum nú
sleppt hendinni af Silviu Night. Hún
er komin í hendurnar á öðrum
aðilum sem sjá um útrásina á
plötunni Goldmine og þáttaröðinni
sem við gerðum á ensku. Það verður
gaman að fylgjast með því ævintýri,“
segir Ágústa Eva. Platan virðist
ganga vel í landann og er komin í
fyrstu sæti yfir söluhæstu plötur á
Íslandi. Það gefur góð fyrirheit fyrir
framhaldið erlendis enda er allt á
fullu við að undirbúa strandhögg á
erlendri grundu.
„Það er verið að skipuleggja
uppákomur og tónleika erlendis en ég
veit ekki hversu mikinn þátt ég þarf
að taka í því. Ef við höldum tryggð við
karakterinn þá verður þetta skemmti-
legt. Ef við förum hins vegar að fylgja
einhverjum meikreglum, vera bara
töff og ekki segja neitt dónalegt þá
erum við bara orðin Nylon, sem er
hundleiðinlegt. Ef þetta ævintýri
floppar þá er það frábært og í anda
Silviu,“ segir Ágústa Eva, sem þarf
varla að kvíða verkefnaleysi þegar
Silvíu Nótt sleppir.
„Ég held að það sé fínt fyrir
ferilskrána að hafa leikið Silvíu. Ég er
meira en Silvía Nótt. Ég hef fengið
fullt af tilboðum um að leika í
bíómyndum og á sviði. Ég hef hins
vegar ekki haft tíma til að taka að
mér nein önnur verkefni en það er
augljóst að listamannaferli mínum
lýkur ekki með Silvíu Nótt. Ég er í
þeirri stöðu að geta valið úr
verkefnum og tel mig vera lánsama.
Það eru ekki allir í sömu stöðu og ég
en mér finnst listamenn ekki nógu
duglegir sjálfir við að skapa eitthvað
heldur sitja á rassinum og bíða eftir
að verkefni komi upp í hendurnar á
þeim. Það þarf að sýna frumkvæði
og Silvía Nótt er lifandi sönnun þess
að slíkt getur vel gengið.“
Spurð hvort það sé eitthvað utan
leiklistar sem hana langi til gera
segir Ágústa Eva svo ekki vera. „Mig
langar ekki að gera neitt annað eins
og stendur. Ég veit hins vegar ekkert
hvernig mér líður á morgun. Kannski
verð ég komin með mótórhjóla-
bakteríu þá. Hver veit,“ segir Ágústa
Eva að lokum.
oskar@frettabladid.is
REYKJAVIK STORE
LAUGAVEGI 86-94, S: 511-2007
HÁPUNKTURINN Ágústa Eva sést her í gvervi Silvíu Nætur í Eurovision-keppninni í
Aþenu. Hún segir það hafa verið frábært þegar allur salurinn baulaði á Silvíu.
SIRKUSMYND/VALLI
„SILVÍA NÓTT HEFÐI
GETAÐ MÆTT Í
FERMINGARVEISLUR OG
FENGIÐ FIMMTÍU ÞÚS-
UND KALL FYRIR EN ÞAÐ
STANGAST LÍKA Á VIÐ
HUGMYNDINA Á BAK VIÐ
KARAKTERINN.“