Morgunblaðið - 25.06.2006, Qupperneq 15

Velkomin í Framtíðarlandið
SKÖPUNARGLEÐI
HUGREKKI
FRUMKVÆÐI
VIRÐING
ÁBYRGÐ
NÁTTÚRA
SJÁLFSTÆÐI
FJÖLBREYTNI
Við hvetjum alla sem vilja taka þátt í að móta framtíð Íslands
til að koma til liðs við okkur með því að skrá sig á vef félagsins.
Framtíðarlandið, félag áhugafólks um framtíð Íslands,
var stofnað 17. júní.
Við þökkum gríðarlegan áhuga sem félaginu hefur verið sýndur.
Stofnfélagar Framtíðarlandsins eru nú hátt í 2.000.
Við viljum vera hugmyndavettvangur og þverpólitískt þrýstiafl.
Við viljum láta reyna á lýðræðið, ná eyrum stjórnmálamanna
og styðja þá til góðra verka.
Við viljum lýðræðislegt samfélag sem byggir á hugviti, sköpunargleði
og frumkvæði einstaklinga. Samfélag þar sem jafnvægi ríkir á milli
efnahags, umhverfis og félagslegrar velferðar. Samfélag sem við öll
getum verið stolt af.
Í dag liggur Ísland á teikniborðinu. Ákvarðanir stjórnvalda á næstu
mánuðum ráða miklu um framtíð þjóðarinnar. Að þessu teikniborði
verðum við að komast áður en kostir og möguleikar lands og þjóðar
verða þrengdir enn frekar.
Það er ekki hlutverk stjórnvalda að matreiða lausnir ofan í fólkið
í landinu. Hlutverk stjórnvalda er að skapa frjóan jarðveg þar sem
einstaklingurinn, hugmyndir hans og kraftur geta dafnað.
Sumarið verður nýtt til undirbúnings framhaldsstofnfundar og
haustþings þar sem erlendir og innlendir fyrirlesarar munu leggja
sitt lóð á vogaskálarnar.
Við hvetjum fólk til að opna umræðu um þessi mál í sínu
nánasta umhverfi og vekja aðra til umhugsunar nú í sumar.
Það getur enginn sem lætur sig velferð Íslands varða
leitt þau hjá sér öllu lengur.
www.framtidarlandid.is