Morgunblaðið - 20.09.2006, Síða 6
6 MIÐVIKUDAGUR 20. SEPTEMBER 2006 MORGUNBLAÐIÐ
FRÉTTIR
TILLAGA borgarfulltrúa Framsóknarflokks og
Sjálfstæðisflokks þess efnis að hafin verði vinna að
mótun fjölskyldustefnu fyrir Reykjavík var sam-
þykkt samhljóða á fundi borgarstjórnar Reykja-
víkur í gær. Í tillögunni segir að markmið með mót-
un fjölskyldustefnu sé að tryggja að við alla
stefnumótun, ákvarðanatöku og áætlanagerð á
vettvangi Reykjavíkurborgar sé sérstaklega gætt
að hagsmunum barna, unglinga og fjölskyldna.
Björn Ingi Hrafnsson, formaður borgarráðs,
segir það mikilvægt að Reykjavíkurborg myndi sér
sína eigin fjölskyldustefnu líkt og fyrirtæki og fleiri
aðilar hafi gert. Þannig komi fram hvernig borgin
vilji búa að starfsfólki sínu, borgarbúum og börn-
um í borginni. „Við eigum ekki að bíða eftir öðrum
heldur segja hvað við viljum leggja áherslu á en
höfuðborgin á að vera í fremstu röð í þeim efnum,“
segir Björn Ingi og bendir á að þetta undirstriki
þær fjölskylduáherslur sem nýr meirihluti vilji inn-
leiða.
Aðspurður um hvernig fjölskyldustefnan muni
birtast borgarbúum segir Björn Ingi að þeir muni
sjá að þetta snúist um forgangsröðun. „Þegar við
höfum sett þessi mál á oddinn mun verða lögð
áhersla á að hrinda þeim í framkvæmd. […] Í öllum
helstu baráttumálum og framkvæmdum verður
horft til þess hvaða áhrif það hafi á fjölskylduna.“
Stefán Jón Hafstein, borgarfulltrúi Samfylking-
arinnar, segir að Birni Inga, sem formanni Fjöl-
skyldunefndar sem skipuð var af Alþingi, hefði ver-
ið í lófa lagið að leggja málið betur upp. Hann
bendir á að framkvæmdaáætlun vegna skýrslu um
stöðu barna og unglinga sem tók fimm ár að gera
hafi ekki litið dagsins ljós en hún sé á ábyrgð
Björns Inga. „Þessi mótun fjölskyldustefnu í
Reykjavík sem nú fer af stað þarf fast land til þess
að standa á og þar hefði ég haldið að umrædd fram-
kvæmdaáætlun myndi nýtast.“
Björn Ingi segir að Fjölskyldunefndin eigi að
skila framkvæmdaáætlun fyrir áramót og það
verði gert. Það standi ekki í vegi fyrir því að
Reykjavíkurborg setji fram sína eigin stefnu.
Fjölskyldustefna í Reykjavík
á að birtast í framkvæmd
Morgunblaðið/Ásdís
Í HNOTSKURN
»„Fjölskyldustefnan skal vera skýrstefnumótun um framtíðina en þó lif-
andi plagg sem er endurskoðað reglulega
til að vera í takt við tíðaranda og sam-
félagsbreytingar,“ segir í tillögunni.
»Borgarráð mun skipa fimm mannastýrihóp sem ætlað er að vinna að mót-
un fjölskyldustefnunnar og leggja hana
fyrir borgarráð eigi síðar en 1. maí nk.
Fulltrúi Samfylkingar segir Fjölskyldunefnd í lófa lagið að leggja málið betur upp
ÁKVEÐIÐ var samhljóða á fundi í Verði – fulltrúaráði
sjálfstæðisfélaganna í Reykjavík í gær að val á fram-
boðslista Sjálfstæðisflokksins vegna þingkosninganna
á vori komanda færi fram með sameiginlegu prófkjöri
í Reykjavíkurkjördæmunum dagana 27. og 28. októ-
ber.
Samkvæmt prófkjörsreglum eiga allir fullgildir fé-
lagar sem búsettir eru í kjördæminu og náð hafa 16
ára aldri rétt til þátttöku, svo og þeir sem undirrita
inngöngubeiðni í flokkinn fyrir lok kjörfundar. Fund-
urinn fór fram í Valhöll síðdegis. Að lokinni afgreiðslu
á tillögu stjórnar Varðar-Fulltrúaráðs sjálfstæðisfélag-
anna, um prófkjör flutti Geir H. Haarde, forsætisráð-
herra og formaður Sjálfstæðisflokksins ræðu. Á mynd-
inni sem tekin var í upphafi fundarins má m.a. sjá Geir
H. Haarde, Magnús L. Sveinsson, formann stjórnar
Varðar, Ingu Jónu Þórðardóttur, eiginkonu Geirs H.
Haarde og Sólveigu Pétursdóttur, forseta Alþingis.
Morgunblaðið/ÞÖK
Sjálfstæðismenn í Reykjavík
ákveða prófkjör í október
Eftir Silju Björk Huldudóttur
silja@mbl.is
BÚNAÐARSAMTÖK Vesturlands
samþykkti á síðasta aðalfundi sínum
ályktun þess efnis að álftin verði tek-
in af lista yfir alfriðaða fugla. Að
sögn Eiríks Blöndal, fram-
kvæmdastjóra Búnaðarsamtaka
Vesturlands, telja bændur á Vest-
urlandi álftina hafa fjölgað sér svo
mjög að hún skemmi akra og tún
þegar hún hópast saman á korn-
ökrum eða í nýrækt. Segir hann tals-
vert tjón hafa hlotist af þegar álftir
hafi safnast saman í tuga og jafnvel
hundraða tali.
„Bændur þurfa að fá leyfi til að
verja akra sína og tún. Menn eru
orðnir þreyttir á því að sjá það sem
þeir eru að rækta fara fyrir lítið þeg-
ar álftirnar leggjast á akrana,“ segir
Eiríkur og bendir á að fuglarnir éti
bæði uppskeruna og troði niður akra
og eyðileggi þá þannig. „Í nýsáðum
túnum eru þær skæðar með að stór-
skemma þau og rífa plöntur upp með
rótum.“ Spurður hvort ekki sé hægt
að girða túnin og verja þau með
þeim hætti svarar Eiríkur því neit-
andi og segir það afar erfitt. „Eina
ráðið er að fæla fuglana í burtu, sér-
staklega þegar þeir koma í svona
stórum flokkum.“
Segir stofninum hnigna hratt
verði veiðar leyfðar
Að sögn Eiríks sendu samtökin
umhverfisráðuneytinu formlegt er-
indi nú í sumar þess efnis að ráðist
yrði í einhverjar aðgerðir eða kerf-
isbreytingar til þess að bændum
veitist leyfi til að verja tún sín fyrir
álftum, með eða án takmarkana eða
skilyrða. Aðspurður segist Eiríkur
vongóður um jákvæð viðbrögð yf-
irvalda við þeirri beiðni.
Að sögn Ævars Petersens, fugla-
fræðings hjá Náttúrufræðistofnun
Íslands, telur íslenski álftastofninn
um 24 þúsund fugla. Segir hann
stofninn ekki hafa vaxið hratt á um-
liðnum árum og óttast að verði álfta-
veiðar leyfðar geti það haft af-
drifaríkar afleiðingar fyrir stofninn.
„Ég er hræddur um að honum
myndi hnigna hratt ef veiðar yrðu
leyfðar sökum þess hversu auðvelt
er að skjóta álftir. Við myndum því
ekki mæla með því að teknar væru
upp veiðar,“ segir Ævar og tekur
fram að ekkert nýtt sé að bændur
sækist eftir því að fá að skjóta álftir.
Aðeins hafa verið veitt tvö leyfi
til að skjóta álftir á sl. árum
Aðspurður segir Ævar vissulega
eitthvað um það að álftir komi sam-
an í stórum hópum á túnum bænda,
en hefur efasemdir um að hér sé um
stórvægilegt vandamál að ræða.
„Vissulega fara þær bæði í tún og
kornakra, enda hér grasbítar á ferð.
Þetta gerist þegar menn eru að
rækta, þá laðar það að þessa fugla,“
segir Ævar og telur ekki til neina
eina skyndilausn til að bregðast við
ásókn fugla í tún og akra.
Samkvæmt upplýsingum frá Ein-
ari Sveinbjörnssyni, aðstoðarmanni
umhverfisráðherra, hefur ráðu-
neytið í samstarfi við aðila á borð við
Bændasamtök Íslands og fleiri hags-
munaaðila verið að skoða hvað lög
um vernd og veiðar á villtum dýrum
og fuglum frá árinu 1994 leyfa, en
beiðni bænda um að verja tún sín
með því að skjóta álftir er ekki ný af
nálinni.
Bendir Einar á að álftin sé frið-
aður fugl samkvæmt lögunum, en í
reglugerð með þeim er heimilt að
veita tímabundið leyfi til veiða þegar
fuglar valda greinilegu tjóni ein-
hvern tiltekinn tíma árs að fenginni
umsögn ráðgjafarnefndar um villt
dýr. „En það á yfirleitt aðeins við af-
mörkuð tiltekin dæmi, en ekki al-
tækt fyrir heilt hérað eða allt land-
ið,“ segir Einar og bendir á að slíkt
leyfi hafi aðeins verið veitt í tveimur
tilvikum á síðustu árum. Tekur hann
fram að hann sjái ekki fyrir sér að
bændur fái almennt leyfi til að
skjóta álftir í því skyni að vernda tún
sín nema til komi lagabreyting á
villidýralögum.
Breyta þyrfti villidýralögum sem samþykkt voru 1994 ef veita á leyfi fyrir því að skjóta álftir
Bændur vilja fá að skjóta álftir
Morgunblaðið/Skapti Hallgrímsson
Áhyggjur Bændur óttast aukna
ásókn í akra og tún að undanförnu.
LAGT er til að hugtakið nauðgun
verði rýmkað mjög frá því sem nú er
og refsingar við slíku broti hertar
upp í allt að 16 ára fangelsi sam-
kvæmt frumvarpi til breytinga á
hegningarlögum sem Björn Bjarna-
son dómsmálaráðherra kynnti á rík-
isstjórnarfundi í gær. Einnig er
kveðið á um refsingu fyrir samræði
eða önnur kynferðismök við barn
undir 14 ára aldri, að refsimörk verði
þau sömu og fyrir nauðgun.
Rýmkun hugtaksins er á þá leið að
nauðgun teljist „önnur kynferðis-
nauðung og misnotkun á bágu and-
legu ástandi“ og því að þolandi „geti
ekki spornað við verknaðinum eða
skilið þýðingu hans“. Við það muni
brot þessi varða mun þyngri refs-
ingu en nú er, fangelsi frá einu ári og
allt að 16 árum í stað fangelsis allt að
6 árum. Þá er lagt til að lögfest verði
ákvæði um nokkur atriði sem verka
skuli til þyngingar við ákvörðun refs-
ingar fyrir nauðgun en eitt þeirra er
ungur aldur þolenda. Þá er lagt til að
ákvæði um refsingu fyrir að stunda
vændi sér til framfærslu falli niður.
Þess í stað verði lögfest ákvæði um
refsinæmi þess að bjóða fram, miðla
eða óska eftir kynmökum við annan
mann í opinberum auglýsingum.
Harðari
refsing fyrir
nauðgun
VILJI er til þess
bæði hjá ríki og
sveitarfélögum að
málefni fatlaðra
verði flutt frá ríki
til sveitarfélaga.
Þetta segir Vil-
hjálmur Þ. Vil-
hjálmsson, borg-
arstjóri
Reykjavíkur, en
hann gerir ráð
fyrir því að ný stjórn Sambands ís-
lenskra sveitarfélaga muni taka mál-
ið upp innan tíðar.
„Ég tel að nú eigi að taka þær við-
ræður upp aftur sem fóru fram milli
ríkis og sveitarfélaga fyrir þremur
til fjórum árum síðan,“ segir Vil-
hjálmur og bendir á að þá hafi ekki
verið eining um það hvernig ganga
ætti frá tekjustofnum til að tryggja
að sveitarfélögin gætu unnið verkið
með eðlilegum hætti. Nú sé hins veg-
ar tímabært að vinna að framgangi
málsins en áður verði að tryggja
tekjustofna og ákveða með hvaða
hætti þeir fjármunir verði færðir til
sveitarfélaganna.
Málefni
fatlaðra
verði flutt
Vilhjálmur Þ.
Vilhjálmsson
Vilji bæði hjá ríki og
sveitarfélögum
♦♦♦
VINSTRI grænir í Reykjavík sam-
þykktu á fundi sínum í gærkvöldi
sameiginlegt forval með Suðvest-
urkjördæmi. Bornar voru upp og
samþykktar forvalsreglur í sameig-
inlegu forvali flokksins 11. nóv-
ember nk. Er um að ræða fléttulista,
þ.e.a.s. konur og karlar skiptast á á
listunum og skal hver þátttakandi
velja þrjá aðila í efstu fjögur sætin.
Gert er ráð fyrir fundi um forval í
Suðvesturkjördæmi í næstu viku.
Vinstri grænir
samþykkja forval
KARLMAÐUR var fluttur á slysa-
deild seint á mánudagskvöld með 1.
og 2. stigs bruna á hendi. Maðurinn
hafði verið að fylla á kveikjara en
ekki vildi betur til en svo, að eldur
kviknaði og barst í rusl í íbúðinni.
Þurfti að kalla á slökkvilið til að
slökkva eldinn og reykræsta.
Samkvæmt upplýsingum frá
slökkviliði er atburður af þessu tagi
afar fáttíður.
Brenndist við að
fylla á kveikjara