Skinfaxi - 01.05.2007, Síða 21

10.UNGLINGA
LANDSMÓT
UMFÍ
í nágrenni Hornafjarðar:
Hestaferðir
Árnanes - hestaferðir
Boðið er upp á iengri og styttri ferðir eftir óskum hvers og eins. Hestarnir
eru við allra hæfi. Hlífðarfatnaður ertil staðar og áhersla er lögð á örugga og
trausta þjónustu. Allir byrjendurfá kennslu í grunnatriðum reiðmennsku.
Hestaleiga á Brunnhól
Anne og Sæmundur, sími 861-1029. Vinsamlega hringið með smáfyrirvara.
Venjulega er farið í ferðir ki. 9:30, um kl. 16:00 og 20:00.
Jökulsárlón
Jökulsárlón á Breiðamerkursandi er sérstætt náttúruundur þar sem gríðar-
stórir ísjakar fljóta um á jökullóninu. Sjór streymir inn í lónið og er það því
blanda af sjó og ferskvatni. Þar af leiðandi gengur æti inn í lónið sem selir
og æðarfuglar sækja í og setur dýralífið skemmtilegan svip á lónið.
Á Jökulsárlóni er boðið upp á 30-40 mín. siglingu á hjólabátum. Leið-
sögumaður er með í för sem fræðir farþega um það sem fyrir augu ber.
Lítill veitingaskáli stendur við lónið þar sem hægt er að fá sér kaffi og með
því, auk vinsællar sjávarréttasúpu. Þar fást minjagripir fyrir ferðamenn.
Fyrir utan skálann er góður sólpallur þar sem Ijúft er að slappa af og njóta
náttúrunnar. Jökulsárlón er við þjóðveg 1, um 60 km austan við Skaftafell
og um 80 km vestan við Höfn. Þjónusta er veitt frá 15. maí til 15. sept.
Veiðiskapur
Veiðifélagið Laxanes ehf. býður upp á laxveiði í Laxá í Nesjum en félagið
hefur ræktað ána upp með góðum árangri. Samkvæmt Viðskiptablaðinu
er hún nú þegar orðin 27. besta laxveiðiá landsins. (Laxá eru skráðir 24
veiðistaðir sem allir eru vel merktir, en veiðisvæðið er um 6 km langt frá
gljúfri niðurað Áramótahyl.
Áin er tveggja stanga og veiðitíminn er frá kl. 7:00 til 13:00 og frá
kl. 16:00 til 22:00. (Eftir 8. ágúst frá 15:00 til 21:00.) Leyfilegt er að veiða
á maðk og flugu fram til 26. júlí en eftir það er einungis hægt að veiða
áflugu til 29. ágúst. Veiðileyfi má nálgast í Stórulág sem er býli rétt við
Þveitina. Ekið er frá þjóðvegi nr. 1 inn afleggjarann að Hótel Vatnajökli og
þar kemur í Ijós skilti sem vísar heim að bænum. Hægt er að fá upplýsingar
um veiði í öðrum veiðiám í sveitarfélaginu hjá Upplýsingamiðstöðinni.
Þjóðgarðurinn í Skaftafelli
Þjóðgarðurinn í Skaftafelli var stofnaður árið 1967 og var þjóðgarðslandið
þá um 500 km2. Hann hefur verið stækkaður tvisvar eftir það og nær hann
nú frá Lakagígum í vestri að Lónsöræfum í austri og er 4.807 km2. Skafta-
fellsþjóðgarður er safn þess stærsta og mesta í landslagi og jarðfræði sem
fyrirfinnst á (slandi. Öræfajökull er hæsta fjall landsins og stærsta eldfjallið.
Hann er eina virka eldstöðin utan gosbeltanna og hefur gosið tvisvar á
sögulegum tíma. Grímsvötn eru virkasta eldstöð landsins. Þar eiga Skeiðar-
árhlaup upptök sín. Öræfajökull og Grímsvötn eru megineldstöðvar en
auk þeirra eru Bárðarbunga og Þórðarhyrna einnig innan þjóðgarðsins.
Yfir 25 skriðjöklar eru helsta landslagseinkenni Skaftafellsþjóðgarðs. Laka-
gígar, gigaröð á sprungurein sunnan Skaftár og Síðujökuls, eru sýnilegur
hluti rekbeltisins. Skaftáreldahraun, stærsta hraun á sögulegum tíma, rann
úr Lakagígum fyrir rúmlega 200 árum. Veðurfar er milt í Skaftafelli og
gróður-sæld mikil enda skjólsælt. Margargönguleiðireru í Skaftafelli,
flestar merktar. Göngustígurinn að Skaftafellsjökli er malbikaður og þvi
aðgengilegur fötluðum jafnt sem öðrum. Rúmgott tjaldsvæði er í þjóð-
garðinum. Snyrtingar eru með sturtum (sjálfsalar). I þjónustumiðstöðinni
er lítil ferðamannaverslun með matvöru og minjagripum. Fyrir utan eru
símaklefi, póstkassi og gosdrykkjasjálfsali. Gestastofa, Skaftafellsstofa, var
opnuð 1999 og þar hefur verið komið upp sýningu um menningu, sögu
og náttúru svæðisins. Þar er lýst sambúð mannsins við óblíð náttúruöfl
auk fróðleiks um eldfjöll og jökla og hlutverk þeirra í myndun og mótun
landsins. Upplagt er að hefja dvöl sína í þjóðgarðinum með því að koma
við í Skaftafellsstofu og fá upplýsingar um áhugaverða staði í landshlut-
anum. Rétt er að benda leiðsögumönnum á að umferð farartækja upp
brekkurnar í Skaftafelli er takmörkuð á tímabilinu 1. júní til 1. september.
Leiðsögumenn eru beðnir að fá leyfi hjá starfsfólki Skaftafellsstofu til að
aka upp að bílastæðinu við Magnúsarfoss.
Skaftafellsþjóðgarður er opinn gestum allt árið um kring. Þjónusta
í Skaftafellsstofu og á tjaldsvæðinu er veitt frá 2. maí til 30. september,
en utan þess tíma eftir samkomulagi við þjóðgarðsvörð. Skaftafellsþjóð-
garður er ein af perlum þessa lands og heimsókn þangað ætti sannarlega
að vera á dagskrá allra þeirra sem í ríki Vatnajökuls koma.
SKINFAXI - tímarit Ungmannafélags íslands 21