Tímarit lögfræðinga - 01.12.1985, Qupperneq 65

„Út er komið Lagasafn 1983, og hefur það að geyma öll íslensk lög sem
gildandi töldust 1. október 1983. Lagasafn kom síðast út árið 1974, og hafði
það að geyma lög sem töldust í gildi 1. október 1973.
Með bréfi dómsmálaráðuneytisins, dags. 30. október 1979, var Lagastofnun
Háskóla íslands falið að sjá um útgáfu nýs Lagasafns, sem gefið yrði út af
ráðuneytinu.
Að höfðu nánara samkomulagi milli ráðuneytis og Lagastofnunar um fyrir-
komulag útgáfunnar hófst vinna við safnið I ágúst 1981. Á fundi Lagastofnun-
ar 25. september það ár voru kosnir í ritnefnd til ráðuneytis við útgáfuna
Ármann Snævarr hæstaréttardómari formaður, Björn Friðfinnsson fram-
kvæmdastjóri og Sigurður Líndal prófessor, forstöðumaður Lagastofnunar.
Með ritnefnd hefur starfað af hálfu dómsmálaráðuneytisins Ólafur W. Stefáns-
son skrifstofustjóri.
Á sama fundi ráð Lagastofnun Björn Þ. Guðmundsson prófessor sem rit-
stjóra útgáfunnar. Gegndi hann ritstjórastarfi til marsloka 1982, er hann að
eigin ósk fékk lausn frá starfi. Ragnhildur Helgadóttir lögfræðingur, nú
menntamálaráðherra, var ráðin ritstjóri frá 1. júní 1982 og gegndi hún starfinu
til marsloka 1983. Var þá ráðinn til starfsins Friðrik Ólafsson lögfræðingur,
sem gegnt hefur starfinu síðan.
Við útgáfu Lagasafnsins nú hefur verið fylgt sömu meginsjónarmiðum og
gert hefur verið í lagasöfnum allt frá 1931, m.a. að því er varðar efnisflokkun.
Vísað er til reglugerða og annarra stjórnvaldsfyrirmæla eins og I fyrri laga-
söfnum, og hafa þær tilvísanir nokkuð verið auknar. Uppsetningu hefur nokk-
uð verið breytt til glöggvunar og atriðisorðaskrá aukin.
Vinnslu Lagasafnsins hefur verið hagað áþekkt og við fyrri útgáfur. Texti
Lagasafnsins er nú tölvuskráður og auðveldar það að miklum mun endurút-
gáfu og margvíslega vinnslu aðra.
Tölvuskráningu Lagasafnsins annaðist Verk- og kerfisfræðistofan hf. Prent-
un og bókband annnaðist Prentsmiðjan Oddi hf.
Bókabúð Lárusar Blöndal annast almenna sölu Lagasafnsins.“
Síðar á árinu 1984 var hafist handa um flutning texta lagasafnsins í tölvu
Skýrsluvéla ríkisins og Reykjavikurborgar. Stendur hann nú yfir, og verður
unnt að hefja leiðréttingu hans, þegar því er lokið.
Sigurður Líndal
forstöðumaður
271