Fréttablaðið - 26.07.2014, Side 6

26. júlí 2014 LAUGARDAGUR| FRÉTTIR | 6
SVEITARSTJÓRNIR Rósa Guðbjartsdóttir, for-
maður bæjarráðs í Hafnarfirði, segir ekki rétt
að laun nýráðins bæjarstjóra verði 31,5 prósent-
um hærri en laun forverans eins og fulltrúar
minnihlutans bókuðu í bæjarráði á fimmtudag.
Rósa segir hið rétta að heildarlaun bæjar-
stjóra fari úr 1.250 þúsund krónum í 1.480 þús-
und krónur. Samkvæmt því er hækkunin 18,4
prósent en ekki 31,5 prósent.
„Þess ber að geta að eftir hrun voru einstakir
liðir í launasamsetningu bæjarstjóra í Hafnar-
firði lækkaðir umtalsvert og hefur lítið verið
breytt til baka fyrr en nú,“ útskýrir Rósa.
Þá gagnrýnir Rósa oddvita Samfylk ingarinnar,
Gunnar Axel Axelsson, sem kvaðst hafa sagt
sig úr valnefnd vegna ráðningar bæjarstjóra.
Segir hann að fulltrúar meirihluta Sjálfstæðis-
flokks og Bjartrar framtíðar hefðu ákveðið
hver yrði ráðinn áður en formlegt mat hefði
verið lagt á umsækjendur.
„Fulltrúi minnihlutans tók fullan þátt í
öllum undirbúningi ráðningarferilsins, meðal
annars í viðtölum við umsækjendur, og gerði
engar athugasemdir við feril málsins. Og er
því leitt að hann kjósi að láta að því liggja að
ekki hafi verið staðið faglega að verki þegar
lokaákvörðun var tekin,“ segir Rósa Guð-
bjartsdóttir. - gar
Formaður bæjarráðs segir fulltrúa minnihlutans ofmeta launahækkun bæjarstjórans í Hafnarfirði:
Segir launahækkun 18 en ekki 31 prósent
RÓSA GUÐBJARTSDÓTTIR Segir tekið tillit til að nýr
bæjarstjóri muni eins og kjörnir fulltrúar sitja fundi í
ráðum. FRÉTTABLAÐIÐ/DANÍEL
SKIPULAGSMÁL Drög að lýsingu á skipulagsverkefninu „Deiliskipu-
lag fyrir Geysissvæðið“ voru lögð fram á fundi byggðaráðs Bláskóga-
byggðar á föstudag.
Byggðaráðið vísaði drögunum til afgreiðslu hjá skipulagsfulltrúa og
einnig til fulltrúa Bláskógabyggðar í vinnu við skipulagsmál Geysis-
svæðisins. „Byggðaráð óskar eftir að afgreiðsla skipulagsnefndar
liggi fyrir sem fyrst þannig að hægt verði að taka formlega afstöðu til
lýsingarinnar á næsta fundi byggðaráðs.“ Þá var ákveðið að ganga frá
samningi við Landmótun sf. um gerð deiliskipulagsins. - gar
Drög að skipulagi við Geysi lögð fram í Bláskógabyggð:
Byggðaráð vill hraða verkinu
Á GEYSI Landmótun sf. annast gerð skipulags á svæðinu. FRÉTTABLAÐIÐ/VILHELM
SVÍÞJÓÐ Sænska innflytjenda-
stofnunin gerir ráð fyrir 80-89
þúsundum hælisleitenda til Sví-
þjóðar á árinu. Samkvæmt spá
frá því í apríl var gert ráð fyrir
61 þúsundi hælisleitenda.
Gert er ráð fyrir að fleiri börn
og unglingar komi ein til lands-
ins, eða allt að 6.500, en áður var
gert ráð fyrir að fjöldinn yrði
4.400.
Ráða á fleiri starfsmenn til
stofnunarinnar vegna fjölda
umsókna. - ibs
Straumur til Svíþjóðar:
80 þúsund hælis-
leitendur í ár
DÝRALÍF Einn fiskur úr feng meist-
aranemenda sem lögðu silunga-
net í Arnarfirði í fyrradag, vakti
athygli þeirra enda var hann með
mikinn hnúð og og ófrýnilega
tenntur. Þetta var um tveggja
kílóa hnúðlax sem er upprunalega
kominn úr Kyrrahafi.
Ekki hefur hann þó lagt slíkar
vegalengdir að baki því Rússar
hófu sleppingar á hnúðlaxi í ám
sínum á Kólaskaga og víðar við
Hvítahaf í kringum 1960 og fljót-
lega eftir það fór að bera á honum
hér við land. Reyndar er hann ekki
sjaldgæfari en svo að hann er hér
árlegur fengur að sögn Guðna
Guðbergssonar, sviðsstjóra hjá
Veiðimálastofnun. „Já, eins dæmin
eru alltaf að gerast,“ bætir hann
við í gamansömum tóni.
Reyndar er það einungis hæng-
urinn sem er svona auðþekkjan-
legur en hrygnunni má auðveld-
lega rugla saman við sjóbleikju.
„Það eru oftast ekki nema gleggstu
menn sem þekkja hana frá,“ segir
Guðni. Hann segir enga ástæðu
til að hafa miklar áhyggjur þótt
slíkur flækingur finnist við
íslenska ósa. „Það þarf náttúru-
lega vissan fjölda til og svo þurfa
þeir að getað viðhaldið sér. Ég
þekki engin dæmi þess að þetta
hafi tekist hjá þeim þannig að það
séu einhverjir stofnar í ánum en
það er ekkert útilokað að það geti
gerst.“
Bleiklaxinn, sem er annað nafn
yfir hnúðlax, hefur þann háttinn
á að seiðin fara úr ám einungis
tveimur vikum eftir að hafa
klakist út og eru því ekki nema
um 2,5 eða 3 sentímetrar þegar
þau synda út í haf en okkar lax er
á milli tíu til fjórtán sentímetrar
þegar hann leggur í hann. Bleik-
laxaseiðin eru því auðveld bráð.
Ekki er heldur hentuga fæðu fyrir
þau að finna. Þetta er meðal þeirra
þátta sem standa vexti hans fyrir
þrifum hérlendis.
Dyntir náttúrunnar gefa vísind-
unum stundum lagt nef og fiska
verður vart sem ekki eru taldir
lifa hér. „Ég veit til þess að grá-
röndungar hafa veiðst hérna, ég
hef séð eina þrjá í gegnum tíðina,“
segir Guðni en heimkynni slíkra
fiska eru í Biskajaflóa við Spán og
Frakkland.
Hnúðlaxinn í Arnarfirði veiddu
tveir nemendur, þau Niklas Kar-
bowski og Chelsey M. Landry, en
þau stunda meistaranám í haf- og
strandsvæðastjórnun við Háskóla-
setur Vestfjarða. Fjarðalax hjálp-
ar til við söfnun gagna og segir Jón
Örn Pálsson, þróunarstjóri fyrir-
tækisins, þetta sýna að laxinn flakki
víða og kannski meira en menn telja
fyrst þessi var á sundi í botni Arnar-
fjarðar. jse@frettabladid.is
Árlegt einsdæmi
gerðist í Arnarfirði
Hnúðlax kom í silunganet sem nemendur lögðu í Arnarfirði skammt frá kvíum
Fjarðalax. Ekki mikið áhyggjuefni, segir sviðsstjóri hjá Veiðimálastofnun. Hnúðlax
er upprunalega úr Kyrrahafi en sést hér á hverju ári fyrir tilstuðlan Rússa.
NEMENDURNIR MEÐ NÝSTÁRLEGAN FENG Hér eru þau Chelsey M. Landry og
Niklas Karbowski með hinn kynlega lax. MYND/FJARÐALAX
Já, einsdæmin eru
alltaf að gerast.
Guðni Guðbergsson,
sviðsstjóri hjá Veiðimálastofnun.
BRETLAND Breska efnahagsbrotadeildin (SFO) hefur
fallist á að greiða breska kaupsýslumanninum Vincent
Tchenguiz þrjár milljónir punda, tæplega sex hundruð
milljónir íslenskra króna, í bætur vegna ólögmætrar
handtöku í tengslum við rannsókn SFO á falli Kaup-
þings á Bretlandi.
Þar að auki hyggst SFO greiða lögfræðikostnað
Tchenguiz sem er að minnsta kosti þrjár milljónir
punda. BBC greinir frá.
David Green, forstjóri SFO, bað Tchenguiz afsök-
unar á framkomu SFO í hans garð. Green harmar þau
mistök sem gerð voru vegna rannsóknarinnar og voru
harðlega gagnrýnd af breskum dómstólum í júlí 2012.
Green bætti við: „Ég er ánægður með að okkur skyldi
hafa tekist að leysa þetta mál án aðkomu dómstóla.“
Rannsókn SFO laut einkum að gríðarlega háum lán-
veitingum bankans til bræðranna Roberts og Vincents
Tchenguiz, fáeinum dögum fyrir fall bankanna. Báðir
neituðu bræðurnir að hafa gerst brotlegir við lög.
Rannsókninni var hætt í október 2012, meðal annars
vegna mistaka í rannsókninni auk þess sem talið var
að ekki væru nægar sannanir fyrir því að saknæmt
athæfi hefði átt sér stað.
Enn er óleyst deila Roberts Tchenguiz, bróður Vin-
cents, og SFO sem einnig hefur farið fram á háar
skaðabætur vegna rannsóknarinnar. -ih/sks
SFO harmar mistök sem gerð voru í rannsókn á falli Kaupþings á Bretlandi:
Tchenguiz fær háar skaðabætur
SKAÐINN BÆTTUR Vincent Tchenguiz var handtekinn árið
2011 tengslum við rannsókn á falli Kaupþings.
FRÉTTABLAÐIÐ/DANÍEL