Frjáls verslun - 01.02.2008, Page 22
22 F R J Á L S V E R S L U N • 2 . T B L . 2 0 0 8
Forsíðugrein
Lítið sjálfstraust.
Illt umtal. Vörn í sókn
Rauði þráðurinn er núna lítið sjálfstraust í bankaheiminum. Það er
svo sem skiljanlegt – eftir stöðugan uppgang í sjö ár fer allt í baklás.
Í stað vaxtar og útþenslu er skyndilega farið að ræða um samdrátt og
uppsagnir starfsfólks í bankaheiminum.
Þá blasir við að óvenjumargar greinar hafa birst að undanförnu í
erlendum fjölmiðlum þar sem varað er við íslensku bönkunum. Það
verður línudans að verjast frekara illu umtali á næstu mánuðum og
bæta ímyndina. Verst af öllu er að sjálfstraustið er öllum mikilvægt til
að ná árangri.
Þessi neikvæða umfjöllun er ekki einvörðungu bundin við Dan
mörku heldur Bretland líka, t.d. hefur hið virta blað Financial Times
fjallað um hið háa skuldatryggingaálag íslensku bankanna. Blaðið
ræðir við Geir H. Haarde sem segir að skuldatryggingaálagið hafi
sexfaldast á hálfu ári og það sé óréttlætanlegt.
Financial Times hefur eftir honum að hrint verði af stokkunum
ímyndarherferð til að róa alþjóðlega fjárfesta sem margir hverjir viti
ekki hvað sé að gerast. Vísar blaðið til fundar forsætisráðherra með
erlendum fjárfestum í New York sem verður um miðjan þennan mánuð.
Financial Times vitnar líka í orð sérfræðings hjá BNP Baribas
bankanum, Axel Swenden, sem segir almenna ólund vera gagnvart
Íslandi, sérhver hreyfing á markaðnum magnist þegar Ísland beri á
góma. Jafnframt hafi menn áhyggjur af því að íslensk stjórnvöld
hvorki geti né vilji koma bönkum sínum til aðstoðar ef þeir lenda í
vanda. Efnahagur bankanna sé mun stærri en ríkisins. Efast sé um
getu bankanna til að bjarga sér á eigin spýtur.
Þarna kristallast þetta ef til vill; að hið háa skuldatryggingarálag sé
fyrst og fremst til komið vegna ótta erlendra fjárfesta um það hverjir
séu bakhjarlar þeirra ef í harðbakkann slær.
Rauði þráðurinn í varnarræðum næstu mánuði er að hamra á
sterkri eiginfjárstöðu, glæsilegri hagnaðarsögu, litlum útlánatöpum
og að nánast engar líkur séu á að bankarnir verði gjaldþrota – eða
komist í þá stöðu að kalla þurfi út hjálparsveitir.
Það verður línudans að verjast
frekara illu umtali á næstu mánuðum
og bæta ímyndina. Verst af öllu er
að sjálfstraustið er öllum mikilvægt
til að ná árangri.