Franskir dagar - 01.07.2005, Blaðsíða 3
Steinþór Pétursson, sveitarstjóri
Ágætu íbúar og gestir.
Við höldum nú Franska daga í tíunda skipti, en þeir voru fyrst
haldnir síðustu helgi júlí mánaðar 1996 og eins og áður eru þeir
haldnir til að minnast sögu fjarðarins og veru Frakka hér áratugina
fyrir og eftir 1900. Merkileg saga lítils byggðarlags þar sem íbúatala
margfaldaðist á vormánuðum ár hvert og fækkaði síðan að nýju
þegar frönsku skúturnar héldu til sinna heima að hausti.
Að þessu sinni eru þeir haldnir í nýju umhverfi, öðru andrúmslofti
og á tíma ótrúlegra breytinga á samfélagi okkar hér á Austurlandi.
Fáskrúðsfjarðargöng að opnast og styttast um leið allar
samskiptaleiðir milli byggðarlaga og gjörbreyta samskiptamunstri
á miðsvæði Austfjarða í atvinnu- og þjónustulegu tilliti. Einhver
mesta atvinnuuppbygging sem átt hefur sér stað á svæðinu á jafn
stuttum tíma er að eiga sér stað, auk þess sem verðmiði er nú
komin á húseignir sem nær ógerningur var að selja fyrir nokkrum
mánuðum síðan. íbúaþróun hefur tekið viðsnúning og
Austfirðingum fjölgar nú jafnt og þétt og ánægjulegt að sjá að
meðal þeirra sem eru að flytja til Austurlands eru brottfluttir
sveitungar að snúa aftur heim.
Við skulum vona að þessi þróun haldi áfram þó framkvæmdum
Ijúki og okkur takist að halda snjóboltaáhrifunum sem fylgja þessum
umsvifum gangandi áfram. Það á að vera hægt því Austurland
hefur fengið og fær áfram mikla kynningu sem vænlegur
búsetukostur með stórfenglegri náttúru, fjölbreyttu mannlífi og
tómstundaúrvali eins og hver og einn hefur lyst til að stunda.
Austurbyggð er í hringiðu þessa alls og hefur upp á þetta allt
að bjóða eins og fólk sér í dag sem heimsækir okkur. Flér hefur
verið jöfn og ákveðinn ásókn í íbúðarhúsnæði þó svo að töluverður
kippur hafi komið i þessi mál nú seinustu mánuði. Til að mæta
þessari auknu eftirspurn er hafin bygging íbúðarhúsnæðis í
sveitarfélaginu bæði af hálfu byggingaraðila og einstaklinga, en
slíkar framkvæmdir hafa legið niðri um all langt skeið.
Þessari þróun þarf sveitarfélagið einnig að bregðast við á sínum
vettvangi og í stað þess að halda að sér höndum vegna neikvæðrar
íbúaþróunar undafarinn áratug, er nú nauðsynlegt að mætafjölgun
íbúa með gatna og fráveituframkvæmdum auk þess sem stækkun
skólahúsnæðis er nauðsynleg. Undanfarna mánuði hefur verið
unnið að undirbúningi og hönnun skólamiðstöðvar sem byggja á
við núverandi grunnskóla á Fáskrúðsfirði. Skólamiðstöðin á að
hýsa auk grunnskólans, leikskóla, tónlistarskóla og bókasafn. Þá
er einnig gert ráð fyrir aðstöðu fyrir fjarkennslu í húsnæðinu.
Áætlað er að hafist verði handa við 1. áfanga þessarar byggingar
í haust og honum verði lokið haustið 2006.
En það er fleira á döfinni því í október næstkomandi fara fram
kosningar um sameiningu sveitarfélaganna Austurbyggðar,
Fáskrúðsfjarðarhrepps, Fjarðabyggðar og Mjóafjarðarhrepps, en
þetta er liður í átaki um eflingu sveitarstjórnarstigsins á íslandi.
Nú er nefnd að störfum við að fara yfir og undirbúa þessar kosningar
og mun vinna hennar verða kynnt í haust áður en til kosninga
kemur.
Það er því mikið um að vera í Austurbyggð og margt spennandi
og skemmtilegt framundan og aðeins tæpt á nokkrum atriðum í
þeim efnum hér, en næst okkur í þeim efnum eru Franskir dagar
2005. Þar sem vinir og kunningjar hittast og gera sér glaðan dag
saman, rifja upp liðna tíma og spjalla um það sem fram undan er.
Það er einlæg ósk mín að allir eigi hér ánægulega helgi í faðmi
fjölskyldu, vina og kunningja. En að lokum vil ég þakka þeim sem
hafa lagt á sig ómælda vinnu við undirbúning Franskra daga, eins
og undanfarin ár hafið þið lagt á ykkur mikið og óeigingjarnt starf
til að gera þetta kleift. Hafið þökk fyrir.
Megi helgin vera ykkur ánægjuleg og óska ég ykkur góðrar
skemmtunar.
Steinþór Pétursson
sveitarstjóri Austurbyggð
Þakkir
Bæjarhátíðin Franskir dagar er gott dæmi um það hversu miklu
er hægt að áorka í samstiga og jákvæðu sveitarfélagi þar sem
allir taka höndum saman og eru tilbúnir til að leggja sitt af
mörkum. Líkt og áður hefur undirbúningur og skipulag hátíðarinnar
að mestu verið unnið í óeigingjörnu sjálfboðastarfi. Fyrir hönd
ferða- og menningarmálanefndar Austurbyggðar vil ég þakka
öllum þeim sem komu að skipulagningu og undirbúningi Franskra
daga i ár. Um leið vil ég óska heimamönnum og gestum gleðilegrar
hátíðar og góðrar skemmtunar.
Hrafnhildur Ýr Víglundsdóttir
Upplýsinga- og kynningarfulltrúi Austurbyggðar
3