Húnavaka - 01.05.2011, Blaðsíða 27

H Ú N A V A K A 25
svona lengi í embættum og hefði áreiðanlega velt fyrir mér - „hvort þessi
karlandskoti ætlaði aldrei að hætta?“ Þegar ég var fimmtugur héldum við
Björg mikla veislu og höfðum opið hús í Félagsheimilinu á Blönduósi. Þar
sagði ég í ræðu að ég hefði talið það fyrr á árum að menn sem væru komnir
um fimmtugt væru komnir á grafarbakkann og ættu náttúrulega að vera hættir
í öllu. Ég væri á hinn bóginn fyrir löngu síðan búinn að skipta um skoðun og
átta mig á því að fullþroska menn hefðu góð áhrif og glögga sýn á flest þau
mál sem hæst ber í héraði og á landsvísu, þó auðvitað þurfi ungt fólk einnig að
koma að stjórnum mála og hafa mikil áhrif. Þeirra er framtíðin.
Flóðvangur
Veiðihúsið Flóðvangur var byggt árið 1964 og tekið í notkun fyrir veiðitímann
1965 en þá kom nýr leigutaki sem vildi fá gott veiðihús. Flóðvangur þótti eitt
glæsilegasta veiðihúsið í landinu þegar það var byggt. Það var líka sumpart
sem félagsheimili fyrir sveitina þótt ekki næðist samkomulag við sveitarfélögin
og önnur félög í sveitunum á sínum tíma um að svo yrði. Síðan var byggt
nokkuð við það. Nokkru eftir að ég tók við sem formaður fórum við að ræða
um að gera þyrfti verulegar breytingar á húsinu og koma því í fremstu röð á
nýjan leik. Haustið 2003 var farið í endurbætur á eldri hlutanum og byggð ný
svefnálma þar sem eru 10 rúmgóð herbergi með snyrtingu. Þessar endurbætur
kostuðu rúmar 80 milljónir króna og þykir húsið í dag eitt glæsilegasta veiðihús
landsins.
Erlendir veiðimenn hafa tvisvar haft ána á leigu. Fyrst var það Fortesque frá
1936 til 1951 og svo Cooper sem kom þegar Flóðvangur var byggður en hann
hafði ána í rúman áratug. Frá og með 1997 var áin leigð Pétri Péturssyni kaup-
manni í Reykjavík og frönskum félaga hans. Við höfum ekki séð ástæðu til að
bjóða hana út undanfarin ár en höfum fylgst með hvað aðrir gera og hvaða
leigutekjur aðrar ár gefa. Á hinn bóginn hefur verið endursamið nokkrum
sinnum við Pétur og núna er í gildi samningur, bundinn vísitölu og gengi
dollars, sem er uppsegjanlegur af beggja hálfu með árs fyrirvara.
Veiðifélagið á annað hús í landi Másstaða, veiðihúsið Steinkot, sem var
byggt 1978 og síðar stækkað verulega. Leigutakar árinnar voru í fyrstu með
silungsveiðina líka en þeim fannst ekki ganga nógu vel að selja veiðileyfin.
Þetta þróaðist síðan þannig að ég sé um þetta fyrir veiðifélagið og sel veiðileyfin
beint til veiðimannanna. Í fyrstu var veiðitímabil silungs frá því um miðjan
júní og fram í miðjan september en eftirspurnin er mikil og næsta sumar hefst
veiðin í byrjun maí og stendur til loka september.
Veiðihlunnindin hafa verið afar mikils virði fyrir sveitina allt frá landnámi.
Frá því er sagt í Vatnsdælu að landnámsmaðurinn Ingimundur gamli var
veginn vegna deilna um laxveiði og allar götur síðan hefur áin skipt sköpum í
lífi fólksins í dalnum þó á annan hátt sé. Samningur við núverandi leigutaka
kveður á um „að veiða og sleppa“. Það var ekki þannig að við værum
sérstaklega að bjarga laxinum heldur var búið að finna markhóp sem hafði