Lögmannablaðið - 01.06.2015, Blaðsíða 22

22 LÖGMANNABLAÐIÐ TBL 02/15
Á LÉTTUM NÓTUM
Lagadagurinn að kvöldi
í fylgd ritstjóra Lögmannablaðsins
Sem fyrr ríkti nokkur eftirvænting
þegar veisluhöldin hófust að kvöldi
Lagadagsins 2015 með fordrykk og
standandi forréttum á Hilton Hóteli.
Ritstjórinn smellti sér í betri blússuna
en var heldur lengi að sparsla upp í
andlitið og náði því rétt í blálokin á
forréttunum. Það vannst þó tími til að
smakka á sushi og snittum sem gáfu
góð fyrirheit um framhaldið.
Kvöldið var afar vel sótt og voru 440
manns við borðhaldið. Bekkurinn var
því þétt setinn ­ þröngt máttu sáttir
sitja en aðrir standa. Glæsikvendið
Guðrún Sesselja Arnardóttir lögmaður
hjá embætti ríkislögmanns, hélt um
þræði og stjórnaði veislunni. Fórst
henni það vel úr hendi og átti hún
gjörvallan salinn þegar hún steig á
stokk og söng tvö lög við undirleik
Loga Kjartanssonar lögfræðings sem
sá jafnframt um dinnermúsík. Einar Karl
Hallvarðsson ríkislögmaður átti einnig
stórleik með nefflautu­performans á
heimsmælikvarða en það mun vera í
fyrsta skipti í sögunni sem spilað er
opinberlega á slíkt hljóðfæri á Íslandi.
Þvílíkir hæfileikar sem leynast hjá einu
embætti! Einn þekktasti „afbrotamaður“
landsins, Kenneth Máni, var síðan með
uppistand.
Góður rómur var gerður að aðalréttinum
sem var hægeldaður kálfahryggsvöðvi
og heldur mikið reykt svínasíða
ásamt ostrusveppasalati, gulrótum og
Béarnaise sósu. Rauðvínið rann þó
ljúflega niður og gott ef það slæddist
ekki með kokkteill inn á milli rétta.
Eftirréttaplanka með ýmsu góðgæti var
jafnframt gerð góð skil ásamt kaffi og
Grand af barnum þar sem lögfræðingar
áttu endurfundi með gömlum vinum.
Lögfræðingar spændu upp dansgólfið
með Páli Óskari og pallíettuklæddu
dönsurunum hans. Glimmerkóngurinn
hélt uppi stuðinu fram á rauða nótt
og var dansgólfið smekkfullt allan
tímann. Þeir allra hörðustu héldu svo
áfram djamminu eftir að Palli fór að
sofa og fjölmenntu á hótelbarinn. Þar
mátti m.a. sjá dómara, prófessora,
hæstaréttarlögmenn og a.m.k. einn
fjölmiðlamann ljúka kvöldinu með gini
& tónik eða jafnvel vodka í sóda.
Í eina tíð enduðu árshátíðir laganema
í morgunverði á Hótel Loftleiðum. Það
skal ósagt látið hvort einhverjir hafi
byrjað verkalýðsdaginn í Brunch á Vox
en klukkan var að ganga fjögur þegar
ritstjórinn steig upp í leigubíl og hélt
heim á leið og var ekki síðastur úr húsi.
Hvað gerðist eftir það er ekki á margra
vitorði, kannski sem betur fer.
Þyrí Steingrímsdóttir hrl.