Dagblaðið Vísir - DV - 06.05.2016, Page 6

Helgarblað 6.–9. maí 20166 Fréttir
SJÓNMÆLINGAR
LINSUR • GLERAUGU
Skólavörðustígur 2 • 101 Reykjavík
Sími: 511 2500 • www.gleraugad.is
F
organgsröðun í þágu
umferðar öryggis er sögð
hafa ráðið því að Ólöf Nordal
innan ríkisráðherra sló síðasta
áfanga Dettifossvegar út af
samgönguáætlun á dögunum. Sú
skýring kemur fram svari innanríkis­
ráðuneytisins við fyrirspurn DV. Þar
er vísað til þess að sextán banaslys
hafi orðið í fyrra, samanborið við þrjú
árið áður, og forgangsröðunin taki
mið af því. Athugun DV leiðir hins
vegar í ljós að í samgönguáætlun eru
engar vegabætur fyrirhugaðar á þeim
vegarköflum þar sem bana slysin
urðu í fyrra. 430 milljónir voru hins
vegar settar í margvíslegar aðgerðar
sem stuðla eigi að umferðaröryggi.
Næstum allir afbókuðu gistingu
Heilsársvegur hefur verið lagður frá
þjóðvegi 1, Mývatnsmegin, að Detti­
fossi auk þess sem unnið er að upp­
byggingu vegarins frá Ásbyrgi í Öxar­
firði að Vesturdal. Haftið sem eftir er,
frá Dettifossi að Vesturdal, var hins
vegar slegið út af samgönguáætlun
í vetur.
Eins og DV greindi frá á dögun­
um eru ferðaþjónustubændur í
Öxar firði miður sín vegna þessa, en
vegurinn er lokaður stærstan hluta
ársins. Einn ferðaþjónustuaðili, sem
heldur úti bændagistingu, bar að 28
af 30 bókunum í desember hafi ver­
ið afbókaðar á síðustu stundu. Þá
hringdi fólk frá Dettifossi og sagðist
ekki komast leiðar sinnar. Ástandið
er svo slæmt að verslunin í Ásbyrgi
var í fyrsta sinn í 41 ár lokuð í vetur.
„Hingað koma engir peningar,“ sagði
Ævar Ísak Sigurgeirsson í samtali
við DV en Öxfirðingar horfa á ferða­
mannastrauminn að mestu úr fjar­
lægð, án þess að njóta ávaxtanna.
Brothættar byggðir
DV spurði Ólöfu þann 14. apríl síð­
astliðinn hvernig stæði á því að
vegurinn, sem heimamenn hafa
beðið eftir árum saman, hafi ver­
ið felldur út af samgönguáætlun.
Blaðið spurði hvernig ákvörðunin
samrýmdist því yfirlýsta markmiði
stjórnvalda að stuðla að dreifingu
ferðamanna um allt land. Þá minnti
DV á að Kópasker og Raufarhöfn,
þau byggðarlög sem mest myndu
hagnast á þessari samgöngubót,
væru á lista yfir brothættar byggðir.
„ Hvernig samrýmist ákvörðunin
þeirri viðleitni stjórnvalda að efla
þessi viðkvæmu byggðarlög?“ spurði
DV meðal annars.
Kostar 1.500 milljónir
Þessum spurningum var ekki svarað
með beinum hætti heldur benti
ráðuneytið á að verið væri að vinna
að uppbyggingu vegarkaflans frá Tó­
vegg – sem er nálægt Ásbyrgi – að
Vesturdal. Um 22 kílómetra kafli
væri skilinn eftir en til þess verkefnis
þyrfti 1.500 milljónir króna. „Megin­
forsenda fyrir vali á verkefnum inn á
árin 2017 og 2018 í fjögurra ára sam­
gönguáætlun sem nú liggur fyrir Al­
þingi var öryggissjónarmið. Umferð
fer vaxandi og fjölgaði banaslysum
úr þremur árið 2014 í 16 á síðasta ári.
Við þessa forgangsröðun náði loka­
áfangi Dettifossvegar ekki inn á áætl­
unina árin 2017 og 2018 en kemur
til skoðunar í næstu áætlun,“ segir í
svari ráðuneytisins.
Ráðuneytið benti á að miklar
samgönguframkvæmdir væru í gangi
„á svæðinu“. Í því samhengi voru
nefndar framkvæmdir við Bakka á
Húsavík og endurnýjun flugvallarins
við Húsavík. Loks voru Vaðlaheiðar­
göng nefnd en þau eru í tæplega
tveggja klukkutíma akstursfjarlægð
frá Kópaskeri. Þó að göngin muni
nýtast öllu Norður­ og Austurlandi
vel er vegalengdin frá Kópaskeri að
Vaðlaheiðargöngum álíka löng og frá
Reykjavík til Stykkishólms. Hún er
heldur styttri en frá Reykjavík að Vík
í Mýrdal.
Malbikað frá Laugarvatni
að Flúðum
Eins og áður segir stendur ekki til að
gera úrbætur á þeim vegarköflum
þar sem banaslys urðu í fyrra. Þrjú
banaslys urðu á Biskupstungna­
braut. Þriggja ára fótgangandi stúlka
lést við sveitabæ í Biskupstungum,
65 ára ökumaður lést í bílslysi
norðan við Minni­Borg og farþegi,
23 ára, lést á Biskupstungnabraut
við Alviðru. Eina vegaframkvæmdin
sem fyrirhuguð er á þessu svæði
er á Reykjavegi, sem tengir saman
Laugarvatn og Flúðir. Þar á að mal­
bika. Þrjú banaslys urðu á Suður­
landsvegi en hans er ekki getið í
samgönguáætlun, svo annað dæmi
sé tekið.
Á meðal stórra framkvæmda sem
fyrirhugaðar eru í samgönguáætlun
eru Dýrafjarðargöng, heilsársvegur
um Dynjandisheiði, tvöföldun þjóð­
vegarins um Mosfellsbæ auk þess
sem að í Ölfusi og á Kjalarnesi á að
fara í 2+1 framkvæmd. Uxahryggja­
vegur verður malbikaður. Fyrir
austan á að malbika hringveginn um
Skriðdal að Breiðdalsheiði, ljúka á
við veginn um Berufjarðarbotn og ný
brú verður byggð yfir Hornafjarðar­
fljót, svo eitthvað sé nefnt.
Ekki nýr vegur um Öxi
Auk vegarins um Dettifoss hefur
verið hætt við nýja brú yfir Jökulsá
á Fjöllum og nýjan veg um Öxi auk
þess sem ekki stendur til að klára
tvöföldun Reykjanesbrautar. Þá
stendur ekki til að halda áfram vinnu
við Arnarnesveg í efri byggðum
Kópavogs.
Varasamur vegslóði
DV benti ráðuneytinu á þriðjudag á
þá staðreynd að fyrirhugaðar vega­
úrbætur, sem getið er í samgöngu­
áætlun, nái ekki til þeirra vega þar
sem banaslys urðu í fyrra. Auk þess
var bent á að í frétt DV frá 19. apríl
síðastliðinn hafi komið fram að
margir lendi í háska á veginum –
sem er lokaður stærstan hluta ársins.
Í umræddri frétt sagði Ísak í Ás­
byrgi að nær daglega þyrftu bænd­
ur í sveitinni að aðstoða fólk í vanda
á vegunum í kringum Jökulsá. Hann
sagði tímaspursmál hvenær stór­
slys hlytist af. Mörg dæmi væru um
að fólk hefði þurft að hafast við í bíl­
um sínum yfir nótt í nístandi kulda –
í þeirri trú að vegurinn yrði ruddur
daginn eftir. Á endanum freisti sum­
ir þess að ganga til byggða. Slíkt gæti
endað með ósköpum, enda væru
veður mjög válynd uppi til fjalla. Í
svari frá ráðuneytinu var á það bent
að 430 milljónum króna hefði verið
varið til margvíslegra aðgerða á sviði
umferðaröryggis á árinu. Þær millj­
ónir fara meðal annars í merkingar
við einbreiðar brýr, undirgöng fyrir
búfé, hvíldarsvæði við vegi, eftirlit
lögreglu og fræðslu í grunnskólum.
Frekari skýringar í ljósi þessara
atriði höfðu ekki borist þegar DV fór
í prentun. n
Öryggissjónarmið sögð
hafa frestað Dettifossvegi
n Fjöldi banaslysa í fyrra stýrði forgangsröðinni n Engar úrbætur á vegum þar sem banaslysin urðu
Baldur Guðmundsson
baldur@dv.is
Banaslysin 2015
n Sextán einstaklingar létust
í jafn mörgum slysum; fjórar
konur en tólf karlmenn.
n Þrír létust innanbæjar í
Reykjavík en hinir 13 utanbæjar.
n Enginn lést af völdum
ölvunar- eða fíkniefnaaksturs.
n Sex létust á Suðurlandi.
n Af þeim látnu voru sjö
útlendingar, þar af fimm
erlendir ferðamenn.
Dettifoss
Skilja eftir Í dag er fært allt árið frá
þjóðvegi 1 að Dettifossi. Verið er að vinna
að veginum frá Ásbyrgi að Vesturdal.
Haftið á milli er skilið eftir.
Ásbyrgi
Hringvegurinn
Vesturdalur