Morgunblaðið - 08.07.2017, Síða 10

10 FRÉTTIRInnlent
MORGUNBLAÐIÐ LAUGARDAGUR 8. JÚLÍ 2017
Arnar Þór Ingólfsson
athi@mbl.is
Ólíklegt er að hópferð Íslendinga til
Norður-Kóreu, sem fyrirhuguð var
á vegum ferðaskrifstofunnar
Trans-Atlantic í apríl næstkomandi,
verði farin. Egill Örn Arnarson
Hansen, starfsmaður ferðaskrif-
stofunnar, segir lítil viðbrögð hafa
fengist við auglýsingum um ferðina.
Það sé líklega vegna þess ótrygga
ástands sem ríkir á Kóreuskaga.
Dræm viðbrögð
„Við vorum búin að setja upp þá
dagsetningu en það hafa verið
voðalega lítil viðbrögð við því sem
við höfum verið að auglýsa í kring-
um þetta,“ segir Egill. Áður hefur
verið töluverður áhugi fyrir ferðum
til Norður-Kóreu, sem Trans-
Atlantic skipuleggur í samstarfi við
ríkisrekna kínverska ferðaskrif-
stofu.
„Við settum á sínum tíma upp
ferð og vorum komin með um 30
manna hóp sem ætlaði að fara. Þá
kom heimildarmynd í sjónvarpinu
um nauðungarbúðir og fleira
þarna, svo sú ferð bara datt upp-
fyrir. Fólk afskráði sig mikið eftir
það og síðan hefur ekki verið neinn
friður um Norður-Kóreu.“
Síðasta lokaða ríkið
Egill segir sérstöðu Norður-
Kóreu þá að það sé eina lokaða ein-
ræðisríkið sem eftir er. „Sovét-
blokkin er fallin, Kúba er orðin opin
og ef fólk telur sig upplifa eitthvað
með því að fara inn í svona lokað
land er þetta sennilega það eina
sem eftir er.“
Jafnvel þó að nokkur fjöldi Ís-
lendinga hafi áhuga á að heimsækja
Norður-Kóreu og að ferðaskrif-
stofan sé með fólk á biðlista eftir
ferð þangað, meti flestir ástandið í
dag of ótryggt til að láta af því
verða.
Egill segir dýrt að ferðast til
Norður-Kóreu. „Þegar við settum
þetta upp á sínum tíma var ferðin
miðuð við níu nætur í Kína og fjórar
eða fimm í Norður-Kóreu. Þá var
heildarkostnaðurinn 700-800 þús-
und krónur á mann. Það er í dýrari
kantinum og það kemur til af því að
Norður-Kórea er alveg fáránlega
dýr. Sem er nú bara út af því að
stjórnvöld þar eru að reyna að ná í
erlendan gjaldeyri.“
AFP
Norður-Kórea Ólíklegt er að ferð íslenskrar ferðaskrifstofu, sem þangað var fyrirhuguð, verði farin að sinni.
N-Kóreuferð líklega blásin af
 Dræm viðbrögð við auglýsingum  Ótryggt ástand fælir frá
Baldur Arnarson
baldura@mbl.is
Búseti hyggst flytja inn 170 tilbúin
baðherbergi í nýjar íbúðir félagsins.
Gísli Örn Bjarnhéðinsson er fram-
kvæmdastjóri Búseta, sem er hús-
næðissamvinnufélag.
„Einingarnar eru steyptar í verk-
smiðju erlendis og fullkláraðar. Það
þarf nánast aðeins að setja klósett-
pappírinn á klósettrúllustandinn. Svo
er þessu komið fyrir í framkvæmd-
inni jafn óðum. Þetta er yfirleitt lok-
að og innsiglað eins og heyrúlla. Ein-
ingarnar koma á gámapöllum. Það
vantar aðeins hurðina á rýmið. Það er
aðeins bráðabirgðahurð. Svo er ein
eða tvær hliðar á þessum einingum
þar sem lagnirnar koma út. Þær eru
svo tengdar við lagnir hússins. Þetta
byggingarform, í samspili við steypt-
ar einingar, er oftar en ekki reglan
fremur en undantekning í Evrópu.“
Skortur á iðnaðarmönnum
Gísli Örn segir þetta lið í að lækka
byggingarkostnað. Með þessu sé
hægt að auka gæði og draga úr töfum
við framkvæmdir. Þensla sé á bygg-
ingarmarkaði og fagmenn af skorn-
um skammti. „Það skortir vel mennt-
aða iðnaðarmenn. Það er orðið
erfiðara að fá framkvæmdaaðila.
Samfélagið hefur ekki staðið sig nógu
vel í að mennta iðnaðarmenn. Þá hafa
rannsóknir í byggingariðnaði setið á
hakanum.“
Baðherbergin verða meðal annars
í fjölbýlishúsum Búseta á Keilu-
granda og við Árskóga í Suður-
Mjódd í Reykjavík.
Gísli Örn segir sterkt gengi krónu
gera innflutninginn hagkvæman.
Innflutningur á tilbúnum einingum
komi á vissan hátt í staðinn fyrir inn-
flutning á vinnuafli. „Þetta ætti að
vera hagkvæmara ef gengið helst
þokkalegt,“ segir Gísli Örn.
Hann segir ekki hægt að flytja inn
tilbúin eldhús. Hins vegar sé hægt að
nota innfluttar innréttingar. Sér-
smíði sé orðin dýr á Íslandi.
Fyrr á þessari öld vakti athygli
þegar Íslandshótel fluttu inn tilbúin
baðherbergi í Grand hótels-turninn í
Sigtúni.
Notast við steyptar einingar
Gísli Örn segir aðspurður að bað-
herbergin á vegum Búseta verði af
öðrum toga. „Þetta er sambærilegt
en þó annars konar. Við verðum með
steyptar einingar. Á Grand hótel
voru hins vegar notaðar einingar sem
eru að hluta til léttar.“
Búseti er með 80 íbúðir í byggingu
á Smiðjuholtsreitnum í Reykjavík
sem afhendast næsta vor. Þar hefur
félagið þegar byggt um 120 íbúðir og
kemur síðasti hluti þeirra til afhend-
ingar í ágúst og september. Gísli Örn
segir félagið með margt í pípunum.
Búseti flytur inn 170
baðherbergi í íbúðirnar
 Herbergin
verða tengd við
lagnakerfi íbúða
Ljósmynd/Gísli Örn
Sett saman Forsteyptar baðherbergiseiningar í verksmiðju í Slóvakíu.
Það tekur enga stund að rétta nágrönnum okkar
og vinum á Grænlandi hjálparhönd. Hringdu í
907 2003
og leggðu til 2.500 krónur í hjálparstarfið.
Söfnunarreikningur Hjálparstarfs kirkjunnar:
0334-26-056200, kennitala 450670-0499.
Sigurður Bogi Sævarsson
sbs@mbl.is
Þess er vænst að þegar kemur fram á
næsta ár megi hefjast handa við frek-
ari stækkun gistihúss í Ásgarði í
Kerlingarfjöllum. Á árinu 2015 var
tekinn í notkun fyrsti áfangi bygging-
ar með tuttugu tveggja manna her-
bergjum. Í deili-
skipulagi er gert
ráð fyrir húsi með
allt að 120 her-
bergjum, móttöku
og þjónusturými.
Páll Gíslason er
framkvæmda-
stjóri og einn eig-
enda Fannborgar
ehf. sem á og rek-
ur ferðaþjónustu í
Kerlingarfjöllum. Hann segir að nú sé
unnið að mati á umhverfisáhrifum
vegna framkvæmdarinnar og starf-
seminnar yfirleitt. Skýrslu þar að lút-
andi verði skilað á haustdögum og af-
staða Skipulagsstofnunar marki síðan
framhaldið.
Skipulag heimilar 300 gistirými
„Við höfum að leiðarljósi að starfa í
sátt við náttúruna og okkur tekst það
ágætlega, þannig eigum við ekki sér-
staklega von á að umhverfismat leiði
neitt í ljós sem ekki er þekkt. Við höf-
um áherslu á að vinna í sátt við alla
sem um matið fjalla. Því til viðbótar
vil ég nefna að á undanförnum 18 ár-
um höfum við skilað hátt í 2.000 árs-
verkum í margvísleg verkefni í um-
hverfismálum á svæðinu,“ segir Páll.
Hann telur að ásýnd staðarins batni
með einni heillegri byggingu fremur
en sundurleitum smáhýsum, auk þess
sem ein bygging væri umhverfisvæn í
rekstri.
Í Ásgarði Kerlingarfjalla er nú
hægt að taka á móti alls 145 nætur-
gestum í svefnpokapláss í skálum, í
uppbúin rúm í tólf litlum húsum, svo-
kölluðum nýpum, og í nýju gistihús-
álmuna sem risin er. Nýbyggingin er
úr forsmíðuðum einingum sem verk-
takafyrirtækið JÁ-verk smíðar á Sel-
fossi, flytur á vettvang og setur þar
saman. Sami háttur verður hafður á
við áformaða stækkun gistihússins.
Páll Gíslason telur að byggingin rísi í
áföngum á næstu fimm til tíu árum.
Að framkvæmdum loknum yrðu í Ás-
garði herbergi með allt að 240 uppá-
búin rúm. Deiliskipulag heimilar 300
gistirými á svæðinu.
Líparítfjöll og háhitasvæði
Gestum fjölgar ár frá ári í Kerl-
ingafjöllum. Þeir voru um 8.000 árið
2008 en hátt í 22.000 í fyrra2016.
Náttúra svæðisins er helsta aðdrátt-
araflið; há líparít- og móbergsfjöll
með þremur háhitasvæðum, þeirra
þekktast er Hveradalir. Hiti í einum
hveranna mældist 145-150°C sem er
heitasta vatn á Íslandi. Algengustu
hverirnir eru gufuaugu, soðpönnur og
gufu- og leirhverir. Alls er þetta
svæði um 367 ferkílómetrar að flat-
armáli og er friðlýsing þess deiglunni.
Morgunblaðið/Sigurður Bogi
Kerlingafjöll Nýja gistihúsið í Ásgarði sést fremst á þessari mynd, en að
baki þess og innar í dalnum eru eldri þjónustubygging og gistiskálar.
Gistihús með
120 herbergjum
 Umhverfisáhrif uppbyggingar metin
Páll Gíslason