Feykir - 20.12.2012, Blaðsíða 19

48/2012 Feykir 19
Atvinnumál
Árið komandi einkennist því miður af erfiðleikum og átökum í atvinnulífi. Margt fer
miður og ytri aðstæður verða okkur ekki hagfelldar. Mikið verður um málarekstur og
allmörg gjaldþrot. Undir haust fara að sjást einhver batamerki en óánægja og úfar meðal
manna tefja fyrir árangri. Atvinnulífið þarfnast stöðugleika til framtíðar eigi árangur að
nást.
Fólk þarf að slíðra sverðin og vinna saman, þá mun vel fara. Í ferðaþjónustunni verður
svolítill afturkippur, virðist sem erlendum ferðamönnum fjölgi ekki eins mikið og spáð
hafði verið en þar spila enn og aftur ytri aðstæður stórt hlutverk.
Atvinnuleysi mun að mestu standa í stað, þó eru einhverjar breytingar til batnaðar
þegar kemur fram á haustið. Um sjávarútveginn var erfitt að sjá eitthvað í spilunum, þar
virtist allt vera í rugli. Rúnir voru lagðar og fé rúnin birtist okkur að vísu en líka erfiðleikar,
ósætti og mikið tap. Ætli það segi okkur ekki að enn munu menn rífast um þessa auðlind
okkar, sumir munu græða og aðrir hreinlega fara á hausinn.
En eftir mikið karp og þref verður gert hlé á viðræðum um Evrópusambandsaðild.
Verum hamingjusöm
Út með illsku og hatur inn með gleði og frið, eins og sagt er í fallegu jólalagi, höfum þessar
laglínur í heiðri alla daga og verum góð við hvort annað. Þjóðin er búin að vera eitthvað
svo reið lengi og er orðin þreytt. Vitanlega er það oft á tíðum skiljanlegt því margir eiga um
sárt að binda og sjá ekki fram á bjartari daga, fyllast því vonleysi og beiskju. En hatur og
reiði er ekki lausn, því við getum ekki verið samtímis reið og hamingjusöm. Þetta tvennt er
eins og myrkur og birta. Þegar myrkur reiðinnar heltekur hugann hverfur ljós hamingjunnar.
Hvað sem árið 2013 ber í skauti sér skulum við láta ljós hamingjunnar loga skært og sýna
hvort öðru virðingu og kærleik.
Eigið góðar stundir – Megi árið 2013 færa ykkur öllum hamingju og gleði.
VÖLVUSPÁIN 2013
VÖLVUSPÁIN 2013
/