Víkurfréttir - 24.05.2018, Blaðsíða 3

Vinnum saman
Kæri bæjarbúi.
Reykjanesbær er sá bær sem vex hvað hraðast á
landsvísu. Hér er spáð fordæmalausri fjölgun íbúa og
starfa á næstu árum með fyrirsjáanlegum þrýstingi á
fasteignamarkaðinn og innviði sveitarfélagsins. Tekjur
hafa aukist verulega með bættu atvinnuástandi sem
aðallega má rekja til ferðaþjónustu og uppbyggingar á
Keflavíkurflugvelli og þeirra innviða sem þegar voru til
staðar í upphafi kjörtímabilsins.
Við stöndum frammi fyrir risastóru verkefni og það
verður jákvæð áskorun fyrir sveitarfélagið að mæta
þessari fólksfjölgun, tryggja innviðauppbyggingu en
að sama skapi reka sveitarfélagið á skynsamlegan hátt.
Ég bý yfir mikilli reynslu og þekkingu úr atvinnulífinu
og vil nýta hana Reykjanesbæ til framdráttar á þessum
spennandi tímum. Sem formaður Samtaka verslunar
og þjónustu og framkvæmdastjóri Deloitte á Íslandi
til 17 ára tel ég skipta sköpum að útfæra þessa hluti
rétt bæjarbúum öllum til hagsbóta. Í störfum mínum
hef ég unnið með ólíkum hópum og leiddi t.d. vinnu
þar sem Deloitte var sameinað úr fjórum mismunandi
fyrirtækjum. Við vitum að fjárveitingar til stofnana
ríkisins á svæðinu hafa ekki fylgt miklum vexti. Ég er
sannfærð um að ef við vinnum saman að forgangsröðun
verkefna og skýrum áherslum getum við leiðrétt það
og náð kröfum okkar í gegn.
Ég er þess fullviss að með hagsýni og skynsemi sé hægt
að koma bænum á frábæran stað sem fyrirmyndar
sveitarfélag á Íslandi í ráðdeild og fagmennsku.
Ég óska því eftir stuðningi þínum til þess að leiða næstu
bæjarstjórn Reykjanesbæjar til móts við nýja tíma og
leggja grunninn að velsæld til framtíðar.
Til þess að svo megi verða þarf að setja x við D
á laugardaginn.
Vinnum saman,
Margrét Sanders
Oddviti Sjálfstæðisflokksins í Reykjanesbæ
Reynsla
og þekking
Minnum á kosningakaffi Sjálfstæðisflokksins á Réttinum að Hafnargötu 90
milli kl. 14:00 og 17:00 á kjördag. Bendum á næg bílastæði í portinu að aftan.