Ljósmæðrablaðið - 01.12.2010, Blaðsíða 26

26 Ljósmæðrablaðið - desember 2010
Fyrsta ráðstefna Kvenna- og barnasviðs
Landspítala var haldin 8. október á Hótel
Nordica undir yfirskriftinni „Fjölskyldan
og barnið“. Milli 140-150 manns sóttu
ráðstefnuna og þótti hún takast í alla staði
mjög vel. Guðbjartur Hannesson, ráðherra
velferðarmála setti ráðstefnuna og ræddi
aðeins um ástandið í þjóðfélaginu á þessum
tímum sparnaðar og niðurskurðar og hvaða
áhrif það hefur á þá heilbrigðisþjónustu
sem hægt er að veita í landinu. Hann talaði
einnig um hversu mikilvægt væri að halda
ráðstefnur sem þessa þar sem fagfólk getur
hist og miðlað þekkingu sinni.
Fyrirlestrar voru mjög fjölbreyttir
og fóru fram samtímis í þremur fyrir-
lestrarsölum. Fyrirlesarar komu frá flestum
fagstéttum sviðanna og má þar nefna
hjúkrunarfræðinga, sálfræðinga, félagsráð-
gjafa, barnalækna og fæðinga- og kven-
sjúkdómalækna. Ljósmæður létu sitt ekki
eftir liggja og áttu verðuga fulltrúa meðal
fyrirlesara á þessari ráðstefnu.
Kristín Rut Haraldsdóttir ljósmóðir
á göngudeild mæðraverndar og fóstur-
greiningar Landspítalans fjallaði um þróun
fósturskimunnar á Íslandi, Birna Gerður
Jónsdóttir ljósmóðir á fæðingadeild Land-
spítalans fjallaði um viðhorf erlendra kvenna
til barneignarþjónustu á Íslandi, Valgerður
Lísa Sigurðardóttir ljósmóðir á göngudeild
mæðraverndar og fósturgreiningar Land-
spítalans talaði um meðgönguvernd kvenna
með vímuefnavandamál og Margrét I.
Hallgrímsson yfirljósmóðir á göngudeild
mæðraverndar og fósturgreiningar Land-
spítalans sagði frá starfsemi deildarinnar og
flæði þjónustu í meðgönguvernd kvenna á
Landspítala.
Ólöf Ásta Ólafsdóttir, forstöðumaður
fræðasviðs í ljósmóðurfræði við Háskóla
Íslands kynnti rannsóknina „Barneign og
heilsa“, sem er samstarfsverkefni Land-
spítalans, Háskóla Íslands, Heilsugæslu
höfuðborgarsvæðisins og Landlæknis-
embættisins. Tilgangur hennar er að safna
grunnupplýsingum um reynslu kvenna af
barneignarferlinu meðal íslenskra kvenna.
Síðast en ekki síst kynnti Ásrún Ösp Jóns-
dóttir ljósmóðurnemi dagbókarverkefni
sitt þar sem hún fjallaði um áverka á spöng
í fæðingu og hvað rannsóknir segja um
leiðir til að koma í veg fyrir slíka áverka
eða draga úr þeim. Önnur áhugaverð erindi
sem snúa að barneignarþjónustu voru til
dæmis upplýsingar úr fæðingaskrá, um
tóbaksreykingar á meðgöngu og áhrif þeirra
á barnið, um áhrif fæðingarþunglyndis á
tengslamyndun móður og barns og um
fósturgreiningu.
Fjöldi veggspjalda var einnig til sýnis
á ráðstefnunni og gafst góður tími til að
skoða þau og eins til að spjalla og bera
saman bækur sínar þar sem góð hlé voru á
milli fyrirlestralota. Ráðstefnugestir létu
vel af veitingum og var almenn ánægja
með daginn. Stefnt er að því að gera þessa
ráðstefnu að árlegum viðburði.
Stefanía Guðmundsdóttir
Fjölskyldan og barnið
Ráðstefna Kvenna- og barnasviðs Landspítala
Prúðbúnir ráðstefnugestir.
Guðrún Eggertsdóttir, Eva Ásrún Albertsdóttir, Rósa Bragadóttir og Margrét Hallgrímsson.
Valgerður Lísa Sigurðardóttir flytur erindi.