Skessuhorn - 30.08.2017, Blaðsíða 23

MIÐVIKUDAGUR 30. ÁGúST 2017 23
Klettagörðum 15 | 525 7700 | flytjandi.is
DAGLEGA Á FERÐINNI MEÐ
VÖRUR UM ALLT LAND
Eimskip Flytjandi veitir samræmda flutningaþjónustu
um land allt og eru áfangastaðirnir 80 talsins.
Kári í
góðri stöðu í
3. deildinni
AKRANES: Kári heimsótti
Reyni frá Sandgerði í 3.
deild karla í knattspyrnu
sl. fimmtudag. Leiknum
lauk með 2-2 jafntefli og
komu öll mörkin í fyrri hálfleik. Heima-
menn komust yfir strax á 4. mínútu með
marki Tomislavs Misura og Strahinja Pajic
bætti öðru marki við á 31. mínútu. Egg-
ert Kári Karlsson minnkaði muninn fyrir
Kára fimm mínútum síðar áður en Bakir
Anwar Nassar jafnaði á 40. mínútu. Fleiri
mörk voru ekki skoruð og lyktaði leikn-
um því með jafntefli. Kári hefur 34 stig í
toppsæti deildarinnar. Liðið stendur með
pálmann í höndunum þegar þrír leikir eru
eftir í mótinu og níu stig í pottinum. Næst
kemur Þróttur Vogum með 28 stig og þá
Vængir Júpíters með 27 stig. Tvö efstu lið-
in komast upp í 2. deild að ári.
-kgk
Skallagrímur
missti af úrslita-
keppninni
BORGARNES: Skalla-
grímur rétt missti af úr-
slitakeppni 4. deildar
karla í knattspyrnu. Liðið
tók á móti Ými í lokaleik C rið-
ils á laugardag og þurfti á sigri að halda
til að tryggja sér sæti í úrslitakeppninni,
þar sem leikið er um sæti í 3. deild næsta
sumar. Skallagrímsmenn urðu hins veg-
ar að játa sig sigraða gegn Ými, 1-4 og
höfnuðu því í 4. sæti riðilsins með 29 stig.
Viktor Ingi Jakobsson skoraði mark Skalla-
gríms í leiknum en Birgir Magnússon skor-
aði tvö mörk fyrir Ými og þeir Sölvi Víði-
sson og Ólafur Valdimar Júlíusson gerðu
sitt markið hvor.
-kgk
Lið Víkings Ó. er svo gott sem fall-
ið úr 1. deild kvenna í knattspyrnu
eftir 4-1 tap gegn ÍR í Reykjavík
síðastliðið föstudagskvöld. Dagmar
Mýrdal Gunnarsdóttir kom ÍR yfir
á 42. mínútu og þannig var staðan
í hálfleik. Raunar virtist lengi vel
sem það yrðu lokatölur leiksins,
eða allt þar til á lokamínútunum
að fjör færðist í leikana. Á 81. mín-
útu bætti Mónika Hlíf Sigurhjart-
ardóttir öðru marki við fyrir ÍR og
fjórum mínútum síðar skoraði Ást-
rós Eiðsdóttir og ÍR komið í 3-0.
Birgitta Sól Vilbergsdóttir minnk-
aði muninn fyrir Víking á 87. mín-
útu en Sandra Dögg Bjarnadóttir
átti lokaorðið fyrir ÍR á 90. mín-
útu. Afar fjörlegar síðustu tíu mín-
útur leiksins, fjögur mörk og loka-
tölur 4-1 fyrir ÍR.
Víkingskonur eru í 9. og næst-
neðsta sæti deildarinnar með 11
stig, sex stigum á eftir Hömrunum,
en eiga leik til góða. Hamrarnir
eru hins vegar með betri marka-
tölu sem nemur átta mörkum og
því er von Víkings á að halda sæti
sínu í deildinni afar veik. Það get-
ur þó allt gerst í boltanum. Næst
mætir Víkingur liði ÍA á Ólafsvík-
urvelli næstkomandi laugardag, 2.
september.
kgk/ Ljósm. úr safni.
Víkingskonur
lágu fyrir ÍR
Snæfell og UDN sendu í fyrsta sinn í
sumar sameiginlegt lið til keppni í Ís-
landsmóti karla í knattspyrnu. Keppti
liðið í A riðli 4. deildar. Var þetta
raunar í fyrsta sinn sem UDN send-
ir lið til keppni í Íslandsmóti í knatt-
spyrnu, en Snæfell hefur keppt áður.
Snæfell/UDN lék lokaleik sinn síð-
asta laugardag þegar liði tók á móti
Herði frá Ísafirði. Lauk leiknum
með 2-4 sigri Harðar. Mörk Snæ-
fells/UDN gerðu Jóhannes Helgi
Alfreðsson og Sindri Geir Sigurðar-
son. Felix Rein Grétarsson skoraði
tvö fyrir gestina og Ásgeir Kristján
Karlsson og Birkir Eydal sitt mark-
ið hvor. Snæfell/UDN tapaði öllum
14 leikjum sínum í sumar og lauk því
keppni í 8. og neðsta sæti riðilsins, án
stiga kgk
Snæfell/UDN lauk keppni án stiga
Uppskeruhátíð yngri spilara á Íslands-
bankamótaröðinni í golfi fór fram á
sunnudaginn í íþróttamiðstöð GKG
að loknu lokamóti tímabilsins hjá
yngri kylfingum landsins. Alls voru
sex mót á dagskrá tímabilsins og tóku
208 keppendur þátt í þeim. Stiga-
meistarar voru krýndir á lokahófinu
í fjórum aldursflokkum hjá báðum
kynjum. Golfklúbbur Reykjavíkur átti
fimm af alls stigameisturum sumarsins
á Íslandsbankamótaröðinni. Í fyrsta
sinn var keppt í aldursflokknum 19-21
árs á Íslandsbankamótaröð unglinga
og var góð þátttaka í þeim flokki hjá
piltunum.
Tveir vestlenskir golfspilarar kom-
ust á blað yfir tíu efstu í sínum aldurs-
flokkum. Í flokki 14 ára og yngri pilta
var Björn Viktor Viktorsson Golf-
klúbbnum Leyni á Akranesi í þriðja
sæti eftir mót sumarsins, en alls tóku
48 þátt í þeim aldursflokki. Þá varð fé-
lagi hans Axel Fannar Elvarsson GL
í 9. sæti í flokki 19-21 árs pilta, en 31
keppandi var í þeim aldursflokki. mm
Tveir félagar úr GL í flokki
bestu í ungmennagolfinu
Stigameistarar í flokki 14 ár og yngri piltar: Hansína Þorkelsdóttir, Björn Viktor
Viktorsson (GL), Böðvar Bragi Pálsson (GR), Flosi Valgeir Jakobsson (GKG) og Sigríður
Hrefna Hrafnkelsdóttir frá Íslandsbanka. Ljósm. golf.is
ÍA og Breiðablik mættust í 17. um-
ferð Pepsi deildar karla í knatt-
spyrnu á sunnudaginn. Leikurinn
fór fram á Kópavogsvelli og það
voru heimamenn sem fóru með
sigur af hólmi, 2-0. Var þetta fyrsti
leikur Skagaliðsins undir stjórn
nýs þjálfara, Jóns Þórs Hauks-
sonar. Leikurinn byrjaði fjörlega
og Blikar hefðu getað náð foryst-
unni eftir aðeins þriggja mínútna
leik ef heilladísirnar hefðu ver-
ið þeim hliðhollari. Martin Lund
tók hornspyrnu stutt, fékk bolt-
ann aftur, fór framhjá tveimur
varnarmönnum ÍA og lét vaða á
markið en boltinn small í innan-
verðri stönginni og fór síðan út af.
Skagamenn heppnir að lenda ekki
undir strax í upphafi. Skagamenn
voru þéttir til baka og freistuðu
þess að sækja hratt. Breiðablikslið-
ið stjórnaði hins vegar ferðinni og
var miklu meira með boltann.
Blikar komust yfir á 21. mínútu
eftir hornspyrnu þar sem Skaga-
menn sofnuðu á verðinum. Stutt
horn var tekið og boltinn sendur á
Aron Bjarnason. Hann fékk nægan
tíma til að athafna sig, sneri með
boltann og sendi fasta sendingu
fyrir markið. Gylfi Veigar Gylfa-
son stakk fæti sínum fyrir bolt-
ann en sendi hann rakleitt í þver-
slána og þaðan í eigið net, 1-0 fyrir
Breiðablik.
Strax eftir mark Blika fengu
Skagamenn sitt fyrsta færi. Arnór
Snær Guðmundsson átti skalla á
markið eftir hornspyrnu en skall-
inn var laus og skapaði heima-
mönnum engin vandræði. Því næst
sneri Breiðablik í sókn. Eftir góð-
an samleik fékk Sveinn Aron Guð-
johnsen boltann í teignum í fínu
færi. Hann átti gott skot að marki,
framhjá Árna en Hafþór Pétursson
var mættur á línuna og bjargaði.
Blikar voru mun sterkari það
sem eftir lifði fyrri hálfleiks en
Skagamenn ógnuðu helst eftir föst
leikatriði. Hvorugu liðinu tókst
hins vegar að skapa sér almennileg
færi og fleiri mörk voru ekki skor-
uð í fyrri hálfleik.
Skagamenn gerðu breytingu
í hálfleik og voru frískari á upp-
hafsmínútum síðari hálfleiksins en
tókst ekki að skapa sér færi. Blikar
tóku að sækja í sig veðrið og áttu
góða sókn á 58. mínútu sem end-
aði með því að Hafþór bjargaði
aftur á marklínu.
Leikurinn róaðist aðeins eft-
ir því sem leið á en að sama skapi
tók Breiðabliksliðið að falla meira
til baka. Skagamenn færðu sig ofar
á völlinn en gekk illa að skapa
sér færi. Bestu marktilraunina
átti Þórður Þorsteinn Þórðarson.
Hann náði góðu skoti eftir horn
en Gunnleifur varði alveg út við
stöng.
Það var síðan á 86. mínútu að
mark kom í leikinn og það var
Blika. Ernir Bjarnason fékk send-
ingu frá hægri og var í dauðafæri,
en lagði boltann á Aron sem sendi
hann af yfirvegun í markið. Inn-
siglaði hann þar með sigur Breiða-
bliks, 2-0 því fleiri mörk voru ekki
skoruð í leiknum.
úrslit leiksins þýða að Skaga-
menn hafa tíu stig í botnsæti deild-
arinnar og þurfa á kraftaverki að
halda til að bjarga sér frá falli. Níu
stig eru upp úr fallsætunum og að-
eins fimm leikir eftir. Næst leikur
ÍA verður sunnudaginn 10. septem-
ber næstkomandi þegar liðið mætir
KA á Akranesvelli. kgk
ÍA tapaði í
Kópavoginum
Svipmynd úr fyrri viðureign ÍA og Breiðabliks í sumar. Ljósm. gbh.