Fréttablaðið - 23.04.2015, Page 48

Sumargrill FIMMTUDAGUR 23. APRÍL 201512
BANANI MEÐ KANIL
Banani á grillinu
Banani er sérlega góður þegar
hann hefur verið grillaður.
Algengast er að kljúfa hann í
tvennt, taka úr hýðinu og setja
á grillið. Líka er hægt að grilla
hann heilan, opna hýðið að ofan
og stinga þar inn súkkulaðibitum
sem gerir gott bragð. Borið fram
með ís.
Hér er uppskrift þegar hann
er tekinn úr hýðinu og klofinn í
tvennt.
1 banani
1 msk. sykur
1 msk. kanill

Kljúfið bananann og stráið yfir
hann kanilsykri á báðum hliðum.
Leggið á heitt grill í smá stund
og snúið síðan við. Bananinn er
borinn strax fram með vanilluís og
jafnvel karamellusósu. Einn stór
banani getur dugað fyrir fjóra.
EINFALT KRYDDSMJÖR
Á GRILLSTEIKINA
Bragðmikið kryddsmjör er
ómissandi í bakaða kartöflu
og á grillaða steik. Heimalagað
kryddsmjör er einfalt að útbúa
og slær örugglega í gegn hjá
gestum.
2 hvítlauksgeirar
Knippi af savory-kryddjurt
eða timjan (ca. 20 g)
Klípa af sjávarsalti
250 g af ósöltu smjöri, mjúku
Merjið hvítlaukinn, krydd-
jurtirnar og saltið saman í mortéli
eða í matvinnsluvél. Blandið
svo saman við mjúkt smjörið og
hrærið vel saman. Mokið krydd-
smjörinu á bökunarpappír og
vefjið pappírnum í rúllu utan um
smjörið og kælið þar til það er
orðið vel stíft.
Skerið svo niður í hæfilegar
sneiðar á rjúkandi heita steikina
og í bakaða kartöflu.
Uppskrift eftir Jamie Oliver af
www.foodnetwork.com
HOLLAR KALDAR GRILLSÓSUR
Tilbúnar kaldar grillsósur eru ágætar til síns brúks en það er einfalt og fljótlegt
að búa til eigin grillsósur sem auk þess eru yfirleitt hollari. Þær má einnig búa til
deginum áður til að spara tíma. Hér eru tvær einfaldar uppskriftir frá Ásdísi Rögnu
Einarsdóttur grasalækni þar sem áherslan er lögð á hollustu og næringu:
Agúrku-raitasósa: 1 agúrka, ½ dós grísk jógúrt, 1 hvítlauksrif, ½ tsk. kúmínduft,
1-2 vorlaukar saxaðir, fersk mynta söxuð, salt/pipar. Agúrkan er rifin gróft á rifjárni
og safinn sigtaður frá. Næst er hún söltuð og látin standa í nokkrar mín. Hinu
hráefninu er blandað saman og agúrku bætt saman við.
Satay-hnetusósa: 125 g gróft lífrænt hnetusmjör, 1 fínt saxaður skalottulaukur,
1 tsk. saxað engifer, 1 kjarnhreinsaður rauður chilipipar, 300 ml. kókósmjólk eða
sýrður rjómi (má nota lífrænt majónes), safi úr ½ lime, 1 tsk. pálmasykur, 1 tsk.
tamari-sojasósa, ¼ búnt ferskt kóríander. Allt sett í matvinnsluvél eða blandara.
Heimild: www.grasalaeknir.is