Morgunblaðið - 24.10.2019, Síða 26

26 ÍÞRÓTTIR
MORGUNBLAÐIÐ FIMMTUDAGUR 24. OKTÓBER 2019
 David de Gea mun ekki verja mark
Manchester United þegar liðið sækir
Partizan Belgrad heim í riðlakeppni
Evrópudeildarinnar í knattspyrnu. De
Gea er meiddur og fór ekki með liðinu
til Zagreb frekar en Axel Tuanzebe,
Luke Shaw, Paul Pogba og Nemanja
Matic sem allir eru á sjúkralistanum.
Jesse Lingard hefur hins vegar jafnað
sig og verður í leikmannahópnum.
 Spænska knattspyrnusambandið
hefur staðfest að viðureign Barcelona
og Real Madrid í spænsku 1. deildinni
verði spiluð á Camp Nou í Barcelona
18. desember. Leikurinn átti fara fram
um næstu helgi en vegna ólátanna sem
átt hafa sér stað í Barcelona síðustu
vikurnar var ákveðið að fresta leiknum.
 Toronto Raptors hóf titilvörnina í
NBA-deildinni í körfuknattleik með
sigri gegn New Orleans Pelicans
130:122 í fyrrinótt. Fred VanVleet og
Pascal Siakam skoruðu 34 stig hvor
fyrir Toronto en hjá New Orleans var
Brandon Ingram stigahæstur með 22
stig. Í grannaslag Los Angeles Lakers
og LA Clippers hafði Clippers betur
122:112. Danny Green var at-
kvæðamestur í liði Clippers með 28
stig en hjá Clippers skoraði Kawhi
Leonard 30 stig í sínum fyrsta leik
með liðinu.
 U15 ára landslið drengja í knatt-
spyrnu tapaði fyrir Rússlandi í öðrum
leik sínum á æfingamóti UEFA sem
fram fór í Póllandi í gær. Leiknum lauk
með 3:0-sigri Rússa. Þetta var annar
leikur íslenska liðsins á mótinu en liðið
mætti Bandaríkjunum í fyrsta leik sín-
um á mótinu. Þeim leik lauk með 2:1-
sigri Bandaríkjanna. Lokaleikur Íslands
verður gegn heimamönnum í Póllandi á
morgun.
 Ítalska liðið Napoli hefur áhuga á að
fá sænska framherjann Zlatan Ibra-
himovic til liðs við sig í janúar en hann
leikur með bandaríska liðinu LA Galaxy
og verður í eldlínunni með því gegn
Minnesota í úrslitakeppni ML-
deildarinnar um næstu helgi. Zlatan er
öllum hnútum kunnugur í ítölsku A-
deildinni en hann lék með Juventus,
Inter og AC Milan. Forseti Napoli hefur
þegar rætt við Svíann sem hefur skor-
að 30 mörk í deildinni á tímabilinu.
 Knattspyrnudeild Hauka og Igor
Bjarni Kostic hafa skrifað undir samn-
ing þess efnis að Igor taki við þjálfun
meistaraflokks karla auk þess sem
hann mun leiða afreksþjálfun innan
deildarinnar og byggja upp knatt-
spyrnuakademíu Hauka, bæði karla og
kvenna, í samstarfi við aðra þjálfara
deildarinnar.Um fimm ára samning er
að ræða.
 Sigurður Gunnar Þorsteinsson er
orðinn leikmaður körfuknattleiksliðs ÍR
á nýjan leik. Hann
samdi við ÍR til
næstu tveggja ára.
Sigurður var í lyk-
ilhlutverki þegar
ÍR komst í úrslit
Íslandsmótsins
á síðustu leiktíð
en hélt að því
loknu í atvinnu-
mennsku til BC
Orchies í Frakk-
landi. Vegna fjár-
hagsvandræða
félagsins kom
þó aldrei til
þess að hann
spilaði fyrir
það.
Eitt
ogannað
MEISTARADEILD
Sindri Sverrisson
sindris@mbl.is
Napoli og Liverpool eru í góðum málum í E-riðli
Meistaradeildar Evrópu í fótbolta eftir sigra í
gær. Liverpool vann Genk í Belgíu, 4:1, og Na-
poli hafði betur gegn RB Salzburg, 3:2, í Aust-
urríki. Napoli er því efst með 7 stig nú þegar
fyrri helmingi riðlakeppninnar er lokið en Liver-
pool með 6 stig, og bæði hafa leikið tvo útileiki.
Evrópumeistarar Liverpool slepptu því að
kaupa leikmenn í sumar en eins og stjórinn Jür-
gen Klopp hefur bent á má segja að félagið hafi
eignast nýjan leikmann í Alex Oxlade-Cham-
berlain. Vissulega er alltaf óvissa falin í því
hvernig leikmenn snúa aftur úr erfiðum
meiðslum, eins og „Uxinn“ sem missti af nær
allri síðustu leiktíð vegna hnémeiðsla, en leik-
urinn í gær gefur til kynna að hann stækki
vopnabúrið hjá rauða hernum. Oxlade-Cham-
berlain skoraði fyrstu tvö mörk Liverpool gegn
Genk og það seinna var með einkar snyrtilegu
utanfótarskoti utan teigs. Hann hefur sjálfur
sagt að það geti tekið hann tvö ár að jafna sig að
fullu af meiðslunum en þessi 26 ára gamli miðju-
maður, sem kom frá Arsenal fyrir tveimur árum,
hefur nú þegar leikið fimm leiki í byrjunarliði
Liverpool á þessari leiktíð og gæti reynst liðinu
dýrmætur með sinni sköpunargleði og skotógn
utan teigs.
Belginn Dries Mertens komst upp fyrir sjálfa
goðsögnina Diego Maradona í gær á lista yfir
markahæstu leikmenn Napoli frá upphafi, þegar
hann skoraði tvö mörk í sigrinum á Salzburg.
Mertens hefur nú skorað 116 mörk fyrir Napoli
og þessi 32 ára gamli leikmaður er aðeins sex
mörkum frá því að bæta félagsmetið sem er í
eigu Marek Hamsik. Norska ungstirnið Erling
Braut Håland skoraði einnig tvö mörk í leiknum
og hefur þar með skorað sex mörk í fyrstu þrem-
ur leikjum sínum í keppninni sem er einsdæmi.
 Chelsea vann afar sterkan útisigur á Ajax í
H-riðli, 1:0, með marki varamannsins Michy
Batshuayi. Ajax og Chelsea hafa bæði 6 stig en
Valencia 4 eftir 1:1-jafntefli við Lille. Öll úrslit
og stöður má sjá á síðu 24.
Uxinn stækkar vopnabúrið
 Napoli og Liverpool í góðum málum eftir fyrri helming riðlakeppninnar
AFP
Sterkur Alex Ox-
lade-Chamberlain
skoraði tvö mörk
utan teigs fyrir
Liverpool í gær.
Aron Kristjánsson og lærisveinar
hans í landsliði Barein í handknatt-
leik halda enn í vonina um að
tryggja sér farseðilinn á ólympíu-
leikana í Tókýó á næsta ári. Und-
ankeppni Asíuþjóða fyrir ólympíu-
leikanna hefur staðið yfir í Katar
síðustu daga. Barein endaði í öðru
sæti í B-riðlinum með 4 stig eins og
S-Kórea og mætir í dag heima-
mönnum í Katar í undanúrslitum
mótsins. Í hinni undanúrslitavið-
ureigninni eigast við S-Kórea og
Sádi-Arabía. Sigurliðin mætast í úr-
slitaleik um ólympíusætið.
Fer Aron með
Barein á ÓL?
Morgunblaðið/Hari
Undanúrslit Aron Kristjánsson og
lærisveinar hans mæta Katar í dag.
Jóhannes Harðarson, þjálfari
norska liðsins Start, er búinn að
framlengja samning sinn við félag-
ið og gildir samningurinn út tíma-
bilið 2021. Jóhannes tók við þjálfun
liðsins í byrjun apríl þegar Kjetil
Rekdal var rekinn frá félaginu en
Jóhannes hafði verið aðstoð-
armaður hans. Þegar þremur um-
ferðum er ólokið í norsku B-
deildinni er Start í 3. sæti, þremur
stigum á eftir Sandefjord en Aale-
sund er komið upp. Tvö efstu liðin
komast upp en liðin í sætum 3-6
fara í umspil.
Jóhannes áfram
með lið Start
Ljósmynd/Start
Þjálfari Jóhannes Harðarson er
búinn að framlengja við Start.
„Ég er helvíti spenntur fyrir
Derby. Við tökum þann leik 100
prósent,“ sagði Eyþór Aron Wö-
hler léttur í bragði við ÍA TV eftir
að hafa skorað fernu á fyrsta hálf-
tíma leiksins í mögnuðum 12:1-
sigri ÍA á Levadia Tallinn í Eist-
landi í gær. Um var að ræða seinni
leik liðanna í 1. umferð ungmenna-
deildar UEFA í fótbolta. ÍA mætir
enska liðinu Derby í næstu um-
ferð.
ÍA vann einvígið við Levadia
samtals 16:1 og er það stærsti sig-
urinn í 1. umferðinni. Derby sló
Minsk frá Hvíta-Rússlandi út,
samtals 9:2. Áætlað er að ÍA og
Derby mætist á Íslandi 6. nóv-
ember og í Englandi 27. nóvember.
Ungmennadeildin skiptist í tvo
hluta framan af leiktíð. ÍA leikur í
„landsmeistarahlutanum“ en í
„Meistaradeildarhlutanum“ leika
ungmennalið liðanna 32ja sem
leika í riðlakeppni Meistaradeildar
Evrópu í vetur. Sigurliðið úr ein-
vígi ÍA og Derby mætir svo liði úr
Meistaradeildarhlutanum (liði sem
endar í 2. sæti síns riðils) í umspili
um sæti í 16-liða úrslitum keppn-
innar.
Gísli Laxdal Unnarsson og Aron
Snær Ingason skoruðu tvö mörk
hvor fyrir ÍA í gær, og þeir Sig-
urður Hrannar Þorsteinsson, Elís
Dofri Gylfason, Aron Snær Guð-
jónsson og Brynjar Snær Pálsson
eitt mark hver. sindris@mbl.is
Morgunblaðið/Hari
Þjálfari Sigurður Jónsson þjálfar 2.
flokk ÍA með Elinbergi Sveinssyni.
Fá Derby í heimsókn
eftir tröllasigur
 Eyþór með fernu fyrir ÍA í Eistlandi
Pólski framherjinn Robert Lew-
andowski, leikmaður þýska meist-
araliðsins Bayern München, er einn
allra mesti markaskorarinn í fótbolta-
heiminum í dag en honum halda eng-
in bönd í vítateig andstæðinganna.
Tólfta leikinn í röð var Pólverjinn á
skotskónum þegar Bæjarar unnu 3:2
sigur gegn Olympiakos í Meist-
aradeildinni í fyrrakvöld. Pólska
markavélin skoraði tvö fyrstu mörk
Bayern-liðsins og hann hefur þar með
skorað 21 mark í 17 leikjum með Bay-
ern München og pólska landsliðinu á
tímabilinu. Enginn leikmaður hefur
skorað fleiri mörk á þessu ári. Lew-
andowski, sem er 31 árs gamall, hefur
skorað 36 mörk í 36 leikjum, fjórum
mörkum meira en Lionel Messi og
fimm mörkum meira en Kylian
Mbabbé og Sergio Agüero.
Lewandowski hefur skorað 18
mörk í 13 leikjum með Bayern Mün-
chen í öllum keppnum á leiktíðinni,
sex mörkum meira en næsti maður
hefur skorað í fimm sterkustu deild-
unum í Evrópu.
Eini leikurinn sem Pólverjinn hef-
ur ekki náð að skora fyrir þýsku
meistarana á tímabilinu var þegar
Bayern München og Borussia Dort-
mund áttust við í árlegum leik meist-
aranna og bikarmeistaranna í byrjun
ágúst. Lewandowski hefur skorað
tvær þrennur á tímabilinu, eina fyrir
Bayern og eina fyrir landsliðið og
með mörkunum tveimur sem hann
skoraði gegn Olympiakos komst hann
upp fyrir Hollendinginn Ruud van
Nistelroy í 5. sæti yfir markahæstu
leikmenn Meistaradeildarinnar þar
sem hann hefur skorað 57 mörk.
gummih@mbl.is
Lewandowski
er óstöðvandi
 Markahæstur allra á árinu
AFP
Markavél Robert Lewandowski
getur ekki hætt að skora.