Feykir - 26.09.2018, Blaðsíða 5

F ÍÞRÓTTAFRÉTTIR Fleiri íþróttafréttir á Feykir.is
2. deild karla :: Tindastóll – Völsungur 3-2
Lamanna með þrennu og
Stólarnir enduðu í 8. sæti
Það var áþreifanleg spenna í
2. deildinni sl. laugardag þegar
síðasta umferð sumarsins
var leikin. Á Sauðárkróksvelli
mættust lið Tindastóls
og Völsungs og þar gátu
Stólarnir fallið og Völsungur
farið upp um deild. Það voru
heimamenn sem voru sterkari
í fjörugum og spennandi leik
sem endaði 3-2. Þegar úrslit
dagsins lágu ljós fyrir kom í
ljós að lið Tindastóls endaði í
áttunda sæti en fyrir síðustu
umferðina hafði liðið aldrei
verið ofar en í 10. sæti í sumar.
Stólarnir fóru vel af stað og
voru sterkara liðið framan af
leik. Eitthvað fór mótlætið í
taugar Húsvíkinga sem fengu
tvö gul spjöld. Á 21. mínútu
kom fyrsta mark leiksins en þá
fékk Stefan Lamanna frábæra
stungu inn fyrir vörn gestanna
og skoraði af öryggi. Staðan var
1-0 í hálfleik og þá varð ljóst að
ekkert annað en sigur kom til
greina hjá liði Tindastóls því á
þessum tíma voru öll þrjú liðin í
botnbaráttunni að vinna leiki
sína.
Eflaust vissu gestirnir þetta
þegar síðari hálfleikur hófst því
þeir pressuðu stíft að marki
Tindastóls, fengu nokkrar horn-
spyrnur og aukaspyrnur, en
vörn Tindastóls hélt (björguðu
tvisvar á línu) og Stólarnir náðu
nokkrum efnilegum skyndi-
sóknum. Á 59. mínútu slapp
Lamanna enn inn fyrir vörn
Völsungs og Sigvaldi Einarsson
greip til þess ráðs að toga hann
niður og dómarinn átti engan
annan kost í stöðunni en að
sýna Sigvalda rauða spjaldið.
Þrátt fyrir það að vera einum
færri lögðu gestirnir ekki árar í
bát. Þeir uppskáru enn nokkrar
hornspyrnur og upp úr einni
slíkri jafnaði Elvar Baldvinsson
metin. Stuðningsmenn Stólanna
voru nú sárgramir en það var
fátt sem fékk stöðvað Lamanna í
þessum leik. Á fjögurra mínútna
kafla nýtti hann enn hraða sinn
og leikni og skoraði tvö mörk á
73. og 77. mínútu eftir góðan
undirbúning félaga sinna.
Staðan orðin 3-1 og nú voru
leikmenn Völsungs látnir vita
að þeir ættu ekki lengur
möguleika á að komast upp
miðað við stöðuna í öðrum
leikjum. Þeir létu þessi skilaboð
sem vind um eyru þjóta og
minnkuðu muninn í eitt mark
þegar Sæþór Olgeirsson gerði
laglegt mark eftir ansi þreytu-
legan varnarleik Tindastóls.
Húsvíkingar reyndu hvað
þeir gátu til að jafna leikinn en
höfðu ekki erindi sem erfiði.
Stólarnir léku skynsamlega
síðustu mínúturnar og voru í
raun nær því að skapa sér góð
færi en gestirnir. Lokatölur því
3-2 og leikmenn og stuðnings-
menn Tindastóls kampakátir
með að hafa haldið sæti sínu í 2.
deild eftir strembið sumar þar
sem liðið var lengstum í fallsæti.
Sem fyrr segir færði sigurinn
lið Tindastóls upp um tvö sæti í
2. deild. Stólarnir enduðu í
áttunda sæti, komust upp fyrir
lið Hattar Egilsstöðum sem féll
eftir tap gegn toppliði Aftur-
eldingar, og lið Víðis Garði sem
tapaði fyrir Leikni Fáskrúðsfirði
3-0. Liði Tindastóls var af
spekingum spáð falli í sumar,
var langneðst í spánni, en þrátt
fyrir snarbratta og erfiða byrjun
á mótinu náðist að þétta varn-
arleikinn og búa til liðsanda sem
skilaði liðinu áframhaldandi
veru í 2. deildinni. /ÓAB
Uppskeruhátíð knattspyrnudeildar Tindastóls
Bestu og efnilegustu valin
Laugardaginn síðasta var haldin uppskeru-
hátíð meistaraflokka kvenna, karla og 2 fl.
kvenna eftir viðburðaríkan dag þar sem
karlaliðið náði að tryggja sér 8. sæti í 2.
deild og 2. fl. kvenna kláraði sitt tímabil
einnig. Meistaraflokkur kvenna átti líka
góðu gengi að fagna og mun leika í
Inkasso-deildinni á næsta tímabili.
Það var glaður hópur leikmanna sem kom
saman á Mælifelli á Sauðárkróki, snæddi
góðan kvöldverð og naut skemmtidagskrár
undir öruggri stjórn vallarþular Sauðárkróks-
vallar, Guðbrands Guðbrandssonar. Að venju
voru veittar viðurkenningar fyrir tímabilið en
þær hlutu eftirtaldir:
2. flokkur kvenna
BESTI LEIKMAÐUR - Vigdís Edda Friðriksdóttir
EFNILEGASTI LEIKMAÐUR - Eva Rún Dagsdóttir
BESTI LIÐSFÉLAGINN - Kristrún María
Magnúsdóttir
Meistaraflokkur kvenna
BESTI LEIKMAÐUR - Murielle Tiernan
EFNILEGASTI LEIKMAÐUR - María Dögg
Jóhannesdóttir
BESTI LIÐSFÉLAGINN - Bryndís Rut
Haraldsdóttir
Meistaraflokkur karla
BESTI LEIKMAÐUR - Stefan Lamanna
EFNILEGASTI LEIKMAÐUR - Jón Gísli Eyland
Gíslason
BESTI LIÐSFÉLAGINN - Arnar Skúli Atlason
Heimild og myndir: FB-síða Stuðningsmenn
knattspyrnudeildar Tindastóls/ Kristjana Jónsdóttir
Efnilegust og best. Aftari röð f.v. Bryndís Rut Haraldsdóttir, Eva Rún Dagsdóttir, Murielle Tiernan, Vigdís Edda Friðriksdóttir, María
Dögg Jóhannesdóttir og Kristrún María Magnúsdóttir. Fremri röð f.v. Jón Gísli Eyland Gíslason, Arnar Skúli Atlason og Stefan
Lamanna. MYNDIR: KRISTJANA JÓNSDÓTTIR
Nýir þjálfarar mfl karla, Sigurður Halldórsson og Guðni Þór
Einarsson ásamt Arnari Skúla, Jóni Gísla og Stefan Lamanna.
Bestu leikmenn meistaraflokka Tindastóls, Stefan Lamanna
og Murielle Tiernan.
Jón Grétar Guðmundsson og Sverrir Hrafn Friðriksson létu sig
ekki vanta í gleðina.
Fótboltamömmurnar Helga Eyjólfsdóttir, Ingibjörg Huld
Þórðardóttir og Þórey Gunnarsdóttir.
Besti liðsfélaginn, efnilegasti leikmaðurinn og besti leikmaður
meistaraflokks kvenna ásamt Guðna Einarssyni þjálfara.
Lamanna í baráttunni á laugardaginn en hann var magnaður í leiknum. MYND: ÓAB
36/2018 5