Feykir - 26.06.2019, Blaðsíða 8

Heilir og sælir lesendur góðir.
Það er Magnús J. Jóhannsson sem er
höfundur að fyrstu hringhendunni að þessu
sinni. Mun hún ort til einhvers sem hann átti
í skáldadeilum við.
Verum sáttir, ljúfu ljóðin
leiki dátt um hyggjurann.
Verri þáttinn, illa óðinn
aftur láttu í handraðann.
Ekki mun Magnús hafa verið par hrifinn af
þeim sem völdu sér veginn hægra megin í
pólitíkinni eftir næstu vísu hans að dæma.
Ef þeir dingla dollaraseðli
dregst að íhaldshyskið leitt.
Þetta er þess innsta eðli
engin rök fá slíku breytt.
Um samferðamann á lífsins leið yrkir
Magnús:
Góðmennskunnar gullnu strönd
gekkstu líkt og fleiri.
Réttir ávallt hjálparhönd
hinum kraftameiri.
Ekki er skrýtið á þessu góða vori sem við
höfum nú lifað að fallegar vísur verði til.
Ingólfur Ómar á þessar:
Glitrar árdags geislaflóð
glæður himins bála.
Þessa skæru skýjaslóð
skaparinn var að mála.
Vorið andar blíðum blæ
blómin skreyta runna.
Geislum vefur grund og sæ
glóbjört himinsunna.
Nokkuð keður við annan tón í næstu vísu
Ingólfs sem ort er um gróðafíkn þekktra
aðila.
Gróðafíkn er grimm og köld,
glapsýn marga lokkar.
Ólmir girnast auð og völd
auðvaldsdrullusokkar.
Ekki lagast lýsingin á hryllingnum í þessari
limru Ingólfs:
Það vekur oft vansa og hrylling
viðurstyggð, reiði og trylling.
Því auðvaldið græðir
en almúginn blæðir.
Hér er gegndarlaus græðgi og spilling.
Var að sýsla í dóti mínu og leita kannski að
fallegum vor- eða sumarvísum. Sú kunna
kona, Halla Eyjólfsdóttir á Laugabóli, mun
vera höfundur að þessum:
Alltaf lifnar andi minn,
enda fjölga sporin,
þegar græni gróðurinn
gægist upp á vorin.
Hátt á lofti svífur sól
sér á jörðu niður,
lítur yfir Laugaból,
litlu blómin styður.
Vísnaþáttur 738 Jón Guðmundsson í Garði átti orð til að lýsa hrifningu sinni á vorkomunni.
Syngja lindir sólarljóð,
sveitin hrindir dvala.
Eygló kyndir árdagsglóð
yfir tindum dala.
Sólin völlinn vermir hlý,
vaknar flest úr dái.
Lífsþrá, von og löngun ný
lifna á hverju strái.
Jóhann Ólafsson, áður bóndi í Miðhúsum í
Óslandshlíð, á þessar:
Glóa hlíðar, glampar sær,
gleðst nú lýður dreyminn.
Blómafríða grundin grær,
guð er að smíða heiminn.
Fríkkar landið, léttist mál,
leysist vanda þáttur.
Víkur grand, en vermir sál
vorsins andardráttur.
Takið eftir, lesendur góðir, hve vel gerðar
hringhendur eru þar á ferð. Veit ekki
hvenær þær eru ortar en það mun hafa verið
vorið 1977 sem ég lærði þær.
Ekki skemmir þessa syrpu þessi fallega
hugsun í fjórum línum Ólínu Jónasdóttur
frá Fremri-Kotum í Blönduhlíð.
Það á í sjóði þarflegt flest,
þess eru djúpir brunnar,
hefir líka bjargað best
börnum náttúrunnar.
Kannski er Skagfirðingurinn Pétur
Stefánsson að birta sannan kafla úr ævisögu
sinni er hann yrkir svo:
Oft hef ég mér í drykkju drekkt
dapur í hugraun sárri.
Að dreypa á öli er unaðslegt
en ást á konu er skárri.
Ennþá vill hún á mig hlýða.
Aldrei brúkar röfl og pex.
Eftir því sem árin líða
ást til konu minnar vex.
Alltaf gleður okkur, landsins börn, tryggð
dýranna. Björn Gottskálksson orti þessa:
Manna þó ég missi sýn
miðjan fram á daginn,
hundurinn kemur helst til mín,
honum er tryggðin lagin.
Allt í einu virðist þessi þáttur að verða
tilbúinn til ferða. Hressum okkur í
lokin með svo vondum skilaboðum til
okkar karla. Höfundur er Guðmundur
Arnfinnsson.
Svo mælti hún Oddfríður Alda
sem orðin var konan hans Valda:
Ég þarf ekki á yður,
Ólafur smiður
né öðrum, sem stendur, að halda.
Veriði þar með
sæl að sinni.
/ Guðmundur
Valtýsson
Eiríksstöðum,
541 Blönduósi
Sími 452 7154
( GUÐMUNDUR VALTÝSSON ) frida@feykir.is
Bæjarhátíðin Hofsós heim
Verður feikna fjör í fjörunni
Hofsósingar og nærsveitungar
halda bæjarhátíð sína um
næstu helgi undir yfirskriftinni
Hofsós heim. Hátíðin er arftaki
Jónsmessuhátíðar á Hofsósi
sem haldin var árlega um margra
ára skeið, síðast árið 2017.
Feykir hafði samband við Völu
Kristínu Ófeigsdóttur, einn af
skipuleggjendum hátíðarinnar,
og fékk hana til að segja örlítið frá
hátíðinni, skipulaginu og því sem í
vændum er.
Hverjir standa að bæjarhátíðinni
Hofsós heim?
Íbúasamtökin Byggjum upp Hofsós og
nágrenni tóku það að sér að sjá um
hátíðina þegar fyrrum Jónsmessunefnd
lét af störfum. Við í stjórn samtakanna
höfum svo haldið íbúafundi og boðið
þeim sem vilja að starfa með í
svokallaðri undirbúningsnefnd. Þar
eru allir velkomnir til starfa og nú eru
átta manns í nefndinni, allt konur í
þetta skiptið. Einhverjir hafa skoðanir
og áhuga á dagskrárgerð hátíðarinnar,
skipulagi og framkvæmd og ég hvet
þessa aðila eindregið til að koma til
starfa og hafa þannig áhrif á hinar
ýmsu ákvarðanir.
Margir einstaklingar hafa frumkvæði
að viðburðum þessa helgi og er það
mjög dýrmætt. Til dæmis hefur Finnur
Sigurbjörnsson verið með
ljósmyndasýningu á bæjarhátíð hér í
fjöldamörg ár og eru gríðarleg
verðmæti falin í þeirri vinnu. Eins hafa
félögin í þorpinu verið hluti af
bæjarhátíðinni, eldri borgarar sjá um
kjötsúpu, leikfélagið skemmtir á
kvöldvöku, handverksfélagið Fléttan
býður í prjónakaffi, Neisti sér um
skotboltamót og Lionsmenn bjóða til
grillveislu.
Hvað er helst til skemmtunar?
Stærsti viðburðurinn hjá okkur í ár er
Stjórnarballið. Það verður gaman að sjá
alvöru stórhljómsveit á sviðinu í
Höfðaborg og ríkir víða eftirvænting.
Annars finnst mér erfitt að gera upp á
milli viðburða. Ég persónulega er
spenntust fyrir því að dansa við Steina
Stebbu á dansleik með Landabandinu,
en það er ávísun á mikið fjör og strengi
daginn eftir. Ég veit jafnframt að
Geirmundur, varðeldur og sykurpúðar
eru frábær blanda og það verður feikna
fjör í fjörunni.
Hvað getur almenningur gert til að
hátíðin takist sem best?
Það eru margir þættir sem skipta máli
þegar svona hátíð fer fram. Mikilvægt
er að fólk taki með sér góða skapið og
láti ekki smávægilega hnökra fara í
taugarnar á sér. Nauðsynlegt er að
ganga vel um og að næturgestum á
tjaldstæði sé sýnd tillitssemi er kemur
að hávaða. Eins er mjög þarft að koma
því áleiðis til gesta að þeir aki ekki á
bílum sínum niður í Stað á
laugardeginum nema af ýtrustu
nauðsyn en þar er lítið um bílastæði og
í brekkunni getur auðveldlega myndast
tappi.
Hvar er þægilegast að nálgast
dagskrána?
Við reynum að vera virk á Facebook en
þar er einnig dagskráin birt í heild
sinni. Við hvetjum ykkur til að fylgjast
með þar (https://www.facebook.com/
hofsosheim) /FE
Söngvakeppni barnanna verður meðal dagskrárliða á Hofsós heim í ár eins og í fyrra þegar þessi mynd var tekin.
MYND: FE
8 25/2019