Bæjarins besta - 17.09.1997, Page 8
8 MIÐVIKUDAGUR 17. SEPTEMBER 1997
Halldór
Jónsson í yfirheyrslu um
Básafellsmál og bæjarmál
Halldór Jónsson er vinnslustjóri hjá Básafelli hf. í
Ísafjarðarbæ, en það fyrirtæki varð til í núverandi mynd á
síðasta ári við sameiningu nokkurra sjávarútvegsfyrirtækja á
Ísafirði og Flateyri. Frá 1994 hefur Halldór jafnframt verið
bæjarfulltrúi á Ísafirði og síðan í sameinuðum Ísafjarðarbæ, átt
sæti í bæjarráði og verið formaður hafnarstjórnar.
Árið 1980 var Halldór „í fyrsta stúdentahópi vinar míns
Björns Teitssonar við Menntaskólann á Ísafirði“ eins og hann
kemst að orði. Að loknu stúdentsprófi stundaði hann ýmis störf
og lauk prófi sem útgerðartæknir árið 1986. Eftir það var hann
skrifstofustjóri Frosta hf. í Súðavík 1986-1990 og framkvæmda-
stjóri Meleyrar hf. á Hvammstanga 1990-1992. Þá varð hann
útgerðarstjóri og síðan framkvæmdastjóri Rits hf. á Ísafirði
uns það fyrirtæki rann inn í Básafell hf. á síðasta ári. Hann tók
þá við starfi vinnslustjóra hjá Básafelli og hefur yfirumsjón
með allri rækjuvinnslu fyrirtækisins. Á árunum 1991-1994 var
Halldór formaður Félags rækju- og hörpudiskframleiðenda.
Á síðustu vikum, mánuðum og misserum hefur Halldór oft
verið umtalaður og stundum umdeildur vegna starfa sinna í
Básafelli og bæjarstjórn. Hann hefur unnið við sameiningu
bæði fyrirtækja og sveit-
arfélaga hér vestra á síðustu árum og hefur með þeim hætti
tekið virkan þátt í þeirri nýsköpun og raunar umbyltingu sem
hefur verið að eiga sér stað á norðanverðum Vestfjörðum á
báðum þeim sviðum. En forsenda allrar þeirrar vinnu er
einmitt sú, að menn hafi trú á framtíð Vestfjarða.
Bæjarins besta heimsótti Halldór
á skrifstofu hans á efstu hæð
Norðurtangahússins við
Sundstræti á Ísafirði,
einmitt í því her-
bergi þar sem
skólasálfræð-
ingi er ætl-
að aðset-
ur ef hugmyndir fræðslunefndar Ísafjarðarbæjar um nýtingu
hússins fyrir Grunnskóla Ísafjarðar ná fram að ganga. Þær
hugmyndir voru á fundi bæjarstjórnar fyrir skemmstu settar í
biðstöðu og nánari athugun og hefur það mál allt valdið
töluverðum titringi innan bæjarfélagsins. Svo er um fleiri mál
á þeim umbrotatíma sem Halldór hefur átt sæti í bæjarstjórn.
Hvað hefur hann að segja um þátttöku sína í átökum,
umbreytingum og uppbyggingu í vestfirsku samfélagi
síðustu árin?
„Síðustu þrjú til fjögur árin hafa
vissulega verið mikil umbrotaár á
norðanverðum Vestfjörðum“, segir
Halldór. „Sameining sveitarfélaga og
sameining fyrirtækja hafa verið lengi í
umræðunni og ég hef kannski
verið svo heppinn að lenda inni
í þessari hringiðu miðri í báðum
tilvikum.“
Sameining sveitarfélaganna
„Sameining sveitarfélag-
anna hefur að mörgu leyti tekist
mjög vel. Auðvitað vita allir að gerð
jarðganganna var forsenda hennar og
margir voru hræddir um að Vestfirðingar
ætluðu ekki að rækja skyldur sínar gagnvart
þeirri framkvæmd. Sem betur fer tókst þó sveitar-
stjórnarmönnum, á síðustu stundu, vil ég meina, að
snúa bökum saman, að minnsta kosti á því svæði sem nú er
Ísafjarðarbær, og gerðu þetta að mörgu leyti mjög skynsamlega.
Ég hygg að flestir geti verið sammála um að sameining þessara
sveitarfélaga hefði ekki mátt gerast miklu seinna. Auðvitað heyrðust
þær raddir hér á Ísafirði, að menn væru að fórna einhverri framtíð með því
að taka misjafnlega skuldug sveitarfélög inn á sig, en ég held að allir hljóti að
fallast á það í dag, að framtíð okkar hér í gamla Ísafjarðarkaupstað hefði ekki
verið mikil án þessara byggða í kringum okkur. Ég vona því að þær áhyggjur séu nú
horfnar og fólk sé orðið sannfært um að rétt hafi verið gert þegar sveitarfélögin voru
sameinuð. Ástæða þess að þetta hefur tekist betur hér en sums staðar annars staðar,
án þess að við séum að nefna nein nöfn í því sambandi, er sú að menn höfðu vit á
því hér að vera ekki að gefa fólki neinar gyllivonir. Hér var farið mjög
hreinskilnislega yfir stöðu sveitarfélaganna og hvað væri þar framundan, en
voru ekki með nein yfirboð varðandi aukna þjónustu. Menn sögðu einfaldlega,
að stærsti sigurinn yrði í því fólginn ef hægt yrði að halda því sem við
höfðum. Kannski er ég ekki fyllilega dómbær, en mér finnst a.m.k. að sá
tími sem liðinn er frá stofnun hins nýja Ísafjarðarbæjar hafi ekki leitt í ljós
neina umtalsverða ósátt með sameiningu eins og sums staðar hefur komið
fram.“