Börn og menning - 01.09.2008, Síða 38

36
Börn og menning
íslensku barnabókaverðlaunin 2008
íslensku barnabókaverðlaunin hafa verið veitt frá árinu 1986 og hafa fjölmargir þekktir rithöfundar stigið
sín fyrstu skref fram á ritvöllinn undir merkjum þeirra en einnig hafa höfundar sem þegar eru þekktir
hreppt verðlaunin.
Þann 21. október voru verðlaunin afhent í tuttugasta og fyrsta sinn við hátíðlega athöfn í Hlíðaskóla
í Reykjavík. Gunnar Theodór Eggertsson, bókmennta- og kvikmyndafræðingur, hreppti verðlaunin fyrir
sögu sína, Steindýrin. Að mati dómnefndar er hér á ferðinni hörkuspennandi og frumleg ævintýrasaga sem
sækir efnivið sinn í þjóðsögur og ævintýri en er þó engu lík. Við athöfnina fluttu börn úr skólanum tónlist
og i lok hennar lásu tveir nemendur, sem sátu einnig í dómnefnd, stutta kafla úr verðlaunabókinni.
Steindýrin er fyrsta bók Gunnars Theodórs en hugmyndin að verkinu kviknaði þegar hann vann við að
segja börnum sögur og ævintýri í frístundaheimilinu Hlíðaskjóli. Hann skrifaði kafla fyrir kafla og las fyrir
krakkana. Þannig skapaðist frásagnaheimur sem leiddi aðalpersónurnar og ímyndunarafl barnanna á vit
huldufólks og allskyns vætta, ofan í jörðina og til fjöldamargra landa.
Að íslensku barnabókaverðlaununum standa Forlagið, Fjölskylda Ármanns Kr. Einarssonar heitins, IBBY
á íslandi og Barnavinafélagið Sumargjöf. Árlega er auglýst eftir handritum sem höfundar senda inn undir
dulnefni. Úr þeim velur dómnefnd skipuð börnum og fullorðnum verðlaunasöguna og tilkynnt er um
vinningshafann daginn sem bókin kemur út.
i