Morgunblaðið - Sunnudagur - 04.07.2021, Blaðsíða 20

20 MORGUNBLAÐIÐ SUNNUDAGUR 4.7. 2021
ÍÞRÓTTIR
Funahöfða 7, 110 Reykjavík | Sími 577 6666
& "!(%'$#
"$&'%#!
"-+ ! !" &,'*)%(!$#
Kæli- & frystiklefar
í öllum stærðum
Ljósmyndir Rutar og Silju
Skipholti 31 | 105 Reykjavík | Sími 568 0150 | www.rut.is |
Opið alla virka daga kl. 10-17
Passamyndir
Tímapantanir
í síma 568 0150
eða á rut@rut.is
Tryggjum
tveggja metra fjarlægð
og gætum ítrustu
ráðstafana
Þ
ar til mánudaginn fyrir tæp-
um tveimur vikum var ruðn-
ingskappinn Carl Nassib lík-
lega þekktastur fyrir eftirminnilega
framgöngu í HBO-þáttunum Hard
Knocks. Fylgja heimildaþættirnir á
hverju ári einu liði (raunar tveimur í
fyrra) er það undirbýr sig fyrir tíma-
bilið í NFL-deildinni. Árið 2018 var
liði Cleveland Browns fylgt eftir þar
sem Nassib lék sem varnarlínuendi
(e. defensive end).
Fyrir fundi varnarlínumanna pré-
dikaði Nassib yfir mönnum um
vexti, tímaeyðslu á Instagram og
annað sem honum fannst kollegar
sínir ekki nægilega fróðir um og fór
oft og tíðum á kostum. En eins og oft
verður hjá þeim sem vekja athygli
áhorfenda í þáttunum átti Nassib
ekki upp á pallborðið hjá Browns
þegar hópurinn hafði verið skorinn
niður hjá liðinu.
Hann fékk þó samning hjá liði
Tampa Bay Buccaneers nokkrum
dögum síðar og lék með liðinu tíma-
bilin 2018 og 2019. Í fyrra gerði Nas-
sib samning við Las Vegas Raiders
sem hann lék með á síðasta tímabili
og mun leika með í vetur, þá 28 ára.
Fær stuðning Bidens
Það voru þó ekki fjárráð eða ruðn-
ingsgeta sem vakti athygli fólks á
Nassib mánudaginn 21. júní síðast-
liðinn. „Mig langaði bara að greina
snöggvast frá því að ég er samkyn-
hneigður,“ sagði hann í myndbandi á
Instagram-síðu sinni. „Ég ætlaði
mér að gera þetta fyrr en líður loks
nógu vel til þess að koma þessu frá
mér.“
Varð hann þar með fyrsti leik-
maður deildarinnar sem kemur út úr
skápnum á meðan hann er enn að á
vellinum. Áður hafði knatt-
spyrnumaðurinn Robbie Rogers
orðið fyrsti opinberlega samkyn-
hneigði karlmaðurinn til að leika í
einni af fjórum stærstu íþróttadeild-
um Bandaríkjanna árið 2013. Jason
Collins kom út úr skápnum sama ár
þegar hann var samningslaus í
NBA-deildinni. Hann gerði samning
við Brooklyn Nets og lék með þeim
síðustu leiki tímabilsins 2013-14 en
lagði skóna á hilluna eftir tímabilið.
Stuðningsyfirlýsingum rigndi yfir
Nassib eftir að hann greindi frá mál-
um sínum. Rodger Goodell, fram-
kvæmdastjóri NFL, sagðist stoltur
af Nassib, DeMaurice Smith, fram-
kvæmdastjóri leikmannasamtaka
deildarinnar, lýsti yfir stuðningi sín-
um sem og Mark Davis, eigandi Ra-
iders, og Jon Gruden, þjálfari liðs-
ins. Meira að segja Joe Biden
Bandaríkjaforseti skarst í leikinn.
Þá hafa aðrir leikmenn einnig lýst
yfir stuðningi sínum. Af viðtökunum
að dæma mætti ætla að ekkert til-
tökumál þyki að vera samkyn-
hneigður íþróttamaður. Árið er jú
2021 og viðhorf til hinsegin fólks hef-
ur breyst til batnaðar síðustu ár.
Klefinn langt á eftir
Málið er þó ekki svo einfalt og eru
ummæli Nassib í myndskeiði hans
merki um það. „Ég vona að einn
daginn verði ekki þörf á mynd-
skeiðum sem þessum og öllu ferlinu
sem snýr að því koma út úr skápn-
um,“ sagði hann.
Chris Simms, fyrrverandi leik-
stjórnandi Tampa Bay Buccaneers
sem nú fjallar um NFL fyrir NBC-
sjónvarpsstöðina, sagði í hlaðvarps-
þætti í síðustu viku að Nassib muni
mæta einhverri mótstöðu innan NFL-
deildarinnar, þótt það væri á bak við
tjöldin. „Þetta verður ekki samþykkt
af öllum í klefanum í NFL,“ sagði
Simms. Hann sagðist vona að Nassib
yrði tekið opnum örmum og allir inn-
an deildarinnar gætu verið opnir um
kynhneigð sína í framhaldinu.
„En það er ekki þannig sem hlut-
irnir ganga fyrir sig í NFL. Klefinn
er mörgum árum á eftir restinni af
samfélaginu.“
Ummæli Simms varpa ljósi á
stöðu samkynheigðra innan karla-
íþrótta. Þeir sem hafa komið út úr
skápnum eru bæði mjög fáir og hafa
flestir gert það undir lok ferilsins
eða eftir að honum lýkur. Einhverjir
þeirra sem leikið hafa eftir að hafa
komið úr skápnum segjast ekki hafa
fengið jöfn tækifæri samanborið við
aðra leikmenn. Hið sama má ekki
segja um kvennaíþróttir þar sem
samkynhneigð virðist hafa verið
samþykkt fyrir nokkru síðan, að
minnsta kosti í talsvert meira mæli
en í karlaíþróttum.
Erfitt að fyrirgefa
Michael Sam greindi frá því að hann
væri samkynhneigður í aðdraganda
nýliðavals NFL-deildarinnar árið
2014. Hann hafði verið valinn besti
varnarmaður hinnar sterku SEC-
deildar í háskólaboltanum og var því
spáð að hann yrði valinn í fjórðu um-
ferð valsins. Eftir að hann greindi
frá kynhneigð sinni var hann færður
í sjöttu umferð í spá sérfræðinga og
fór svo að hann var valinn í sjöundu
og síðustu umferðinni af St. Luis
Rams.
Sam lék aldrei í deildinni og mikið
hefur verið rætt og ritað um hvort
hann hafi fengið sanngjarna með-
ferð innan deildarinnar. Möguleiki
gæti verið á því að hann hafi verið
nálægt því að komast í lið en sam-
keppnin um það er gífurleg og þjálf-
urum hefur fundist að mál hans væri
of mikil „truflun“ fyrir liðið. („Trufl-
un“ er oft ástæðan sem gefin er fyrir
því að leikmönnum sem hafa vakið
athygli á sér utan vallar er gert að
taka pokann sinn.)
Þótt deilt sé um hvort kynhneigð
Sam hafi spilað inn í að hann fékk fá
tækifæri í deildinni virðist hann viss
í sinni sök. „Ég fékk kalda meðferð í
NFL-deildinni,“ sagði hann árið
2019. „Það var erfitt að fyrirgefa
þeim.“
Engar fyrirmyndir
Yfirlýsing Nassib mun vonandi
verða til þess að viðhorf til hinsegin
íþróttamanna mun halda áfram að
þokast í rétta átt. Nassib segist hlé-
drægur að eðlisfari, sé ekki að leitast
eftir athygli en hafi fundist hann
þurfa að stíga fram. „Ég vil gera
mitt besta til að koma á fót menn-
ingu sem er móttækileg og einkenn-
ist af umhyggju.“
Samkynhneigðir leikmenn eru
mikilvægar fyrirmyndir fyrir ungt
fólk sem dreymir um að verða at-
vinnumenn í sínum íþróttum. The
Athletic ræddi við Marc Davino, 55
ára íþróttaunnanda sem er samkyn-
hneigður. „Það voru engar fyr-
irmyndir í hópíþróttum þegar ég ólst
upp. Þess vegna held ég að það sé
frábært að þessi ungi maður sé að
segja sögu sína opinberlega á meðan
hann leikur í NFL-deildinni.“
Nassib virðist skilja hve miklu
máli hann komi til með að skipta fyr-
ir hinsegin íþróttaunnendur. Hann
styrkti Trevor-verkefnið sem eru
samtök með það að markmiði að
koma í veg fyrir sjálfsvíg meðal hin-
segin ungmenna um 100 þúsund
dollara í tilefni af tilkynningu sinni.
„Hinsegin börn eru meira en fimm
sinnum líklegri til að íhuga sjálfs-
víg,“ sagði Nassib í myndskeiði sínu.
„Mér finnst ég bera ábyrgð á því að
hjálpa eins mikið og ég get.“
Ætti ekki að
vera þörf
Carl Nassib er fyrsti opinberlega samkynhneigði
leikmaður NFL-deilarinnar. Hann vonar að einn
daginn þurfi leikmenn ekki að greina sérstaklega
frá kynhneigð sinni. Nokkuð langt er í land eins
og saga Michael Sam sýnir og hefur hún eflaust
reynst einhverjum leikmönnum víti til varnaðar.
Böðvar Páll Ásgeirsson bodvarpall@mbl.is
Carl Nassib varð á dögunum fyrsti leikmaður NFL-deildarinnar til að koma út úr skápnum meðan á ferlinum stendur.
Stutt hefur verið rækilega við bakið á honum síðan hann greindi frá kynhneigð sinni fyrir tæpum tveimur vikum.
AFP
Michael Sam sést hér í búningi St. Luis Rams sem valdi hann í nýliðavalinu
2014. Hann spilaði aldrei í deildinni en lék nokkra æfingaleiki með Rams.
AFP