Fréttablaðið - 25.05.2022, Blaðsíða 10

Okkur er annt um
vörumerkið og viljum
styrkja stöðu okkar
hægt og bítandi.
Helgi Rúnar Óskarsson
Hrafnhildur Hermannsdóttir starfar
sem markaðsstjóri Eldum rétt. Hún
nýtur þess að hreyfa sig og skipa
hlaup stóran sess í hennar lífi.
Hver eru þín helstu áhugamál?
Síðustu ár hafa hlaup skipað
stærstan sess í þeirri deild. Ég nýt
hvers konar hreyfingar mikið en
hlaupin gefa mest. Ég hef náð að
flétta saman hreyfingu og samveru­
stundum með vinkonum mínum
sem er ómetanlegt. Við höfum sett
okkur saman markmið, við hlupum
hálfmaraþon í kringum Mývatn
síðasta sumar og svo stefnum við á
Dyrfjallahlaupið á Borgarfirði eystri
í sumar. Hlaupin eru líka svo dásam­
leg hugleiðsla sem gefur tækifæri til
að hreinsa hugann.
Hvernig er morgunrútínan þín?
Þegar best lætur fer ég þrisvar í
viku á æfingu áður en fjölskyldan
fer á fætur. Það er draumabyrjun á
deginum, að fara full af orku inn í
daginn. Við reynum að eiga rólega
morgna með krökkunum áður en
þau fara í skóla og leikskóla og það
tekst oftast. Stundum er þetta þó
eins og upphafsatriðið í Home Alone
þegar allir hlaupa sitt í hverja áttina
og enginn finnur neitt. Þá er líka
ansi góð stund að setjast niður með
kaffibollann í kyrrðinni í vinnunni
og skipuleggja daginn.
Hver hafa verið mest krefjandi
verkefnin á undanförnum miss-
erum?
Það er líklegast eins og hjá flest­
um – Covid. Yngsta barnið okkar
fæddist í febrúar 2020 svo ég var að
byrja í fæðingarorlofi þegar Covid
skall á. Ég hafði séð fyrir mér langa
göngutúra og kaffihúsahittinga með
vinkonum. Þetta er þriðja barnið
okkar svo markmiðið í fæðingar­
orlofinu var að slaka vel á og njóta.
En það breyttist ansi snögglega.
Miklar áskoranir biðu okkar næstu
tvö ár í Eldum rétt. Það var mikil
aukning í pöntunum og á sama
tíma samkomutakmarkanir. Skrif­
stofustarfsfólk vann heima svo ég
og maðurinn minn unnum saman
heima með yngsta krílið í fæðing­
arorlofi og hin tvö óreglulega í leik­
skólanum. Við komum sem betur fer
vel undan Covid á vinnustaðnum og
enginn veiktist alvarlega.
Ég fékk þó frekar slæma Covid­
sýkingu sjálf og missti heilsuna í
nokkra mánuði. Ég hef verið mjög
heilsuhraust í gegnum tíðina svo
þetta var mjög krefjandi tímabil
og þá ekki síst andlegi hlutinn sem
fylgir svona líkamlegum veikindum.
Ég hef þurft að læra að kúpla mig
niður og taka einn dag í einu.
Hvaða áskoranir eru fram undan?
Við erum í stöðugri þróun á okkar
starfsemi. Við erum byrjuð með
prófanir á nýju áskriftakerfi sem
verður eitt það persónumiðaðasta
sem sögur fara af. Þá erum við að
fara að hefja vegferð með nýjum eig­
endum sem gerir okkur kleift að fara
af stað með stór verkefni. Eldum rétt
á mikið inni og möguleikarnir eru
endalausir. Við fáum mikla endur­
gjöf frá viðskiptavinum okkar sem
hika ekki við hrósin, hvetja okkur
áfram en láta okkur líka vita hvar
er rými fyrir bætingar. Ég hef mikla
þörf fyrir að láta gott af mér leiða og
í starfi mínu fæ ég mörg tækifæri til
þess.
Ef þú þyrftir að velja annan starfs-
frama, hvað yrði fyrir valinu?
Mér þykir óneitanlega alltaf mjög
vænt um hjúkrunarfræðina. Áður
starfaði ég á sængurlegudeild á Land­
spítalanum og á Heilsugæslunni,
meðal annars í ungbarnaeftirliti,
og þar fann ég mig vel. Það er mjög
gefandi að vinna með nýbökuðum
foreldrum og ungbörnum í nánum
samskiptum. Þetta er viðkvæmur
hópur sem þarf að styðja vel við og
hlúa að.
Hver er þín uppáhaldsborg?
París er uppáhaldsborgin mín.
Hún hefur allt að mínu mati – góðan
mat og fallegt umhverfi, það er hægt
að ganga um alla borgina og njóta. n
Hlaupin hafi skipað stóran sess
Hrafnhildur segir að uppáhaldsborgin hennar sé París enda sé þar einstak-
lega góðan mat að fá. FRÉTTABLAÐIÐ/ERNIR
Nám: Hjúkrunarfræði.
Störf: Markaðsstjóri Eldum rétt.
Fjölskylduhagir: Er í sambúð með
Kristófer Leifssyni og eigum við
saman þrjú börn, Áróru 7 ára, Al-
bert 4 ára og Matthildi Söru 2 ára.
n Svipmynd
Hrafnhildur
Hermannsdóttir
66°Norður hyggst opna 300
fermetra verslun á Regent
Street í London fyrir lok
september. Forstjórinn segir
rökrétt að fikra sig inn á
breskan markað eftir vel­
gengni fyrirtækisins í Dan­
mörku síðustu ár.
ggunnars@frettabladid.is
Verslun 66°Norður í London verður
sú þriðja sem fataframleiðandinn
opnar utan Íslands en fyrir eru tvær
verslanir í Kaupmannahöfn.
Helgi Rúnar Óskarsson forstjóri
segir undirbúning hafa staðið yfir
um nokkurra ára skeið. „Við höfum
lagt áherslu á að vanda okkur í
þessu. Við höfum í raun verið til­
búin í talsverðan tíma en ákváðum
að bíða af okkur heimsfaraldurinn.
Þetta er í raun mjög rökrétt skref á
þessum tímapunkti.“
London hefur verið leiðandi í
fataiðnaði og smásölu á evrópskan
mælikvarða og segir Helgi því um
mikilvægt skref að ræða og stóra
fjárfestingu. „Félagið stendur vel og
er með sterkan efnahagsreikning.
Það skiptir máli þegar stigið er inn
á svo stóran markað. En við höfum
unnið okkar heimavinnu og byggj­
um þessa ákvörðun á ítarlegum
greiningum. Við vitum að breskur
markaður er mjög móttækilegur
fyrir okkar vörum og sjáum það
greinilega í vefversluninni okkar
sem dæmi. Þar eru Bretar stór hluti
núverandi viðskiptavina okkar.
Íbúar London eru meira að segja
mjög áberandi,“ segir Helgi.
66°Norður opnaði sína fyrstu
verslun í Kaupmannahöfn árið
2014. Fyrirtækið rekur tvær versl­
anir í borginni í dag og hefur átt í
samstarfi við þarlenda fatafram­
leiðendur og hönnuði undanfarin
ár. „Okkur hefur gengið vel í Dan­
mörku og vörumerkið er komið á
kortið. Við áttum okkar besta ár í
sölu úti í Danmörku í fyrra. Sem er
merkilegt því verslanirnar voru lok­
aðar svo mánuðum skipti vegna far­
aldursins. Það er meðbyr með okkur
og við finnum að vörumerkinu vex
ásmegin.“
Helgi segir miklu máli skipta
að hafa fulla stjórn á því hvernig
vörumerki er byggt upp á nýjum
markaði. „Það er helsti kosturinn
við að opna eigin verslanir og þess
vegna leggjum við mikla áherslu á
það. Okkur er annt um vörumerkið
og viljum styrkja stöðu okkar hægt
og bítandi. Við sjáum klárlega fyrir
okkur að opna fleiri verslanir í Bret­
landi í framtíðinni en við tökum eitt
skref í einu. Þetta er þolinmæðis­
vinna og mikilvægt að gera þetta
rétt og vera raunsær.“
Verslun 66°Norður á Regent Street
verður flaggskip fataframleiðand­
ans. Helgi vonast til að geta tekið
á móti fyrstu viðskiptavinunum í
London fyrir lok september. „Við
eigum eftir að fá húsnæðið afhent. Ef
samningar ganga eftir og allt verður
eins og um var samið þá á það að
ganga upp. Við erum full eftirvænt­
ingar og hlökkum til að taka þetta
skref,“ segir Helgi Rúnar. n
Ný verslun í London verður flaggskipið
Helgi Rúnar Óskarsson, forstjóri 66°Norður, segir London rökrétt næsta
skref fyrir ört vaxandi vörumerki. MYND/AÐSEND
10 Fréttir 25. maí 2022 MIÐVIKUDAGURFRÉTTABLAÐIÐMARKAÐURINN FRÉTTABLAÐIÐ 25. maí 2022 MIÐVIKUDAGUR