Súgandi - 01.06.2019, Page 3

3
SUMARBLAÐ
Kæru Súgfirðingar,
Nýr formaður síðan í vetur heilsar ykkur héðan
frá Skeljagranda í Reykjavík þar sem ég bý,
32. formaður frá stofnun félagsins árið 1950. Í
vetur skiptum við Elsa um sæti og ég fékk að
setjast í hennar rjúkandi heita sæti auk þess
sem nýr stjórnarmeðlimur Neníta Margrét
Aguilar Róbertsdóttir gekk til liðs við okkur. Við
þökkum Elsu fyrir frábær störf í þágu félagsins
sem formaður þess. Það hefur verið virkilega
ánægjulegt að starfa með stjórninni frá því ég
byrjaði og styrkja tengsl við Súgfirðinga og
ræturnar.
Að skipuleggja og skapa viðburði með hressu og
jákvæðu fólki gefur manni heilmikið og er hollt
fyrir sálina. Við erum auðvitað virkilega þakklát
fyrir mætingu á viðburðina því án ykkar haldast
þeir ekki á lífi. En félagið er aldeilis búið að dafna og
vaxa og á næsta ári mun það fagna 70 ára afmæli
sínu. Það er einungis fyrir öfluga Súgfirðinga sem
hafa átt stóran þátt í að gera félagið eins gott
og farsælt og það er og því ber að þakka. Í vetur
héldum við glæsilega árshátíð sem var mjög vel
sótt og lukkaðist afskaplega vel. Súgfirðingar
tóku sitt pláss á sjómannadaginn í Hafnarfirði
með þátttöku þriggja liða í róðrarkeppninni.
Minningarkvöldin halda sínu góða striki sem og
Súgfirðingaskálin.
Í blaðinu er farið yfir allt það helsta sem gerst
hefur síðustu misseri hjá félaginu og margt fleira
áhugavert. Að lokum vil ég þakka öllum sem
styðja okkur og styrkja við gerð blaðsins sem og
þeim sem vinna að því að setja það saman.
Njótið lestursins og sumarsins!
Kær kveðja,
Erna Guðmundsdóttir
formaður
PISTILL FORMANNS
Á myndina vantar Ólöfu Birnu Jensen