Goðasteinn - 01.09.1988, Side 122

landi og gróðri eftir því sem kostur væri og var það samþykkt og
unnið af þeirra hálfu, svo nú má telja að úr hafi verið bætt svo sem
kostur er.
Arið 1987: Látist hafði sumarið 1986 Ólafur Sveinsson sýslu-
nefndarmaður frá Stóru-Mörk. Hans var minnst á aukafundi sýslu-
nefndar haldinn 17. febrúar 1987. Nú koma til starfa þrír nýkjörnir
aðalmenn í sýslunefnd:
Fyrir Djúpárhrepp Friðrik Magnússon.
Fyrir Austur-Landeyjahrepp Þorsteinn Þórðarson.
Fyrir Vestur-Eyjafjallahrepp Guðjón Ólafsson.
Aðrir í sýslunefnd á meðan hún starfaði eða til ársloka 1988 voru:
Þórður Tómasson fyrir Austur-Eyjafjallahrepp.
Eggert Haukdal fyrir Vestur-Landeyjahrepp.
Oddgeir Guðjónsson fyrir Fljótshlíðarhrepp.
Pálmi Eyjólfsson fyrir Hvolhrepp.
Bogi Thorarensen fyrir Rangárvallahrepp.
Eyjólfur Ágústsson fyrir Landmannahrepp.
Hermann Sigurjónsson fyrir Holtahrepp.
Ólafur H. Guðmundsson fyrir Ásahrepp.
Á fundinum 17/2 ’87 var samþykkt:
Þræta um sýslumörk
Eftir að gengið hefur dómur í undirrétti í máli er varðar deilu um
stórt landsvæði í Rangárþingi og um er að ræða sýslumörk, telur
sýslunefnd Rangárvallasýslu bæði rétt og skylt að veita Land-
manna- og Holtahreppi allan þann atbeina er hægt er, miðað við
aðstæður. Því vill sýslunefnd ráða hæfan lögmann sem starfi við
hlið lögmanns hreppanna og verði sýslunefnd til ráðuneytis. Þeim
tilmælum er beint til lögmanna að þeir yfirfari málið ítarlega hvor
í sínu lagi og sameiginlega og freisti þess að rétta hlut Rangæinga
í meðferð þess fyrir Hæstarétti. Sýslunefnd kýs af sinni hálfu þá
Friðjón Guðröðarson, Eyjólf Ágústsson og Hermann Sigurjónsson
til að sjá um framkvæmd málsins.
Ráðinn var Hákon Árnason hrl. og hefur hann kannað málið.
120
Goðasteinn