Helgafell - 01.07.1943, Page 12

GUSTAF FRÖDlNGi
Morgundraumur
i.
Mig dreymdi, að ég eygði
inn í Árdegislönd,
þar sem Sólguðinn teygði
fram sóandi hönd,
þar sem glitruðu um suðrænan sælureit,
er síðari tíð í örtröð leit,
hans frjómögn og fyrirheit.
Mig dreymdi um apaldra í djúpri glóð
á dreif um myrkviðar gljúfraslóð,
um bládrúfnaklasa og kirsirein
í kleif, þar sem bergáin niðar ein,
um villihveiti með öx á iði
í öræfadalsins þagnarfriði,
um humla, sem vefjast tré frá tré
um tröllaskóganna rökkurvé.
Og laufhlíðar anga
við lækja hreim,
og hjarðirnar ganga
af grasi heim,
og konur og meyjar á kvíaból
með kirnur og skjólur fara á ról
í döggfalli um dal og hól.